طيب انا هرد من وجهة نظري .. صاحبك من الناس اللي حسبها بالفلوس و بس .. يعني فيه ناس القرار كله بيبقي متوقف علي كمية الفلوس اللي هياخدوها .. يا راجل حد برده يروح افغانستان !!! المفروض الواحد و هو بيسافر .. ميسافرش اي سفرية كدة و السلام حتي لو جايله فيها فلوس كويسة .. لازم يدرس الموضوع كويس و يبقي مخطلله و علي قدر الإمكان يبقي محدد وجهته من ساعة ما ياخد قرار السفر .. و يسافر البلد اللي هو شايف انها مناسبة له ثقافيا و اجتماعيا و كل شئ حتي لو عرض العمل فيها أقل .. و الصحاب حضرتك ماهو هناك هيكون ليه صحاب برده .. يعني انا واحدة قريبتي سافرت امريكا من 4 سنين .. و ليها صاحبة انتيمة معاها بقالها 3 سنين و علي طول مع بعض و هي البنت من شيلي .. يعني مش امريكية كمان .. واحدة من شيلي و واحدة من مصر مكتوبلهم يكونوا صحاب في امريكا !! .. و بيخرجوا و بيرجعوا يلعبوا باسكت ادام البيت الساعة 3 بالليل ! و البيت ملهوش سور .. الموضوع مش ان اي مكان برة مصر بعد الساعة 10 خطر .. طب ماهو فيه اماكن في مصر الساعة 12 الظهر خطر !!
أهم حاجة التخطيط من كافة الجوانب و مش من ناحية الفلوس فقط .. الواحد ميرميش نفسه في افغانستان عشان 4500 دولار .. انا فيه فيه بلد مشهورة بعقود العمل و الحياة الكريمة .. بس لو جالي فيها عقد بمليون جنيه .. و الله لو انطبقت السما عالأرض مش هروح .. في حين إن فيه كام بلد تانية لو سافرت و عيشت في مستوي اقل من اللي انا عايشه في مصر هكون مبسوط جدا .
و معلش مين قال ان الحياة في مصر بالجمال ده .. ده الواحد مش عارف ينام لا العربية تتخبط و هو نايم .. و بينزل برده يلاقيها مخبوطة ولا الكاسيت مسروق ولا الطاسات مسروقة .. و الصحاب كل واحد مشغول في شغله و خطيبته و الشقة اللي عايز يشتريها و بقوا يبيعوا بعض ببلاش .. و الناس اتجننوا شوية صيع و شوية دروايش.. و السرقة بقت عيني عينك و كل حاجة غالية و مفيش كرامة و مفيش التزام ولا ضمير و الهمجية هي القانون و الفساد بقي بيقول انا اهوه يا ارض اتهدي ما عليكي قدي .. و جهل في كل حاجة .. يا راجل دنا رحت الحسين من كام يوم شفت الناس بتعمل حاجات جوة الضريح أقل ما يقال عليها انها وثنية !! .. و الأحوال في أزفت ما يكون .. يمكن انتوا بتتكلموا علي مصر تانية !!
المفضلات