الموضوع: سؤال عن 525i 2007

العربية مع خالي موديل 2007 525i ماشية 190000 كم ( أول يد ) .. ده بداية ردي ليك عشان اللي هقوله كله مبني علي تجارب وعلي طول معاه في كل حاجة تخصها

مبدئياً كده العربية دي كشكل خارجي وداخلي اللي مصممها فنان آخر مليون حاجة..سواء في التصميم أو الخامات المستخدمة فيها.

بالنسبة لإعتمادية العربية دي..الموتور بتاعها six cylinder straight line وده بيتميز بأداء رياضي مبهر وصوت ناعم في نفس الوقت مش زي الـ v6 اللي بيتميز بغلاظة صوته

العفشة بتاعتها متستناش أداء عفشة الـ w204 لأن هتحس بفرق في الراحة لصالح w204 ومعروف الـ bmw عفشته ناشفة.

الثبات بتاعها طبعاً حدث ولا حرج وربنا يكفيك ويكفينا الشر بعيد عن السامعين .. نادراً ما تسمع عن e60 إتقلبت علي الطريق.

وسع الصالون من الداخل مرضي إلي حد كبير وزيه زي w211 في المرسيدس.
الشنطة بتاعتها عائلية وتسعفك في السفر مش هتسكسفك يعني.

أداء التكييف لو بحالته فوق الممتاز وبيتلج المقصورة بتاعة العربية.

الـ idrive بتاعها جميل ومريح في إنه لامم معظم الداتا بتاعة العربية ولو لا قدر الله حاجة باظت ( كهربية ) بتظهر علي طول بالتفصيل في الـ idrive عشان متتعبش علي ما تدور علي سبب العطلة فين

العربية بتشتغل عادي جدا ً ببنزين 92 مش 95 لأن مفيهاش تربو ولا وجع دماغ.

استهلاك البنزين بتاعها عالي نسبياً لأنها 6 سلندر فمتقارنش استهلاكها بالـ w204 اللي معاك.

كل ده كلام جميل..المهم..

- حاجات لازم تعرفها في العربية دي قبل ما تركبها :-
1- أجزاء دورة التبريد فيها كلها سريعة الإستهلاك خصوصاً في الصيف ( ريداتير - طرمبة مياه - قربة مياه ) يعني كل 100000 - 150000 لازم تكشف عليهم كويس والتالف تلحقه قبل ما يسمع في حاجة تانية.

2- التكييف بتاعها في مشكلة بتظهر علي المدي البعيد إن ملف الكويل الموجود في الطابلوه بيطلع صوت صفارة لو سرعة المروحة بطيئة وبيحتاج يتفك ( شغلانة طويلة ) وتنظفه بهواء وتركبه تاني.والتلاجة بتاعة الفريون نوع الألومنيوم بتاعها خفيف جدا بيبدأ يسرب نسبة فريون بسيطة بعد فترة معينة انت وحظك..ودي كلفتنا 2800 جنيه ومشكلتها إنك بتضطر تفك الطابلوه كله وطبعاً ده بتعمله عند حد متخصص في bmw وبيرجعها زي ما كانت بالظبط ولا كأن في حاجة حصلت..وتاخد وقت شغل عنده يوم بطوله.

3- الفتيس بتاعها لازم كل 80000 كم تكشف علي زيت الفتيس وتشوف محتاج تغيير ولا لا وطبعاً هو والفلتر.وغالباً بيحتاج تغيير ونوع الزيت bmw zf 5hp19 transmission
تشتريه من التوكيل وبيكلفك حوالي 1400 جنيه وده الصنايعية بيسموه زيت كهربه..ولو واظبت علي الموضوع ده هتتلاشي أي مشكلة ممكن تحصل في الفتيس وتحس إنه جديد علي طول.لو مواظبتش هتبدأ رحلة مأساوية مع الفتيس بتاع العربية دي وتمنه 70000 جنيه في التوكيل.

4- نظام التعليق بتاع العربية دي للأسف كانوا المفروض يعالجوا العيب الشائع في أختها الصغيرة e39 في إن أجزاء التعليق من الألومنيوم مش الصلب.ولكن معالجوش ده ولهذا السبب أسرع حاجة بتستهلك في العفشة بتاعتها هي المقصات الخلفية بالذات والجلب بتاعة المقصات الخلفية. وتقدر تعرف الموضوع ده حصل ولا لا عند ظبط الزوايا..لو المقص الخلفي فيه حاجة.مهما ظبطت الزوايا تلاقي في نسبة ميل في الطارة يمين أو شمال وتلاقي في ميل بسيط في جسم العربية جهة المقص التالف.

5- نظراً لعزم الموتور القوي جداً في الطلعة بالذات لو طلعت بـ kick down في حاجة في عمود الكردان إسمها كرسي النصف..دا بيبقي فيه جلبة رفيعة وطويلة مع تكرار الـ kick down بيحصلها تنميل ( زي كششان كده ) وبتبدأ تحس برجة في العربية من سرعة 120 فأعلي..طبعاً في مرسيدس ولاد الناصحة عاملين الجلبة دي سميكة بغباء عشان يتفادوا الموضوع ده.

6- تحت كرسي الراكب الأمامي..في حساس airbag لو حد اترزع جامد علي الكرسي ده أو طال تحته مياه غسيل كتير بدون تجفيف..بيهنج وينور لمبة airbag وطريقة تصليحه بتبقي عن طريق فك الكرسي وتنظيف الحساس ده أو تغييره بـ 200 جنيه إذا لزم الأمر.

7- مروحة التبريد فيها حاجة إسمها clutch.وده مع الوقت ممكن يبوظ وتكلفة تغييره 700 جنيه..وسبب بوظانه مياه الغسيل مع التراب..يعني من الآخر متجيبش نقطة مياه علي الموتور عشان تريح دماغك.

ده كل اللي أقدر أقوله..وكنت واضح جداً معاك قدر المستطاع عشان تبقي عارف كل كبيرة وصغيره وتوابعهم في العربية اللي انت راكبها.

ملحوظات هامة قبل إقتناء العربية :-

1- متسمعش كلام اللي يقولك يا بيه زيت الفتيس بتاع العربية دي lifetime ومش بيتغير نهائي.للأسف سمعت الكلام ده في e39 وربنا ستر علي الفتيس لولا لحقت المشكلة في أولها كان طار مني.

2- متسمعش كلام اللي يقولك يا بيه دي تدي مرسيدس بالجزمة ومفيش مقارنة بينهم والكلام ده..لا مرسيدس تدي بي إم بالجزمة ولا العكس.العربيتين برنساااااات.بس كل اللي أقدر أقوله..إني كنت راكب e39 ( عربية فوق الممتازة ) وحالياً راكب مرسيدس w220 s320 وموجود في العائلة e60 و w210 و w211 و e38 ... بصرف النظر عن شهادتي اللي ممكن تحول لمفهوم خاطئ لدي البعض هنا في المنتدي..فبشهادة الجميع عندنا ان الأفضلية لصالح مرسيدس..ولكن مع مراعاة كامل التقدير للـ bmw

3- لما تعمل صيانتك للـ bmw متسمعش كلام أي حد يدلك علي واحد إسمه منصور..لو هتعملها بنفسك..أهون ما تعملها عنده..سفففففففففاااااااااا ااااااح..ولو شافك راكب e60 هيزعلك..لأنك بالنسبة له واللي عنده..من عالة القوم.

متأسف جداً علي الإطالة دي..وأرجو إني أكون قدرت أفيدك علي قدر إستطاعتي.بالتوفيق وتقبل تحياتي.