الموضوع: للاسف اشتريت ميجان

المشاركة الأصلية كتبت بواسطة ashraf3

السلام عليكم ورحمة الله وبركاتة
واضح من عنوان المشاركة اني نادم على شراء الميجان
فقد اشتريت سيارة ميجان 2005 منذ ايام قليلة رغم ان لدي سيارة اوبترا لكني اعجبت بها من قراءتي عنها وبصراحة احسست بعدم الراحة النفسية عند قيادتها على خلاف الاوبترا حيث اني لم اكشف عليها في التوكيل واعتمدت على احد الاشخاص الخبرة في هذا المجال ولكني ندمت على ذلك للاسباب الاتية
1- جميع الابواب تصدر اصوات كما لو كانت غير مغلقة جيداً
2- يوجد صوت طقة تُسمع من الخلف في الناحية الشمال
3- لون السيارة باهت الى حد كبير
4- الكارت الثاني لا يعمل
5- تسارع السيارة بطئ جداً
6- ال سي دي بة احد السيديهات محشور بها ولا يريد ان يخرج
7- ولكن ما جعلني اقلق بالفعل هو انني عند سفري الى شرم الشيخ لاحظت ان السيارة لا تستجيب معي ووقفت على سرعة 110كم فقط ولا تريد ان تزيد السرعة مهما ضغط على دواسة البنزين ولكن عندما ضغط مرة واحدة لاحظت ان عداد ال ار بي ام ارتفع جدا ثم بدأت السيارة في زيادة السرعه حتى توصلت الى سرعة 130 كم س فقط واحسست برعشة غريبة في السيارة مع ظهور رسالة check gearbox وعندما تعود السرعة الى اقل من 110 كم س تعود الى وضعها السابق في عدم زيادة السرعة عن 110 رغم ان مالكتها القديمة قالت لي انها لايوجد بها مثبت سرعة
8- توجد رائحة بنزين داخل السيارة بعد التفويل وتختفي عندما يقل منسوب البنزين في التنك
فرجاء الى اهل الخبرة افيدوني عن السبب وكيفية العلاج وياليتني لم اشتري سيارة مستعملة
وشكراً لكم جميعاً

أغلب الظن انها اوتو والفتيس عاوز يتغير.. وبالنسبة لصوت الأبواب بيتسمع من الباب نفسه ولا الزجاج؟
حاجة تانية العربية عاملة كام كيلو؟ واشتريت بكام؟الحالة اللي بتقول عليها دي غالبا معدية ال 140 150 ألف وماتعملهاش صيانات كتير.. غالبا كانت عربية تأجير. شيك علي التيل والطنابير والزيوت.

بص من الآخر.. عليك وعلي التوكيل يطلعلك تقرير كامل بيها.

نقطة كمان.. طالما اشتريت جديد ماتشتريش مستعمل بعده غير لو حالة شاذة جدا.

واضح فعلا انك استعجلت فى الشراء على العموم حصل خير وده لا يقلل ابدا من الميجان لانها عربيه محترمه جدا جدا جدا لكنها محتاجه اهتمام ، رأى الشخصى انك تبيع العربيه دى وبلاش تتدخل نفسك فى متاهات بما انك مش مستريح ليها بلاش تدخل فى اصلاحات ومصاريف وفى الاخر مش هتبقى مبسوط برضه ،،، بالتوفيق

المشاركة الأصلية كتبت بواسطة crayvor

أغلب الظن انها اوتو والفتيس عاوز يتغير..

يتغير ؟؟ لية ؟ وبكام ؟

وبالنسبة لصوت الأبواب بيتسمع من الباب نفسه ولا الزجاج؟

من الباب نفسة

حاجة تانية العربية عاملة كام كيلو؟
واشتريت بكام؟

12000 كم

الحالة اللي بتقول عليها دي غالبا معدية ال 140 150 ألف وماتعملهاش صيانات كتير.. غالبا كانت عربية تأجير. شيك علي التيل والطنابير والزيوت.

كانت مع بنت

بص من الآخر.. عليك وعلي التوكيل يطلعلك تقرير كامل بيها.

نقطة كمان.. طالما اشتريت جديد ماتشتريش مستعمل بعده غير لو حالة شاذة جدا.

عندك حق بس اللي حصل

المشاركة الأصلية كتبت بواسطة وائل مختار

واضح فعلا انك استعجلت فى الشراء على العموم حصل خير وده لا يقلل ابدا من الميجان لانها عربيه محترمه جدا جدا جدا لكنها محتاجه اهتمام ، رأى الشخصى انك تبيع العربيه دى وبلاش تتدخل نفسك فى متاهات بما انك مش مستريح ليها بلاش تدخل فى اصلاحات ومصاريف وفى الاخر مش هتبقى مبسوط برضه ،،، بالتوفيق

واضح فعلاً ان انا استعجلت وانضحك علية
ومعقولة ابيع تاني وانا لسة شاريها من ايام ؟ اكيد حخسر فيها
عموما شكراً مستر crayvor ومستر وائل مختار

المشاركة الأصلية كتبت بواسطة speed_magnum

مش هزعلك واقلك انك اتسرعت وكان المفروض تكشف في التوكيل والذي منه. ...
بس ميزة العربيات دي انها لما بيكون فيها عيب ويتصلح بتحس انك ركبت عربيه جديده. .....
وديها التوكيل وهناك هيجيبولك من الاخر

لا زعلني لان واضح ان انا فعلاً اتسرعت أوي
وربنا يستر حتى اعود من شرم الشيخ
ولك مني جزيل الشكر

سيدي الفاضل انا الحمد لله بعت واشتريت حوالي 5 عربيات وباجيبلك من الآخر.. سوق السيارات 90% منه ماشي بالنصب الا من رحم ربي.

محلات تأجير السيارات صاحب المحل عمره ما كان أهبل عشان يخلي العربية باسمه..
بيخليها باسم الأولاد / الزوجة / شركاء من الباطن.. أي حاجة المهم لما ييجي يبيع تبان انها بتاعة شاب- فتاه - سيدة - موظف حكومي.. المهم تبقي بعيد عنه عشان ازالة الشك.. نفس الكلام دي عربية ايجار ومكتوبة باسم واحدة ليس الا.. أكبر دليل عندك في كام نقطة:

الأبواب بتطلع صوت وانا كنت بتأكد انه الباب مش مجرد الزجاج عارف ليه؟ حتلاقي دايما العربيات المتأجرة اللي بتبقي ف الأفراح أو لو (لا مؤاخذة) مأجرها حبة سرسجية تلاقيهم بينزلو الزجاج وبيقعدو ع الباب.. ده طبعا بيخلي مفصلات الباب والباب نفسه يريحو ويروحو ف داهية

نقطة تانية:
انت قولت 12 ألف أو 120 ألف.. لو 12 ألف بحالة العربية دي يبقي صاحب العربية كان فاصل فيشة عداد الكيلو. أما لو 120 ألف فهل فيه "فتاه" بتمشي 47 كيلو يوميا؟ لأن 120 ألف كيلو عشان تعملهم في 7 سنين محتاج تعمل يوميا 47 كيلو بدون يوم واحد راحة للعربية.

نقطة تالتة:
هل صاحب عربية زي الميجان حايطنش موضوع الكاسيت ده ويسيبه علي حاله كدة؟

أما موضوع الفتيس فا دي حاجة في دماغي ان النقلة الخامسة فيها حاجة غلط فا العربية شغالة علي 4 نقلات بس.. لما حاولت تدي كيك داون العربية جابت آخر الرابع (الار بي ام علي لغابة الرد زون) فحاولت تنقل للخامس ماعرفتش ومن هنا طلعلك رسالة Check Gearbox معناها ان فيه حاجة غلط والنقلة مش شغالة.. برضه مجرد نظرية مش قادر أاكدها بس معني ان الار بي ام بيدي معاك ان الموتور نفسه تقريبا سليم.

الطقة اللي ورا حضرتك مش موضح بالضبط بس دي حاجة من 3 - تيل يا طنبور يا مساعد.

بص عندك حل من اتنين.. اما انك تروح التوكيل تشوف العربية من أول ما تدخل لغاية ما ان شاء الله تطلع عروسة تكلفك كام.. يا اما تبيع علي طول لو مش عاوز توجع دماغك.. بس وضح العربية فيها ايه للي حاتبيعله عشان ربنا يباركلك في الفلوس حتلي لو حاتخسر.. تخسر حبة وربنا يعوضك فيهم ان شاء الله أحسن ما تاخد حبة زيادة مافيهمش بركة.

وبعد كدة الناس دي مابتخافش غير من كلمة واحدة.. التوكيل.. ماتشتريش غير بعد الفحص في التوكيل وأي نصاب بيتحجج بأي حجة زي: مافيش وقت - ماتقلقش دي عربية زي الفل - عيب عليك حاتشك فيا (علي أساس انه كان أخويا قبل كدة) - دي ناس مفترية.. أصل مستعجل ولو ماخلصتش معايا فيه واحد حايخلص بكرة الصبح.. كل دول ابعد عنهم

وللعلم توكيل رينو بيبيع عربيات رينو استعمال بضمانه الشخصي.. أحسنلك لو شفت حاجة من هناك