الموضوع: منقوول للافادة

الموضوع ده كان مطروح قبل كده وانا قلت انسقه واحطه هنا عشان كلنا نفيد ونستفيد
هو كان في منتدى تاني وكان بمشاركه أخي العزيز spictor
وأتمنى الموضوع ينال اعجابكم

الموضوع بدأ كالتالي (أنا طرحت الموضوع):
مطلوب من خبراء الشاهين انا شاري عربية شاهين 2004 زيرو من حوالي سنة ونص وعملت 17000 كم
قبل كده ما كانش عندي عربية وخبرتي كانت زيرو !
انا عايز اعرف من خبراء الشاهين المطلوب عمله وكل كام الف كيلو - يعني تغيير الزيوت والفلاتر والسيور - كشف على حاجة معينه - حاجه حساسة بتحتاج صيانة دورية
علما بأن مشاويرى خفيفة يعني حوالي 25 كيلو يوميا وانا بغير زيت موتو اسو كل 1500 كم تقريبا وغيرت مرة زيت الكارونه عند 10000 كم وشاف زيت الفتيس وقاللي حلو مش محتاج تغيير
اتمنى الرد قريبا للاهمية ومشكورين يا خبراء الشاهين مقدماً

رد أخ عزيز:
بص يا باشا انت بتغير الزيت على حسب النوع اللى بتحطة انا عن نفسى بحط اسو بغيرة كل الف كيلو لانى بمشى كتير ومن المفضل تغير الزيت والمتابعة با ستمرار لانة اهم حاجة ومش كل مرة تغير الفلتر خليها مرة ومرة
وتخلى بالك من السيور زى سير البور والكاتينة سير الدنمو لان الحاجات دى مهمة سير الدنمو تخلى بالك منة لانة لو مقطوع معنى كدة ان الدنمو ما بيشحنش ومعنى كدة ان البطا رية تتاكل خلى بالك منة شوف لو موشر الحرارة ارتفع يبقى من اية ولاحظة با ستمرار سير الكاتينة اهم حاجة لانة لو متغيرش العربية تجيب صبابات متخفش هى رخيصة قى الشاهين مش غالية اوى بس خلى بالك منة والحاجة التانية تخلى بالك من الفلاتر البنزين والهوار والبنزين اهم حاجة عشان العربية متبقاش مخنوقة منك وهو بيتنفخ بل الهواء او لو تعبان اوى غيرة ودة من الافضل وبردة اهم حاجة انك تقرى فى الكاتلوج بتاع العربية عشان بيبقوا كتبين حاجات خاصة بل العربية ومن المستحسن انك تقراة وعلى فكرة يجب مراعاة تغير اليوت كلها للحفاظ على اللزوجة بتاعة الزيت وخلى بالك ان الجو الحر بيضيع اللزوجة بتاعة الزين ولازم تشوف زيت الكرونة لان فى ناس بتنساة خلى بالك يعنى تكشف عليها مرة ومرة خلى بالك منها لان لو اهملتها هتتحرق ومن المستحسن انك تغير الزيت فى ورشة زيوت لان اللى فى البنزينة مش تمام اوى ودى عن تجرية شخصية لانهم مرة نسيوا يقفلوا طبة الزيت للى من تحت العربية ويارب اكون فدك فى الموضوع دة

بص يا باشا متحطش الزيوت اللى بتمشى الواحد 10000 كيلو لان فى مشكلة عند الناس انها بتنسى هى امتى جططت الزيت لازم المتابعة خليك فى الزيوت اللى بتتغير كل 1000 او 2000 كيلو وعلى فكرة التغير المستمر وعدم الحرق على الزيت بيطول من عمر العربية متبقاش خشنة معاك او صوتها يبقى وحش وخلى بالك لو العربية بترشح زيت ودى اهم حاجة خلى بالك لان معنى كدة ان الزيت بينقص يعنى تشوف من عند المطور العربية فى اثار زيت ولا لا خلى بالك وبا ستمرار تقيس الزيت هتلاقى كلمة minو maxوعلى فكرة لو الزيت كتير غلط خلى بالك لان لو نقطة زيت نزلة على البوجيهات تحرقها ولو الزيت ناقص ممكن تكون بترشح وفى الحالة دى يجب الاسراع الى بتاع الزيت او الميكانيكى ولو كانت العربية عايزة تتشحم شحمها عشان مطلعش صوت منك صوت تزييق من العفشة شحمها ومش هكلفك كتير وشوف لببيض لو عايز يتشحم والبنز اللى فى البيضة بس انت بتقول ان العربية لسة جديدة يعنى مش هتتطلب اوى معاك بس بردة تا بعها وعلى فكرة ان الزيت والمية من المبردات بتاعة العربية خلى بالم من كل حاجة فى العربية وودنك لو سمعت صوت غريب حاول تعرف منين الصوت دة ومعالجتة با سراع عشان العربية ما تفتحش بقوها معاك وخلى بالك من الموشرات اللى فى العربية الطابلوة يعنى ولمبة الزيت اهم حاجة والحرارة

رديت:
طيب ما لاقيش عندكوا كتالوج للعربية
او حتى تقولولي بيتباع فين ( لو كان ليه لزمه )

ورد أخي العزيز:
لا دى صعبة شوية لو انت عايز مواصفات العربية اجبهالك لكن الكتاب صعب ويا عم احنا بنركب عربيات تعبانة
يعنى فى الكتاب هيقولك ان العربية اتقفلت فين ومواصفتها والكماليات اللى فيها يعنى ملوش لازمة قوى
خلى يالك من جهاز التكيف لانة او مش تغلش يبوظ دة مهم جدااااا لان فى ناس بتنسى الموضوع دة هو صحيح بيهد العربية وبيسحب سنة بنزين بس لازم تشغلة مرة او مرتين فى الشهر يارب اكون نفغتك فى الموضوع دة

وهنا بدأ أخي الفاضل spictor بالاشتراك بالموضوع
بص يا عم انا عندي الشاهين بقالها 4 سنين اهم حاجة تغيير الزيت في مواعيده و علي فكره كل الزيوت الموجوده واحد يعني موبيل هو اسو هو مصر للبترول و السعر بيختلف علشان الماركه وده مش كلامي ده كلام التوكيل. و عموما خليك علي الزيت اللي جبته اول مره بعد الزيت الفابريكة اللي كان فيها و خلي بالك من مياه الردياتير و القربه و ماتسمعش كلام اللي يقولك شيل ترموستات العربيه علشان تبرد لان ده كلام علميا غلط و ضرره جامد علي العربيه وهي دايما درجه حرارتها 90 اهم حاجة لو عدت 90 المروحة تشتغل و دايما ربط العفشه في التوكيل محدش بيعرف يربط العفشه زيهم و خلي بالك من علبه الاشعال (Electric ignition)اللي في العربيه و اوعي تغير لأبلاتين و كوندينسر الميكانيكي ممكن يقولك كده علشان ميعرفش فيها بس الالكتروني احسن بكتير وسعره رخيص حوالي 90 جم و ما تزودش البطاريه مياه زودها حامض عند اي واحد بتاع بطاريات و ده عن تجربه مع الشاهين و نصيحه كمان لو ماغيرتش الكاوتش اللي جه معاها غيره. و ربنا يكفيك شرها

رديت:
1000 شكر ليك ع المعلومات القيمة يا spictor
* بالنسبة للكاوتش انا غيّرته على طول
* تربيط العفشة كل أد إيه تقريبا ؟
* الترموستات الميكانيكي شالو والعربية مش بتسخن بس بتاخد وقت على ماتوصل 60 ْ إيه هو ضرر شيل الترموستات ؟

شكرا ليك مرة تانية

رد spictor:
العفو اخي الكريم
بالنسبه لتربيط العفشه مره كل 1000 الي 15000 كم حسب ما انت تفضل
بالنسبه للترموستات هو ده اللي بينظم دورة المياه بحيث المياه ما تدخلش الموتور الا عند اكتر من 90 درجة لان 90 درجه هي الدرجة المثاليه لعمليه الاحتراق داخل المحرك و اقل من كده الاحتراق بيبقي مش مثالي يعني زي ما الميكانيكي ما يقول يبقي البنزين نيئ و ده اللي بيكون الهباب اللي بيسد الكاربيرتير لا قدر الله. ثانيا دوره المياه العامله دائما تقلل من كفاءة الموتور و الدوره نفسه و اذا جه عليك يوم حر فعلا ممكن الميه ما تبردش لانها علي طول جوه الموتور و ما بتستناش في الريدياتير علشان تبرد وده لا قدر الله اخطاره معروفه . و عموما فكر انت لما الترموستات مالهوش لازمه ليه بيحطوه اصلا. معظم الميكانيكيه فاكرين ان ترموستات الشاهين زي ترموستات اللادا بيسخن العربيه بس ده مش صحيح ترموستات اللادا بيساعد علي تشغيل السياره في درجات الحراره المنخفضه مش اكتر اما ترموستات الشاهين فمعمول علشان يحافظ علي الظروف المثاليه للاحتراق داخل المحرك. و بعدين اكيد بعد ما شيلت الترموستات ما بقيتش تسخن مع بدايه الدوارة الصبح و ده علشان العربيه ما بتسخنش اصلا. و معني كده انه كمان لاغي الشفاط الاتومتيك بتاع العربيه وده برضه معمول علشان العربيه تبتدي المشي لما توصل للحراره المناسبه للزيوت و السيور.
نصيحه روح التوكيل وقوله علي اللي الميكانيكي عمله و رجع العربيه زي ماكانت.
و ارجو ان اكون افدتك.

رديت:
كلامك مقنع جدا يا spictor ويدل على خبرة كويسة وانا فعلا هارجّع الثرموستات تاني بس لما الميكانيكي شالو قالي السبب انه بيصدي وبيسد دورة المية وده يعمل مشاكل كبيرة فشيله احسن من وجوده زي اللوز كده يعني !!

أما بالنسبة لـ .....
اقتباس:
أرسل أصلا بواسطة spictor
و معني كده انه كمان لاغي الشفاط الاتومتيك بتاع العربيه وده برضه معمول علشان العربيه تبتدي المشي لما توصل للحراره المناسبه للزيوت و السيور.


لأ انا مش لاغي الشفاط الاوتوماتيك عشان كده بأضطر امشي بالعربية وهي لسه بارده وبتبقى عاليه فترة كبيرة (لمسافة حوالي 10 كم ع الطريق) لحد ما توصل 60 درجة وتهدأ طبعا انا حاسس ان كده غلط بس برضه لما بابقى جوه البلد في الحر العربية لما بتبقى على 90 درجه باحس ان ادائها اقل من الطبيعي يعني بتكون أضعف

هل لما العربية في الزحمة توصل 90 كتير والمروحة تشتغل طبيعي يعني كده العربية مش بتسخن؟!

منتظر الردود

رد spictor:
بالعكس يا اخي العربيه لما تبقي علي 90 بتبقي مرتاحة جدا بس لان الهوا الساخن الخارج من الموتور بيسرب علي الكابينة بتاعت السواق بتحس بالحرارة و تحس انها ضعيفه. اما لو المروحة اشتغلت و في نفس الوقت سمعت صوت من تحت العربيه او الجيربوكس زي صوت شرز الكهرباء فمعناه ان البطاريه ضعيفه و المروحه بتسحب منها وعموما طالما المروحة بتشتغل اول ما العربيه تعدي ال 90 يبقي ممتاز و لو لاحظت تلاقي المروحه بعد ما تفصل الحراره 70 او 80 يبقي العربيه مش بتسخن. اما بلنسبه لحكايه الترموستات يصدي دي لو انت بتستعمل مياه من الحنفيه بس الاحسن مبرد ريدياتير من البنزينه (مياه زرقاء) ودي من مصر للبترول سعر الجركن 12 جم او ( مياه حمراء ) و دي من موبيل سعر الجركن 40 جنيه بالاضافه لاستعمال مزيل و مذيب الصدا اللي بيتباع في البنزينه علشان تنضيف دورة المياه و التبريد مع تغيير مياه الردياتير.

رديت:
شكرا ليك على كلامك الجميل أخي العزيز
المروحة فعلا بتشتغل عند 90 وتفصل عند 80
وانا ما باحطّش ميه من الحنفية ابداً في الردياتير ميه مقطرة بس ومانع صدأ



رد spictor:
اللي احسن من المياه المقطره المبرد اللي قلتلك عليه و جرب و حاتدعيلي

رديت:
هو انا مرة اشتريت مانع صدأ مركز ( اخضر امريكي ) وضيفته للرادياتير وكنت باشوف جراكن زرقاء وكده يعنى بس الصراحة ماكنتش بفهم هما ليه كمية كبيرة كده
بس هل الأحسن الأغلى والا الفرق بسيط في النتيجة ؟!



رد spictor:
و الله بيقولو ان الاحمر ( انتاج موبيل) احسن بس حتي الان بعد تجربه مش ملاحظ فرق يذكر اكتر من انه مش بيكون ريم في القربه و بيحافظ علي لونه (يعني بيحافظ علي الدورة من الصدا) اما بالنسبه لدرجة الحرارة فهي واحده


رديت:
أنا مش عارف أشكرك إزاي يا spictor على ردودك الجميلة والمفيدة
إنت بجد أفدتني كتير أوي بخبرتك الحلوة دي

سؤال كمان ( لو مازهقتش !!)
المساعدين واليايات ايه ظروفهم، في ناس قاليتلي غير اليايات ببتاعه 131 ها تخلي العربية اريح الكلام ده مظبوط ؟
والمساعدين ممكن تتغير بعد أد إيه مع العلم ان الطرق اللي بمشي فيها مش حلوة (معظمها مش متسفلت!) بس انا بمشي على مهلي في المطبات وباحاول افاديها بقدر الامكان

شكرا ليك مرة تانية

رد spictor:
يا اخي العفو امال احنا هنا ليه علشان نساعد بعض.
موضوع اليايات ده اولا الشاهين قدام في 2 مساعد بيايات و ورا 2 مساعد بدون يايات و كل المساعدين الماني اصلي وممكن تكشف عليهم بنفسك بأنك تضغط علي كل مساعد و تشوف رد فعله يعني زي ماتكون بتمرجح العربيه و لو لقيت واحد منهم مش بيرد معاك ابقي اكشف عليه بس الصراحة مساعدين العربيه ممتازين و بعدين الشاهين اصلا تركي و حاليا مفيش حد بيصنعها علي مستوي العالم غير مصر. و ال 131 ايطالي اصلا يبقي ازاي مساعدين ال 131 تركب عليها و بعدين انا شوفت عربيه اتعمل فيها كده بقت واطيه جدا لان مساعدين ال 131 قصيرين علي البودي بتاع الشاهين.
عموما المساعدين بتتغير بعد لا قدر الله ما يتكسر واحد فيهم او يبتدي يسرب زيت ساعتها تغير المساعد فوري و ما تسمعش كلام الميكانيكي اللي يقولك اكبسه زيت لانه بيعمل فتحه في جنب المساعد ( المفروض انه مصمت) و يعملها طبه و كل ما المساعد يسرب يديله زيت يعني تبقي فاتح حساب جاري عند الميكانيكي و كمان حايتعبلك العفشه.
و ان شاء الله طول ما انت بتهدي في المطبات و واخد بالك ماتقلقش لأن الشاهين عربيه عفيه زي اللادا.

رديت:
شكرا على كلامك الجميل يا spictor
في موضوع افتكرته !
ايه رأيك في موضوع البوجيهات التلاتة شمعة والكابلات الاسبور الجرافيت؟ هل فعلا بيفرق في الأداء ويستحق الواحد يعمله والا ايه ظروفه؟
وبرضه فلتر الهواء الاسبور ؟

منتظر منك الرد

رد spictor:

و الله يا اخي معتقدش ان موتور الشاهين يستحمل الحاجات دي لانها كلها بتحتاج مواتير ذات طبيعة خاصه من حيث احتمال غرفه الاحتراق لدرجات حرارة عاليه و لو استحمل فتره اعرف ان انت قصرت عمره. اما فلتر الهواء الاسبور فصعب تركيبه لأن حجمه كبير و مالهوش مساحه مع الموتور و خلي بالك برضه مش اي حد يلعب في الموتور.


رديت:
شكرا على ردك يا spictor
أنا مرة كنت طالع من ملف ع الطريق وكان فيه عربية شاهين ورايا وطلع مني طلعة جامدة أوي مع اني كنت دايس جامد . . . تفتكر إيه اللي ممكن يكون عاملة عشان يطّور أداء عربيته كده ؟! وسمعت إيه على volumex ؟!
هو أنا مش من هواة السحب والغرز بس من باب العلم بالشيء !!

شكرا ليك مقدماً!

رد spictor:
و الله ممكن يكون مش عامل اي حاجة في العربيه اكتر من انه فتح الموتور و موو الله ممكن يكون مش عامل اي حاجة في العربيه اكتر من انه فتح الموتور و موضوع فتح الموتور ده يحتاج منك انك تاخد الطريق الصحراوي رايح جاي و انت قارص علي العربيه جداً لغايه ما تجيب اقصي سرعة ليها و دي تبقي في حدود 140-150 كم الي 180 وده بيبقي فيه خطورة من ناحيتين من ناحيه السرعة طبعا و من ناحية الضغط علي الموتور عموما الموتور علي ما انت تعوده لو انت اساسا بتسحب بسرعة حايتعود علي السرعة و لو بتمشي في وسط البلد كتير يبقي حايتخنق منك.
بالنسبه للاخ بيانكو الدوجن عربيه ممتازه بس اهم حاجة كمبيوتر الاعطال اللي في التابلوه يبقي شغال و مايكونش فيها بارومه لأنها بتلقط بارومة بسرعة. اما موضوع السعر ده ما اقدرش افيدك فيه.



رديت:
أنا مش عارف أقول إيه يا spictor على آرائك الجميلة والمفيدة والسريعة و....
انت كلامك خلىّ الموضوع قيّم ومفيد فعلا وبقى أحسن موضوع عن الشاهين بجد

أما بخصوص "الموتور على ماأنت تعوده" انا أقصى سرعة مشّيت العرية عليها كانت حوالي 110 كم بس وعامة مش بازّود عن 80 - 90 على طول على الطرق السريعة . هل معنى كده ان أداء الموتور بيقلّ والا ايه بالظبط؟ يعنى لو حاولت امشي على سرعة اكتر من 110 مثلا هل ده هيبقى عادي ع الموتور والا ممكن يبقى فيه مشاكل ؟!

أشكرك 1000 مرة تاني يا spictor



رد spictor:
و الله يا اخي المفروض التوكيل لما بتشتري العربيه بيقولك امشي اول 1500 كم علي سرعة 60 ماتعديهاش و بعدين تعالي غير زيت و فلاتر و ابقي لينها بعد كده و اطلع بيها الصحراوي بس الواضح انك ما عملتش كده فا الحل انك تبدأ تعود العربيه علي سرعات اعلي بس بالتدريج و عودها علي تقليل زمن التسارع بين النقله و النقله يعني ايدك و رجلك يتحركو بسرعة علي الفتيس و الدبرياج و عموما ده اسلوب سواقه مش عيب في العربيه. بس حاول كل ما تيجي فرصه انك تعدي بيها ال 110 حاول بس لوقلبك سليم و بتقدر تتحكم فيها كويس غير كده ما انصحكش و طالما بتجيب معاك 110 فا تبقي كويسه جدا و عموما هي الشاهين ال Default بتعها 110 اما اكتر من كده بتبقي مهاره سواقه و ضغط عالي علي الموتور.
نصيحة طالما بتمشي كويس و مقضيه غرضها ما تلعبش فيها علشان ما تروحش منك خالص.


رديت:
كلامك سليم يا spictor طالما مقضيا الغرض كده والواحد مش هايخش بيها رالي الفراعنة وحلو موضوع الـ Default ده ههههههههه
لكن موضوع ماعديش الـ 60 في أول 1000 كيلو دي ما كنتش اعرفها بس ما كنتش باعدي الـ 80

إيه رأيك في موضوع الجنوط الكبيرة والكاوتش العريض ( 15أو16 و 185أو205) هل بتزوّد الـ Stability لكن بتقلل الـ Acceleration وهل ليها تأثير على عمر وحالة الموتور ؟
منتظر الرد

رد spictor:
عموما الكاوتش و الجنوط ليس له تأثير كبير علي المحرك لكن الكاوتش العريض عن العربيه ( البارز يعني) يؤثر في نظام التعليق و التحكم يعني له تأثير علي المساعدين و السوست امامي و خلفي و بيض و علب الدركسيون اما الجنوط فليس لها تأثير يذكر علي اداء السياره و عموما لو ركبت جنوط خلي بالك ان فيه منه صناعة تحت بير السلم و داخله زهر كتير و ممكن يكسر في المطبات فلما تشتري اشتري من مكان موثوق فيه اما الكاوتش فحاول متعرضهوش عن اللي جاي مع العربيه علشان متعومش منك في الملفات و مافيش احسن من الكاوتش البيرللي الايطالي و يساويه البريدجستون الياباني.


رديت:
شكرا ليك ع المعلومات الجميلة
سؤالي المرة دي هو عن الكهرباء يعني إيه يغّير كهربة العربية ويعني إيه الكهرباء عالية ؟

رد أخ عزيز:
لو الكهرباء عالية ممكن يكون فى عيب فى البوجيهات اما لو الكهرباء عايزة تتغير فدة ممكن يكون الضفيرة بتاعة العربية فيها شغل
ودى قصة تانية لان الصنيعى بياخد العربية من واولها لاخرهااا



رد spictor:
الكهرباء عاليه هو مصطلح يعني ان نسبه فقد الكهرباء داخل غرفه الاحتراق في الموتور عاليه بمعني ان علبه الاشتعال الالكتروني (electric ignintion) الموجوده بالسياره تعطي نبضات الاشعال اما اسرع من اللازم او ابطأ من اللازم. فيتم تفريغ الشحنه الزائده في الارضي من اسفل السياره و عموما في الشاهين تسمع علي هيئه صوت اسفل الجيربوكس عند السرعات العاليه من 70 و طالع.
و التغير في نسبه الكهرباء طبيعي بعد كل تغيير للزيت و كل ضبط للمحرك وكل تغيير للمياه لأن كل تغيير الموتور يستلزم اعاده ضبط المحرك ليتوأم مع التغيير الجديد و لا اعني عمره موتور بل ضبط سريع (من المسمار الموجود اسفل الكربرتير). اما تغيير طقم الكهرباء فيعني تغيير البوجيهات و ايضا كان يعني قديما تغيير الابلاتين. ارجع و اذكرك بأن العربيه فيها (electric ignition) و مش اي كهربائي حايعرف فيها و لا يفهم فيها و ممكن كل العلو ده علشان العربيه بارده شويه مش اكتر. و اوعي تسمع كلام الكهربائي لو قالك اغير ابلتين و كوندينسر يبقي مش عارف حاجه.


رديت:
كلام سليم ومنطقي
طيب سؤال تاني
لما بأحاول ازود سرعة العربية أكتر من العادي ( أدوس جامد وأنا طالع من عربية مثلاً ) بأسمع صوت طقطقة خفيفة ( نادر سماعه يعني مش العادي ) والصوت ده برضه بأسمعه في عربيات 132
الصوت ده عباره عن إيه وهل هو عادي واللا في عيب في حاجه معبنه ؟!

سؤال شبيه بالمرة افتكرته !
لما العربية تكون واقفه وجيت اطلع وكانت واقفه على طوبة او مطلع جامد أحيانا بأسمع صوت حديد بيطقطق !! أو بيرن كده وده كنت بأسمعه أكتر وأنا لسه بأتعلم لما كانت العربية بتنطر مِنّي

سلام

ورديت:
سؤال بخصوص السمكرة والسؤال بخصوص السمكرة والدوكو
الرفرف الأمامي ايه نظامه ؟!
لو عايز اعملـّه سمكرة من فوق (الحرف العلوى) هل ممكن يتفك ويتصلّح ويتركب تاني والا ملحوم ؟؟
وايه تكلفة تغيير الرفرف ورشّه ؟



رد spictor:
اسف جدا اني ما رديتش بدري عليك اصلي ماجليش تنبيه علي الايميل

اولا موضوع الطقطقه الخفيفه مع الزياده المفاجئه في السرعة ده نتيجه لزياده الكهرباء و الصوت ناتج عن تفريغ الكهرباء اللي تكلمت عنه في ردي الاخير

اما بالنسبه للحديد اللي بيرن ده لو الصوت اختفي ممكن انه اما المساعدين كانو بيلينوا او ان الكوريك بتاع العربيه مش متثبت في مكانه في الشنطه كويس
اما لو لسه الصوت موجود فأنصحك تبص علي المساعدين و علي جلب المقصات

اما بالنسبه لموضوع السمكره و الدوكو فا الرفرف ممكن يتفك عادي لأنه مربوط بمسامير (لو بصيت في المجري اللي تحت الكبوت يمين و شمال تشوفهم) بس الفكره في العازل اللاصق بتاع الفبريكه اللي حتي التوكيل هنا معندوش منه اما بالنسبه للفخده البلاستيكك فدي بتتباع ب 60 جنيه الجوز.
اما تغيير الرفرف و رشه صراحة معرفش يتكلف كام

رديت:
شكرا ليك على ردك يا spictor وانا برضه مش بيجيلي تنبيه ع الميل من فتره بسيطه

بالنسبه للعازل ايه المشكلة لو الرفرف اتفك واتصلّح واتركّب من غير العازل ده؟ يعني ايه الميزة اللي بيقدمها ؟

شكرا ليك مرة تانية


رد spictor:
واللهي العازل ده له وظيفه و احده هي المحافظة علي تماسك اجزاء السياره يعني بيشتغل زي السوسته كده بدل ما المطبات العربيه تحمل عزمها علي المسامير المربوطه قوم تتحل فا العازل ده بياخد الصدمات بدل المسامير عاوز تشيله مش مشكله و مش هايفرق كتير

ورد أخ فاضل:
ده كلام هايل احييكم عليه
و يا ريت لو في حاجة تانية بخصوص العفشة تقولهالنا
يعني لو في أصوات مميزة لمشاكل معينة
و الف شكر



رد spictor:
واللهي موضوع العفشه ده معنديش فيه خلفيه بس ما اعتقدش العربيه ممكن تتعب عفشتها قبل 10 سنين طالما بتربطها من تحت كل 5 الي 10 الاف كيلو و بتشحم و مش بتلعب فيها من تحت فاتعيش معاك. و نصيحه ساعات الواحد و هو ماشي بالعربيه يلاقي حد بيشاورله و يوقفه و يقوله ان العفشه او المساعد او الكرونه شايف فيهم حاجه. ماتسمعش كلام اي حد الا اذا كان متخصص.
وربنا يكفيك شرها و يزيدك من خيرها.

مع تحياتي


رد أخ فاضل:
لا مش كويس بصوا زيت موبيل ده انسوه خالص خالص غيروا لزيت شل ده بيتغير كل 3000 كيلو وتمنه حوالي خمسين جنيه زيت حلو ومعمول خصيصا للمواصفات المصريه انما زيت موبيل في الصيف بيبقي عامل زي الميه يعني مالوش لزمه حاجه تانيه يا عمنا يا بتاع الشاهين كل فتره روح اعمل كشف في بنزينه محترمه لو العربيه غاليه عليك اوي وكمان لو عايزتحافظ علي موتور عربيتك اسال علي زيت فلاش كل حوالي اربع او خمش شهور حط الزيت ده في العربيه الزيت ده بيغشل الموتور وينضفه وغير الزيت والفلتر في المره دي وان شاء الله هايبقي الموتور زي ما العربيه خرجت من الوكيل ان شاء الله وتتربي في عزك ويكفيك شرها ويرزقك بخيرها

وتربو ايه يا عم علي موتور الشاهين انت فاكر نفسك راكب بورش التربو تمنه هنا في مصر حوالي الفين جنيه ده اولا وثانيا موتور عربيتك ما يستحملش التربو ولا كمان يستحمل النيتروس يعني هو كده كويس بدل وانت ماشي تلاقي عربيتك موتورها يسيح منك وتلاقي العربيه بتنقط حديد ولا الومنيا وهيا ماشيه انسي التريبو ولا حتي ينفع علي الهيونداي لا الاكسنت ولا الفريان انت تبتدي تفكر في التريبو ده من اول الهوندا سيفيك وانت طالع يعني اقل موتور ينفع التربو يركب عليه هو 1600 وانت طالع ويكون موتور محترم وكمان الشاهين بتسخن لو حدها انت ناقص
خلي عربيتك زي ماهي عشان تعيش ثم الحاجات دي بتنقص عمر الموتور بطريه بشعه عشان دي بتهلكه وبترفع درجه حرارته جدا جدا ثم مش هاينفع عندك ولا حد كويس بيركب التربو في مصر

رد spictor:
يا اخ سامح زيت الفلش ده Flush oil ده نوع من الزيوت بيبقي خفيف جدا زي الل WD40 كده وظيفته انه يدخل الموتور و الكاتينه و يسحب الرايش الناتج عن عمليه تأكل الموتور خلال التشغيل و بعدين ينزل بالرايش كله. و الانواع النظيفه من الزيت ده متلاقيهاش عند اي بنزينه لازم تكون بنزينه نظيفه اووي زي ما فيجو قال. و بعد وش النظافه ده تغير زيت و فلتر زي ما قلتلك قبل كده
اقتباس:
أرسل أصلا بواسطة spictor
بص يا عم انا عندي الشاهين بقالها 4 سنين اهم حاجة تغيير الزيت في مواعيده و علي فكره كل الزيوت الموجوده واحد يعني موبيل هو اسو هو مصر للبترول و السعر بيختلف علشان الماركه وده مش كلامي ده كلام التوكيل. و عموما خليك علي الزيت اللي جبته اول مره بعد الزيت الفابريكة اللي كان فيها





رديت:
دايما ردودك متميزة يا spictor شكرا ليك بس معلش وضّح أكتر
بكام تقريبا وأعمل العملية كل أد إيه وإزاي تتعمل

رد spictor:
نوضح شويه : اي زيت موتور مش بيزيت 100% و لازم يبقي في نسبه تأكل في الموتور و الناتج بيبقي رايش معدني بينزل في الكاتينه مع الزيت وممكن لا قدر الله يخدش وش السلندر. طيب نخلص من الرايش المتراكم ازاي؟ عن طريق زيت التنظيف flush oil ده زيت خفيف اووي و حمضيته اعلي من الزيوت العاديه (طبعا اساسا الزيوت هي احماض عضويه) فا بيعمل نفس عمل عمره الموتور و بيشيل الرايش و بينعم الموتور من جوه علشان الاحتكاك يخف بس في انواع مضروبه كتييير منه وممكن تاكل وش السلندر او علي الاقل تضرب الجوان فا علشان كده مش بنصح بيه انما لو عاوز تعمله اعمله بس في بنزينه نظيفه اوووي علشان يكون نوع اصلي و مستورد و يكونوا يعرفو فيه. ان ما امكنش مش مشكله لأن عربيتك اساسا جديده و لسه ما تكونش عملت رايش و ده مش قبل 6 - 7 سنين.

رديت:
100 100 يا spictor

طيب نخش في موضوع جديد وهو تلميع العربية والحكات وكده يعني



رد spictor:
مشكله المشاكل من بدايه وجود العربيات علي وجه الارض هي الخبطات و الحوادث و في احيان اخري تسمي حكه و هي الحاله الخفيفه للخبطه (كان ممكن تبقي خبطه لولا ستر الله) و الحكات انواع (Trade paint ) و في هذا النوع ينقل لون احدي السيارات الي الاخري عن طريق تبادل الدهان كما هو واضح من الاسم. علاج هذا النوع هو عن طريق البوليش. النوع الثاني من الحكات هو (scratch) اي خربشه بمعني زوال الدهان من علي سطح السياره و هذا لا يمكن علاجه بالبوليش و انما هناك سوائل مخصصه لهذا النوع حسب اللون لتعويض الفاقد من الطلاء و ان كان افضل حل لهذه الحالات هو الدوكو الجديد.

البوليش هو كريم يستعمل اساسا لازاله اثار الحكات كما اوضحنا من قبل لكنه له درجات متعدده من (soft ) الي (Hard) و هو اساسا يعمل نفس عمل الصنفره . بمعني اخر هذا الكريم بوضعه علي اصابعك و تفحصه تجد انه يحتوي علي حبيببات صغيره جدا و كلما زاد عددها كلما اقترب البوليش من درجه ال (Hard). و يستعمل ال (Soft ) الذي تقريبا لا يحتوي علي حبيبات في تلميع السياره لازاله اثار الغبار المتراكم فكما نعلم انه لايوجد طلاء املس 100 % و انما هو ملئ بالنقر الصغير التي لا تري و هي اصغر مساميا من الماء لهذا من الصعب تنظيفها به و تنظف بالبوليش.

طيب كيف احمي سيارتي اساسا : اقول بعد غسلها و تجفيفها و تلميعها اول مره بالبوليش و عوده لونها الطبيعي قم بشراء احد انواع الشمع الخاص (Wax) و اذيبه في ماء ساخن و امسح به السياره ليسد مسام الطلاء فلا يتراكم عليها الغبار. و حاول قدر الامكان تقليل استخدام البوليش لانه يفعل بالطلاء كما يفعل السمكري حين يغسل السياره باستخدام الصنفره الناعمه و الماء و مسحوق الغسيل قبل رش السياره.

ارجو ان اكون قد وفقت في توصيل المعلومة

مع تحياتي

رديت:
تمام يا spictorتمام يا spictorتمام يا spictor
طيب ادينا فكرة عن تكلفة التلميع والشمع وايه الاماكن الكويسة وكده يعنى
ولك جزيل الشكر مقدما


رد spictor:
بصراحه معنديش فكره عن التكلفه خالص لاني بلمع عربيتي بنفسي و الحمد لله ثانيا بالنسبه لاسعار لوازم التلميع البوليش المصري حوالي 6 - 8 جنيه و المستورد 23 -30 جنيه و الشمع المستورد من 17 - 27 جنيه .
اما بالنسبه للاماكن برضه معنديش فكره لاني مش عايش في القاهره .


رديت:
طيب يا spictor تنصحني اجرّب اعمل الموضوع ده لوحدي والا بلاش ؟!
ولو سهل يا ريت تشرحلنا بالتفصيل الطريقة والتوقيتات يعني كل حاجة ياريت

1000 شكر ليك مقدما


رد spictor:
لو فاضي في يوم و ما وراكش حاجه اعملها بنفسك احسن علي الاقل تبقي ضيعت و قتك و كمان كأنك لعبت رياضه
و في نفس الوقت مين حاياحفظ علي عربيتك اكتر منك.

الطريقه بالتفصيل:

-اولا كل ما سنفعله يجب ان تقوم به في مكان مظلل اي لا يوجد به شمس.
- اغسل العربيه غسله محترمه (الادوات: جردل مياه + صابون سيارات (الصابون السائل المخصص للاطباق يأكل الطبقه اللامعه العليا لطلاء السياره) + قطعه قماش من القطن و يفضل ان تكون ناعمه.
- بعد الغسيل جفف السياره بقطعه قماش قطنيه ناعمه.
- بعد ذلك استعمل البوليش علي جميع اجزاء السياره (ما عدا الكاوتش و الحلي البلاستيكيه و الزجاج) حسب تعليمات الاستخدام الموجوده علي علبه البوليش.
- بعد انتهاء مرحله البوليش قم بعمل الاتي احضر جردل به مياه ساخنه و ضع فيه مقدار غطاء او غطائين من زجاجه شمع السيارات السائل و قلبه جيدا ثم قم بشطف السياره به حتي يدخل الشمع في مسام الطلاء بعد تنظيفه بالبوليش ثم جفف السياره

و هكذا تكون قد انتهيت

لا تكرر البوليش كل مره تغسل فيها السياره و لكن كرر التشميع وممكن ان تكرر البوليش كل 3 - 4 شهور.

ارجو ان اكون وفقت في توصيل المعلومه و بالتوفيق


رديت:
طيب سؤال تاني كده ع السريع!

السلانسيه بتاع العربية دي Rpm كام بالظبط : 700 ولا 800 ؟!


رد spictor:
السلانسيه 700 يا سامح و لو الموتور مظبوط بعد التسخين تلاقي الشكمان بيجيب ميه كتيير زي الحنفيه و تسمي هذه العمليه تعريق موتور

مع تحياتي

رد أخ عزيز:
يا جماعه هل كاربراتير الفيات تيبو بيركب على الشاهين ولا



رد spictor:
لا اعتقد ان كاربرتير الفيات يركب علي الشاهين

عموما الشاهين تحوي موتور (Lancia) لانشه بالعربي و هو من اجود الانواع و اعتقد له كاربيرتير خاص به.

عموما اسأل البائع قبل الشراء ان كان هذا الكربرتير يصلح للموتور اللانشه.

ورد أخ عزيز:
بصراحة موضوع جميل جدا
عندنا عربية شاهين موديل 2005 بصراحة لما جينا نجيب العربية مكنتش عايز نجيب شاهين خالص بس الوالد هو الي صمم عليها لأن للأسف والدي مش من النوع الي بيهتم بالعربية قوي و عايز حاجة يبهدل فيها و خلاص فالعربيات الحديثة مش هتستحمله بس مع الوقت بدأت اقتنع بيها و احبها و الموضوع دة زود اقتناعي بيها و نفسي اخدها اورق عليها شوية و اهتم انا بيها بس لو الوالد بس يرضي يسبهالي شوية ( خايف من حركات الندالة بتاعتي )
تحية خاصة ليك و للأخ spictor و الف شكر علي المعلومات القيمة دي

عندي كام سؤال كدة الشاهين كل فترة بتغير شكل التابلوة من جوة و بتحاول تحسن شوية علي العربية لكن للاسف الشكل الخارجي زي ما هو الي هو تصميم الفيات ريجاتا من ايام التمانينات , يا تري شكرة توفاس بتفكر في تطوير شكل الشاهين الخارجي و لا لأ ؟
سؤال تاني اية الفرق و الأختلافات بين موديلات الشاهين بالذات الموديل الي عليه الشعار الجديد شعار الصقر و الشعار القديم حرف الT و هل هي اختلافات كتيرة و لا بسيطة و لا مفيش خالص ؟؟

و شكرا


رديت:
أهلا بيك ياباشا وشكرا على مشاركتك
ربنا يباركلكم في العربية

بالنسبة لادخال ادخالات خارجية ع العربية : ماعتقدش للأسف لأن ده بيتكلف كتير وهما راضيين بيها كده
وبالنسبة للشعار: الجديد اللي هو النسر: العربية حقن الكتروني Electronic Injection وبتلاقي مكتوب ورا ع الشنطة &#;ahin 1.4 i.e. وطبعا في شريحة كمبيوتر
أما الشعار القديم: حرف الـ T : كاربراتير وبيبقى مكتوب ع الشنطة &#;ahin 1.4 S أو &#;ahin 1.4 SL لو بالكماليات

لحد هنا وانتهي الحوار وأتمنى يكون الموضوع عجبكم وأفادكم
ومنتظر مشاركاتكم