الموضوع: هل يمكن ان احول سيارة حديثة الى الغاز بامان تام دون مشاكل تحسبا لارتفاع البنزين

المشاركة الأصلية كتبت بواسطة tutankhamoun

اللي قالك يا فندم أعطاك معلومة مش صحيحة ... و العلم كله عند الله .

الغاز بيخرج طاقة أقل من البنزين أصلا (فأزاي هايخلي العربية تسخن أكتر من البنزين ؟ )

مشاكل الغاز تتلخص في مخرجاته اللي بتأثر على حوائط البساتم و على ما أعتقد أنه بينتج كبريت وده اللي بيأثر على عمر الموتور الأفتراضي .

اللي عرفته من ناس محول لغاز خارج مصر و داخل مصر الآتي :

1 العربية بتستهلك غاز أكتر من البنزين لنفس المسافة نظرا لكمية الطاقة الأقل المنتجة و لكن لرخص سعر الغاز بيتم تعويض الفارق في السعر .
2 يؤثر سلبيا على عمر المحرك (على المدى البعيد قوي ) يعني مثلا ممكن يخليك تعمل عمرة عند 200 ألف كم بدلا من 250 ألف كم .... ده مثال فقط توضيحي .
3 مساحة الشنطة الخلفية بتضيع في الأسطوانة الكبيرة ..... بالاضافة لخطورتها لو حصل حادث من الخلف و ممكن تنفجر (و لكن ده معرضله تانك البنزين برضه )
4 قلة محطات الغاز مقارنة بمحطات البنزين ...


آخر حاجة بقى ... مفيش حاجة أسمها أحسن سيارة تستحمل و سيارة مش بتستحمل .
كلهم بيستحملوا الأهم تراعي الطريقة الخاصة بقيادة سيارات الغاز و هي كالآتي :
تدور الصبح بالبنزين و تسير 10 كم مثلا و بعدين تقلب غاز
لما تبطل العربية تقلب بنزين الأول و بعدين تبطل

و الله أعلم .......أنا مجربتش بنفسي و لكن أبحاث بريطانية أسترالية قرأتها بالاضافة لكلام سمعته من سواقين .

بخصوص انفجاز اسطوانه الغاز ودي معلومة غير صحيحة لان ثمن تركيب الغاز ليس ثمن الجهاز بل لان الاسطوانه مختبره علي اعلي مستوي ضد الحريق وتم اختبارها تحت الضغط وايضا ضد الرصاص وطبعا كله بتاع ربنا وارد يحصل اي شي

انا كنت مركب الغاز عندى فى العربية القديمة الملاكى


اولا سعر الغاز اقل كتير جداااااا 45 قرش للمتر الكعب

بالنسبة للمسافه الى ممكن اسطوانة الغاز تمشيك مقارنة بالتانك البنزين

لازم نعرف ان فى احكام للاسطوانات انت بتنقى انى واحده تركب او على حسب وسع الشنطة عندك
فى 70 .80.90 متر اسطوانات مختلفة الاحجام يعنى

بس لازم تكون المكنة كويس علشان الغاز حاااااامى

يعنى الطاقة بتاعته تعادل او تكاد تعادل بنزين 95
ايوة انت قريتها صح بنزين 95 ابو 6 جنيه
و اىل قال ان العربية لازم فعلا تكون عدى عليها مده و هى بتستخدم بنزين عادى علشان تتحول غاز الكلام ده سليم

حتى التاكسى بيشغل العربية الصبح ساعتين ببنزين 80 علشان يعمل طبقة كربون اسمها يكربن المكنه و بعدين يقلب على الغاز عدل باقى اليوم عادى


محطات الغاز بقا انت كملاكى لك مكنة مخصوصة لييك متلاقيش تاكسى بيمون منها

الغاز مش ممكن يخلص او تلاقى محطة غاز مشطبة غاز
علشان المحطات دى بتكون جايلها مواسير زى الكرباء كده مستمرة (ممكن لو فيها صيانة او حاجه يعنى طارئة)
و حسب المكان الى انت ساكن فيه محطات غاز ولا لا

يعنى مثلا فى المنصورة محطات الغاز تقريباا اكتر من محطات الينزين من غير مبالغه




عيوب بقا ان الشنطة حجمها يقل
الدوارة الصبح يتغيب لو انت راكن العربية على الغاز
صيانات الغاز لازم فى محطات الصيانة المعتدمه فقط ولا مفيش صنايعى يقدر يهوب ناحية جهاز الغاز اطلاقا
بتمون عن طريق فتح الكبوت يعنى هيتفتح و يتقفل كتير
الاسطوانة بتتقل العربية من ورا