تجربتى لكاسيت Matsobishi MC81 (بالصور)

**MarEgypt** · 26-12-2012 09:51 PM

اشتريته من محل العالم العربى، بـ 240 جنيه (تحميل الكتالوج)
العالم العربى : 3 ميدان العتبه - أول شارع الازهر | تليفون : 23904522

تجربتى الشخصية:
فى الاول روحت عند محل تقريباً اسمه العريبى (بعد العالم العربى بـمحلين او تلاته، وكاتب عليه فى الفاترينه 239 جنيه)
اولاً: معندوش ضمان، يعنى على التجربه وشكراً،
ثانياً: بعد مادفعت الفلوس ، طبعاً من حقى يجرب كل حاجه فيه قدامى، جرب الفلاش اشتغلت تمام، جرب الريموت اشتغل تمام، جرب الخرج على شاشه، اشتغل تمام، طلبت منه يجرب الكارت SD، قالى معنديش كارت مع انه كان مجرب الكارت للزبون اللى قبلى ولسه الكارت على البنش، روحت شاورت له على الكارت وقولتله مانت لسه مجرب دا للراجل اللى مشى، قالى طيب ... حط الكارت فى الكاسيت ماشتغلش، قالى يمكن يكون الكرت بايظ (مع انه كان لسه شغال من 3 دقايق) ، وسألنى معاكى كارت ؟ بالصدفه كان معايا موبيل فيه كارت من الكبير، خلعته من الموبيل عشان يجرب بيه، برضوا ما اشتغلش! وبيطلع على الشاشه No Card ... قولتله واضح ان فى مشكله فى الكاسيت، لو سمحت انا باجربه عشان اطلع من المحل معايا حاجه مجربه، فهات لى واحد غيره. قالى -بنوع من قلة ذوق- الكاسيت سليم ومفهوش حاجه، والعيب فى الكارت، ومش هاغير الكاسيت، والبيع مش بالعافيه، لو عاجبك خديه، مش عاجبك يبقى خدى فلوسك.

اخدت الفلوس وروحت لمحل (العالم العربى، تليفون: 23904522) : بمنتهى الذوق جرب لى كل حاجه، وسألته على الضمان، قالى معاكى أسبوع جربى فيه زى ما انتى عايزه بس قبل ما تركبيه فى العربية، لو أى مشكله رجعهولى فى خلال اسبوع الضمان. اشتريته منه وادانى فاتوره، والكهربائى جربه لما طلع عينه ، والحمدلله طلع سليم وركبته فى العربيه.

الكاسيت ماشاء الله عليه بجد تحفه:

الشكل جميل والزراير مضيئه باضاءه الوان متناسقه
2 مخرج فيديو
مخرج اوديو RCA
ايكوليزر
صوت نقى جدا وعالى جداااااااااااااا
ريموت (حجمه كبير شويا)
مدخل Aux
مدخل كارت ميمورى SD
مدخل فلاش
شاشه LCD الوان (لعرض بيانات)
ممكن يوصل على الكونتاكت عشان يطفى الساعه لما اطفى العربيه، من غير ما يحذف القنوات او يلخبط الساعه
بيخرج لاربع سماعات
فيه راديو AM/FM قوى جدا وصوت واضح جداً، جاب محطات FM الكاسيت القديم Sony مش كان بيجيبها
بيشغل الامتدات MP3/WMA/MP4
جربت فلاش 8 جيجا قراها، وفلاش 16 و 32 جيجا قراهم (عشان كنت خايفه مش يقرى الفلاشات الكبيره)
بيشغل الملفات اللى اسمها بالعربى، لكن الاسم مش بيظهر على الشاشه
بيقلب فولدرات
الريموت بتاعه حساس جداً مش لازم اوجه نحيته بالظبط، بيلقط من اى حته
بيرفع الاريال الكهربا اتوماتيك اول ما تشغل الراديو
عندى الموبيل بيخرج على سماعه، وصلت الموبيل بفتحت Aux بوصله اشتريتها بـ 3 جنيه اسمها (واحد لواحد، عباره عن جاك سماعه فى النحيتين)، وبقى الموبيل متصل بالكاسيت، وعملت مكالمات وانا سايقه والصوت خارج من السماعات نقى جدا وواضح جداً واقد اعليه واوطيه من الكاسيت، كأنى فاتحه Speaker الموبيل بس على الكاسيت
الحجم: 178mm(Width) X 50mm (Height) X 154 (Depth) :Size
Load Impedance: 4 - 8 Ohm
Max Output Power: 7W X 4 tracks
صناعة صينى
السعر: 240 جنيه

اخر حاجه اللى كان نفسى فيها بس مش موجوده، كان نفسى يكون معاه الريموت اللى بيركب فى التاره، لكن للاسف جاى معاه الريموت العادى.

سحبت الكتالوج سكنر (تحميل الكتالوج)

**mous6fa** · 26-12-2012 10:18 PM

بسم الله ما شاء الله عليكي بجد ... تقرير ف منتهى الإحترافية فعلاااا ومفيد بشدة خصوصا لواحد زي حالاتي كده كنت نازل بكرة بالتحديد أشتريه ... بجد جزاكي الله كل خير ^__^
بس ياريت لو تتكرمي وتقولي انتى مشغلاه ع سماعات ايه بالظبط ؟؟ يعني ايه الطقم اللى شغال عليه ؟؟ .. وياترى حسيتي بفرق واضح ف الأداء بينه وبين الكاسيتات العالية ولا الفرق مقبول ؟؟ لإن انا كان معايا ف العربية القديمة sony xplod cdx-gt500u مع 4 سماعات أكسبلود وكان الصوت طبعا مش محتاج تعليق مني ... بس دلوقتي عاوز أعمل حاجة ع الضيق وقولت اجيب الكاسيت الماتسوبيشي ده ومعاه طقم أكسبلود بيضاوي وشكرااا ع كده ... فياريت الافادة بخصوص قوة ووضوح الصوت بشكل موسع شوية :)

**khaledverna** · 26-12-2012 10:43 PM

تقرير رائع. ومبروووووووك

**kreka** · 27-12-2012 02:16 AM

مبرووووووووووووك جبتيه اخيرا d:

بس انا عندى الكاسيت مش بيقلب فولدرات .... لازم اروح اول او اخر اغنيه واقلب عشان يغير فولدر بس مفيش زرار للفولدرات زى البايو والسونى و الكينوود

وعندى لما كنت عامله على الكونتاكت كان بيمسح اى حاجه

**MarEgypt** · 27-12-2012 05:21 AM

المشاركة الأصلية كتبت بواسطة mous6fa

بسم الله ما شاء الله عليكي بجد ... تقرير ف منتهى الإحترافية فعلاااا ومفيد بشدة خصوصا لواحد زي حالاتي كده كنت نازل بكرة بالتحديد أشتريه ... بجد جزاكي الله كل خير ^__^
بس ياريت لو تتكرمي وتقولي انتى مشغلاه ع سماعات ايه بالظبط ؟؟ يعني ايه الطقم اللى شغال عليه ؟؟ .. وياترى حسيتي بفرق واضح ف الأداء بينه وبين الكاسيتات العالية ولا الفرق مقبول ؟؟ لإن انا كان معايا ف العربية القديمة sony xplod cdx-gt500u مع 4 سماعات أكسبلود وكان الصوت طبعا مش محتاج تعليق مني ... بس دلوقتي عاوز أعمل حاجة ع الضيق وقولت اجيب الكاسيت الماتسوبيشي ده ومعاه طقم أكسبلود بيضاوي وشكرااا ع كده ... فياريت الافادة بخصوص قوة ووضوح الصوت بشكل موسع شوية :)

ليه الفضايح دى ... انا مشغلاه على سماعات عاديه مجهولة الهوية
الفرق فى الصوت واضح جدا (لصالح mc81)، والصوت عالى جداً لدرجة انى مش استحمل اعلى الصوت لأخره، كان عندى قبل كدا سونى قديم، كان صوته ضعيف نسبياً وكنت لازم اجيب زرار الصوت للاخر عشان اقدر اسمع صوت مسموع وسط الدوشه

المشاركة الأصلية كتبت بواسطة kreka

مبرووووووووووووك جبتيه اخيرا d:

بس انا عندى الكاسيت مش بيقلب فولدرات .... لازم اروح اول او اخر اغنيه واقلب عشان يغير فولدر بس مفيش زرار للفولدرات زى البايو والسونى و الكينوود

اللى لاحظته ان فى اغانى فى مجلدات قدر يقراها ويشغلها

المشاركة الأصلية كتبت بواسطة kreka

وعندى لما كنت عامله على الكونتاكت كان بيمسح اى حاجه

اما موضوع الكونتاكت فاول ما الكهربائى ركبه كان بيعمل معايا كدا، لما افصل الكونتاكت بيمسح اى حاجه، فرجعت للكتالوج وخليت الكهربائى يعدل التوصيل.
فى حاجات مش هيعملها الكهربائى الا اذا قولتله عليها.
هتلاقى فى اسلاك الكاسيت سلك لونه اصفر (Battery) وفيه فيوز وسلك لونه احمر (Accessory) وسلك لونه اسود (Ground)
الاسلاك دى بتاعة الكهربا، الاسود دا طبعاً أرضى، الكهربائى كان موصل الاصفر والاحمر ببعض وموصلهم بالكونتاكت، ودا غلط، الصح: الاصفر يوصل بالبطارية (بيقولوا عليه العمومى) والاحمر هو اللى يوصل بالكونتاكت، عشان الاصفر المتصل بالبطارية مباشرة هو اللى بيحافظ على الساعه والذاكره وميمسحهمش، اما الاحمر اللى مع الكونتاكت هو اللى بيفصل الكاسيت او يشغله مع الكونتاكت.
كمان فى سلك ازرق (Remote)، دا ممكن توصله بأى حاجه متصله بالكاسيت زى (الشاشه، جى ام، اريال اليكترونى، ... الخ). السلك دا بيدى كهربا 12 فولت لما تشغل الكاسيت، وبيفصل الكهربا اول ما تطفى الكاسيت (من زرار الكاسيت مش من الكونتاكت)، يعنى لو انت سايق ومشغل الكاسيت ومدى كهربا للشاشه من السلك دا، اول ما تشغل الكاسيت الشاشه تشتغل معاه كأنها جزء منه، واول ما تطفى الكاسيت ، الشاشه هتطفى اتوماتك مع الكاسيت (الكونتاكت شغال واحنا مقربناش منه).

طبعاً كل دا موضح فى الكتالوج، لكن الكهربائى مش هيقرى الكتالوج، فلازم تقرى انت وتقوله يعمل ايه !

اتمنى اكون افدتك

**MarEgypt** · 27-12-2012 05:53 AM

ملحوظة: السلك الازرق (Remote) بيدى اشارة تشغيل مش كهربا، يعنى بتكون اشاره ضعيفه تنبه الجهاز التانى انه يشتغل، يعنى الجهاز التانى يكون فيه استقبال Remote بعيد عن دائرة الكهربا العادية بتاعته المتصله بمصدر الكهربا او الكونتاكت. (دا اللى فهمته من المقصود بـ Remote)

**MarEgypt** · 27-12-2012 06:23 AM

حجات جديده اكتشفتها مع الاستخدام

ممكن تركب كارت ميمورى SD، وفلاش و iPod فى نفس الوقت، وتقلب بينهم بضغطة زر
بيعرض صور jpg وممكن يقلب بينهم اتوماتيك كل 10 ثوانى تقريباً (Slidshow)، وممكن تعمل zoom
بيحفظ 30 محطة راديو
ممكن بالريموت تتحكم فى الصوت فى السماعات الامامية او الخلفية او اليمين او الشمال، يعنى ممكن تخلى السماعات الخلفية عاليه والامامية منخفضة او بدون صوت او العكس وطبعاً نفس الكلام للسماعات اليمين والشمال، يعنى ممكن تتحكم فى كل سماعة، او تشغل سماعه واحده بس من الاربعة.
فى خاصية Preview انه يشغل 10 ثوانى من كل اغنية (أو فولدر) ، لحين ما تختار اللى انت عايزه، ونفس الكلام بالنسبه لمحطات الراديو، بيشغل 10 ثوانى من كل محطة لحين ما تختار اللى انت عايزه
لو وصلته بشاشه، غير انها بتعرض فيديو، بتعرض اسماء الملفات والمجلدات وبياناتهم اللى موجودين على الفلاش او كارت الميمورى، ودى طبعاً بتسهل كتير جداً

**S O P H O S** · 27-12-2012 07:27 AM

ما شاء الله شكله جميل
وموضوع منسق ..

**rotanamasoud** · 27-12-2012 12:55 PM

المشاركة الأصلية كتبت بواسطة maregypt

ملحوظة: السلك الازرق (remote) بيدى اشارة تشغيل مش كهربا، يعنى بتكون اشاره ضعيفه تنبه الجهاز التانى انه يشتغل، يعنى الجهاز التانى يكون فيه استقبال remote بعيد عن دائرة الكهربا العادية بتاعته المتصله بمصدر الكهربا او الكونتاكت. (دا اللى فهمته من المقصود بـ remote)

بجد اول مره اشوف بنت بتفهم فى الكهرباء وصح الصح كمان

**MarEgypt** · 27-12-2012 01:32 PM

المشاركة الأصلية كتبت بواسطة rotanamasoud

بجد اول مره اشوف بنت بتفهم فى الكهرباء وصح الصح كمان

هههههههههههههه
مش يمكن انا مهندسة كهربا

الموضوع: تجربتى لكاسيت Matsobishi MC81 (بالصور)

LinkBack

أدوات الموضوع

عرض

تجربتى لكاسيت Matsobishi MC81 (بالصور) - انشر الموضوع فى :

-

-

-

-

-

المواضيع المتشابهه

تجربتى فى تصليح مراية الفيرنا بالصور

تجربتي لجهاز Matsobishi MC81 مواصفات بالصور و الفيديو

عايزه اشترى كاسيت صينى Matsobishi MC81 ، ممكن اشتريه منين ؟

اشتريت كاسيت Matsobishi MC81

تجربتى الكامله للأبنوس بالصور

الكلمات الدلالية لهذا الموضوع

المفضلات

المفضلات

ضوابط المشاركة