والله يا أختنا العزيزة وبدون أى مجامله ليكى وإنتى عارفه إنى صريح
إنتى فعلا من الأبطال وبتفكرينى بجيل أمهاتنا وستات زمان .
مش عارف أقولك إيه كل اللى إنتى حكيته هو ضريبه عمل المرأة والحمد لله إنك النموذج الإيجابى
للمرأة العامله المحافظه على واجباتها تجاه زوجها وأولادها وكمان محافظه على متطلبات وظيفتها
وده نجاح كبير يتحسب لك ويمكن إنتى الطرف الوحيد فى المعادله دى ( البيت والشغل ) اللى تقريبا مش واخد حقه أو بمعنى أصح إنك بتيجى على نفسك علشان البيت والزوج والأولاد (ودى على فكره رسالتك ) وعلشان الشغل يتعمل كويس وتكونى ناجحه فيه وأكيد إنتى الحمد لله نجحتى فى شغلك بدليل إستمرارك فيه .
لإن النموذج السلبى أو النموذج الغير ناجح للمرأة العامله وهو عدم النجاح فى الموائمه ما بين متطلبات البيت ومتطالبات العمل فبتلاقى نجاح فى البيت على حساب الشغل أو العكس
وفى النهايه النموذج دة بيفشل للأسف لأنه عنده خلل واضح وبيكون فى البيت أو الشغل .
فحضرتك الحمد لله نجحتى ولا زلتى فى تحقيق المعادله الصعبه فى الجمع ما بين البيت والشغل
فلازم نحيكى ونشد على إيديك الاول .
راحه البال فى الرضا بقضاء الله وقدره ورزقه ونعمه
بمعنى إن الزواج رزق
والزوج الصالح رزق
والأولاد رزق
وتحقيق الأهداف فى الحياة رزق
والصحه رزق
والستر رزق
والأمان رزق
والشغل رزق
وحاجات كتيرة موجوده عندك وإنتى أكيد عارفاها رزق ونعمه من الله عز وجل .
طيب نحل المعضله دى إزاى ؟
1- تحاولى تنظمى وقتك على أكبر قدر ممكن بمعنى إنك تعيدى ترتيب أولوياتك وإلتزاماتك بشكل مرتب أكتر وتحاولى تشوفى إيه اللى ممكن تستغنى عنه من روتينك اليومى .
2- كمان تقدرى تغيرى فى ترتيب الاحداث اليوميه كنوع من أنواع التغير لكسر حاجز الملل والروتين .
3 - يوم الأجازة ممكن يكون يوم التنضيف بس عن طريق شغاله تحت إشرافك ودة لتوفير مجهودك البدنى وطبعا هيكون المقابل المادى هو البديل ودة يوم واحد فى الاسبوع يعنى 4 مرات فى الشهر وأعتقد تقدرى تدخلى البند دة على ميزانيتك الشهريه وخلى بالك الوقت اللى انتى هترتاحيه هيفرق معاكى كتير .
4- يوم الاجازة وبعد ما ريحتى نفسك من مجهود التنضيف هيكون عندك حافز لإنك تعمل حاجه تانيه ممكن تروحوا النادى تقعدوا شويه وتتمشى على الاقل نصف ساعه والله هتغيرك تماما .
5- فى حل بخصوص الشغل وبعيد طبعا عن انك تسيبى الشغل لأنه مش مطروح بالنسبه لك وهو إنك تحاولى مع الادارة فى شغلك إنك تاخدى يوم السبت اجازة مع الجمعه او لو مش هينفع يبقى تعدلى مواعيد إنصرافك وأعتقد رصيدك من سنوات العمل ممكن يسمحلك بالطلب دة حتى ولو ساعه بدرى عن موعد انصرافك هتفرق معاكى كتير .
6 - قبل كل ما سبق حافظى على صلاتك فى مواعيدها وأكثرى من قراءة القران وذكر الله واعمل لنفسك ورد يومى بايات من القران الكريم واحرصى على الاذكار اليوميه فى مواعيدها ( اذكار الصباح والمساء ) وهتحسى براحه غريبه .
وخلى عند ثقه ويقين بإن ربنا سبحانه وتعالى بيدة كل شئ وقادر على أن يعطيكى إحساس وحاله الرضا وراحه البال ولكن إحرصى أكتر على علاقتك بربنا .
ختاما خلينا كلنا نعمل دعوة لأنفسنا بتحسين علاقتنا مع الله إيتغاء مرضاة الله ثم بنيه إنه سبحانه وتعالى ينظم لنا الحياة.
يعنى نحسن علاقتنا بربنا ونسيب أمور الدنيا لله سبحانه وتعالى وهو أكيد هيرتبها لنا على أحسن ما يكون ,
بعتذر للإطاله ودعواتى وأمنياتى لحضرتك بالتوفيق دائما وربنا يباركللك فى صحتك وأولادك وزوجك الكريم وإن شاء الله تنالين رضا الله ثم رضا أقرب الناس بإذن الله .
تقبلى تحياتى ........
المفضلات