عربيتي أخدت علامة جديدة من مواطن مصري أصيل !!!

**SAbuhashem** · 22-07-2008 03:43 AM

`
الليون إتخبطت تاني

وبردو وهيا مركونة وواقفة في حالها

وبردو الغطا الجديد اتقطع واتبهدل

هقضيها أنا غطيان جديدة بقى !!

المرة دي الخبطة جت في الرفرف الشمال قدام والإكصدام والجزء إلي تحت الفانوس الشمال

تجاريح غبية وشكلها مقزز

العربية مكملتش ٢٥٠٠ كيلو وكانت واقفة في مكان لو بيعدي من جنبها ٤ عربيات نقل بالعرض مش هيلمسوها !
أموت وأعرف إلي خبطها دة خبطها ازاي إلا إذا كان قاصد يدخل فيها !

الله أعلم

عموماً دي مش شكوى الحمد لله رب العلمين

دة بس توضيح لحال الشارع المصري المقيت

على رأي واحد أجنبي كان جاب عربية بورشه مصر ورجعها بعد إسبوع
you will never ever be able to keeb a nice car in this country

قولولي حل

أعين عليها حرس ؟!

والله لو ينفع اطلعها البيت لاطلعها

عند والدي جراج خاص لكن بعيد جداً عن بيتي ومستحيل عملياً أركن فيه
وأهي في الجراج تحت البيت وكل شويه مخبوطة

أنا بفكر جدياً أبيعها علشان مبستخدمهاش تقريباً وبتتخبط وهي مركونة ومتغطية يبقى قلتها أحسن

حسبي الله ونعم الوكيل وربنا يسامحه إلي خبطها بقى

معلش قلبتها أحزان معاكوا
أنا مش حزين الحمد لله على قدره
لكن بصراحة متغاظ وعايز حل وإلا هبيعها !

Thanks
Eng.Sherif Shaker

**Ramy.Gamal** · 22-07-2008 03:48 AM

الله يكون فى عون الفئه القليله من الشعب المصرى من الفئه الكثيره الضاله من الشعب المصرى . تلاقى الراجل بيعزك وحب يسبلك ذكرى ولله انا حاسس بيك الله يكون فى عونك

**Ahmed Anwer** · 22-07-2008 03:48 AM

قدر الله و ما شاء فعل يا باشمهندس شريف

الحمد لله ،،

علي كل حال

ده امر واقع لازم تتعايش معاه

**spero** · 22-07-2008 04:17 AM

متزعلش انتا يمكن ربنا جابها في العربية مكنتش تعرف ممكن كان يحصل اية انا عارف ان الكلام دة مش بيعمل حاجة بس معلش انا والله عربيتي الكبوت كلو تجريح مسامير وكاتبين علية حفر كدة وباقي العربية بس تعرف انا نفسي ف حاجة واحدة بس اشوف العيال اللي بيعملو كدة .نفسي اقابل الفنان التشكيلي المتميز دة اللي اختار كبوت عربيتي عشان يخلد علية اعمالة الرائعة واشكرو, متزعلش بئا وقدر الله وماشاء فعل

**ahmedsrs** · 22-07-2008 04:19 AM

فعلا مفيش عربية مش متجرحة ومتبهدلة فى البلد انا اتحسرت لما شفت العربيات الأستيراد فى بورسعيد عربيات موديلات التسعينات ومفيهاش حكة ولا خبطة

**Chicco** · 22-07-2008 04:35 AM

و الله مش عارف أقولك إيه يا باشمهندس .....حاجة تنقط بصراحة ....و عدم المبالاه و قلة الضمير ينقطوا أكتر .....ما فيش حتى اعتذار و لو بكلمة .....حصلتلي قبل كده ....و العربية راكنة في parking lot بتاع العمارة ....يعني اللي خبطني واحد من جيراني و و لا من شاف و لا من دري ......حاقول إيه بس .... قدر الله و ما شاء فعل ....و أنا من رأيي ما تبعهاش بس ما تغيطيهاش و سيبها مخبوطة شوية

**fahd_628** · 22-07-2008 04:41 AM

متزعلش نفسك والله مش لوحدك

لسة امبارح والدى كان بالميجان و هوة راكن فى امان الله و نزل يشترى حاجة رجع لقاها واقع عليها ظلطتين على الكابوت و عاملين نقرتين و البوية طلعت :( الحمد لله مجاتش على السقف !

بجد الراجل دة قال حكمة

you will never ever be able to keeb a nice car in this country

**MoToRiZeR** · 22-07-2008 04:56 AM

yes, you'll never be able to keep a nice car in this freakin' country !

**loai-omar** · 22-07-2008 05:16 AM

قدر الله و ما شاء فعل يا باشمهندس

والله انا بشوف ناس بتخبط و تحك عربيات و هيا وةاقفه و ماينفعش تتحك والله

احنا كنا قبل كده نازلين بشبح من الكويت من 4 سنين

الاكصدامين اترشوا اول مارجعنا و شوية تحابيش :)

قدر الله و ماشاء فعل

**Ahmed Samy** · 22-07-2008 05:25 AM

لا حول و لا قوة الا بالله
و الله زعلتني
البلد دي فعلا فعلا أصبحت لا تطاق
لازم تعزل حياتك كلها
لازم تجرش العربية
و لازم تقفل القزاز و انت سايق
و لازم تنشر جوه البيت أو تجيب مجفف
ولازم تجيب انتركم الجرس ماعادش ينفع

لازم نعزل نفسنا عن الشارع علشان تعرف تتمتع بحياتك
و ايه المتعة المسجونة دي

الله يصبرك
و الله حاسس بيك

الموضوع: عربيتي أخدت علامة جديدة من مواطن مصري أصيل !!!

LinkBack

أدوات الموضوع

عرض

عربيتي أخدت علامة جديدة من مواطن مصري أصيل !!! - انشر الموضوع فى :

-

-

-

-

-

المواضيع المتشابهه

عاجل للاهميه انا مواطن مصري

حوار مع مواطن مصري أصيل (بلال فضل)

::: دعاء مواطن مصري مطحون :::

فضفضه مع مواطن مصري

الكلمات الدلالية لهذا الموضوع

المفضلات

المفضلات

ضوابط المشاركة