افيدوني على وجه السرعة بليز

**alnashar** · 28-12-2012 11:02 AM

من ساعة ما جبت العربية و فيها حاجة غريبة , لما ادورها و اطلع بيها قبل ما ادي التاني او لما اوصل لسرعة 20 كم الاقي لمبة الabs نورت و في الاثناء دي قبل ماتنور اللمبة و صادفت اني هديت و دست فرامل بلاقي احساس دواسة الفرامل تحت رجلي غريب اكنك دست على الهوا و تلامس حديد في حديد بعدها بس بعد ما اللمبة تنور بيروح الاحساس ده من الدواسة ,..... و بعدين فيه حاجة كمان , العربية سحبها تقيل قوي و سرعتها على الخامس مش جايبة اكتر من 120 مع الدوسة العادية و على السرعات البطيئة بتكركر زي ماتكون بتجر حاجة بيها او محملها مع اني دايما ببقى لوحدي سايق

ياريت تقوللي ايه رأيك في الكلام ده و تنصحني بايه لما اروح التوكيل , و اروح انهي توكيل مع العلم ان العربية عاملة 2800 كيلو بس

**osaa92003** · 28-12-2012 11:12 AM

حضرتك تروح فورا الى التوكيل ده مش موضوع بسيط ولازم تروح مركز خدمه رئيسى وماتمشيش الا لما تتاكد ان كله تمام

**khaled_Saga** · 28-12-2012 01:19 PM

1. بالنسبة للفرامل واضح كده ان فيه مشكلة فى الاى بى اس لأن احساس الهوا بعدين حديد فى حديد ده معناه ان الاى بى اس بيشتغل من اقل دوسة وده سلوك مش طبيعى للعربية وكمان لما تدوس واللمبة بعدها تنور ده دليل على وجود مشكلة فى الاى بى اس .. وارد يكون كنترول الاى بى اس عايز يتغير .. الموضوع مقلق بس متخافش لو روحت التوكيل وطلعت المشكلة فى الكنترول ده بيتغير على الضمان
2. الكركرة على السرعات البطيئة خصوصا على الغيار التانى من سمات الام 11 (بتاعتى) لأن وزنها تقيل ودبرياجها واطى يعنى عايز حساسية كبيرة فى رجلك وتوازن بين دوسة البنزين والدبرياج ده اضافة لسوء جودة البنزين المصرى حتى لو كان 92
3. ضعف السحب وارد يكون بردو عيب بنزين او ان العربية لسه فى الاول وعاملة 2800 كم ومتنساش ان دواسة العربية دى كهربا مش واير زى اللانوس مثلا .. قولى انت بتدوس الدواسة للاخر على الخامس ومش بتعدى 120؟؟ كمان طبيعة الطريق اللى بتمشى عليه بتتحكم فى الموضوع ده يعنى مثلا انا فيه طرق بجيب الدواسة للاخر والعربية مترضاش تعدى 120 او 130 لو الطريق مش كويس او طالع لفوق شوية وفيه طرق تانية زى الصحراوى جبت عليها 180 وكنت محمل ومشغل التكييف وطريق العين السخنة جبت عليه 185 كنت انا والمدام بس واحيانا على نفس الطريق كانت العربية مش بترضى تعدى ال 140 على نفس الطريق

عموما انت لازم تروح التوكيل وتقول كل مشاكلك ومتقلقش كله يتحل ان شاء الله انت قلقان بس عشان العربية لسه جديدة صدقنى متقلقش.
انا ملاحظ ان حضرتك مقيم فى اسيوط انا معرفش ايه اقرب توكيل لاسيوط لكن لو كنت فى القاهرة كنت هنصحك بمركز خدمة ال كيلو 32 مصر اسكندرية الصحراوى.

**alnashar** · 28-12-2012 08:52 PM

شكرا يا باشا على التوضيح , انا فعلا لما رحت توكيل اسيوط في صيانة ال 1000كم قولتلهم على موضوع الفرامل و قالولي في حساس عايز يتغير بس مش موجود الصيانة الجاية نعمله , و حسيت انهم مالهمش فيها فمش عايز الروحلهم تاني

المشكلة اني من اسيوط و لو رحت القاهرة مش عايز ابيت عايز اخلص في نفس اليوم , فهل بتصل بيهم احجز الاول ولا ايه ؟

**hugan** · 28-12-2012 09:13 PM

المشاركة الأصلية كتبت بواسطة alnashar

شكرا يا باشا على التوضيح , انا فعلا لما رحت توكيل اسيوط في صيانة ال 1000كم قولتلهم على موضوع الفرامل و قالولي في حساس عايز يتغير بس مش موجود الصيانة الجاية نعمله , و حسيت انهم مالهمش فيها فمش عايز الروحلهم تاني

المشكلة اني من اسيوط و لو رحت القاهرة مش عايز ابيت عايز اخلص في نفس اليوم , فهل بتصل بيهم احجز الاول ولا ايه ؟

اكيد حساس ال abs
فيه مشكله ومحتاج تغيير
ومش بعيد سبب البطيء في السحب ان الفرامل نتيجه تلف الحساس بتقفش

الموضوع بسيط جدا ولا داعي للقلق
لو هاتيجي القاهره
فرع العباسيه بدون حجز
لكن لازم تكون امام باب التوكيل الساعه 7 صباحا علشان تاخد اول رقم او التاني بالكتير

**hugan** · 28-12-2012 09:15 PM

المشاركة الأصلية كتبت بواسطة alnashar

شكرا يا باشا على التوضيح , انا فعلا لما رحت توكيل اسيوط في صيانة ال 1000كم قولتلهم على موضوع الفرامل و قالولي في حساس عايز يتغير بس مش موجود الصيانة الجاية نعمله , و حسيت انهم مالهمش فيها فمش عايز الروحلهم تاني

المشكلة اني من اسيوط و لو رحت القاهرة مش عايز ابيت عايز اخلص في نفس اليوم , فهل بتصل بيهم احجز الاول ولا ايه ؟

اكيد حساس ال abs
فيه مشكله ومحتاج تغيير
ومش بعيد سبب البطيء في السحب ان الفرامل نتيجه تلف الحساس بتقفش

الموضوع بسيط جدا ولا داعي للقلق
لو هاتيجي القاهره
فرع العباسيه بدون حجز
لكن لازم تكون امام باب التوكيل الساعه 7 صباحا علشان تاخد اول رقم او التاني بالكتير

**alnashar** · 28-12-2012 11:06 PM

و الله الواحد مش عارف يشكركم ازاي , حاجة اخيرة , بالنسبة للفيتيس و الزيت بتاعه , فيه واحد كان قال انه لازم نغير الزيت اللي جاي بيها في اول صيانة , هل صحيح الكلام ده ولا ايه ؟ خصوصا ان العربية صوتها عالي

و كمان فيه دبدبة بسمعها جاية من ورا في المطبات و النقر الصغيرة , يا ترى دي من ايه ؟

**AMGAD1521977** · 29-12-2012 01:56 AM

المشاركة الأصلية كتبت بواسطة alnashar

و الله الواحد مش عارف يشكركم ازاي , حاجة اخيرة , بالنسبة للفيتيس و الزيت بتاعه , فيه واحد كان قال انه لازم نغير الزيت اللي جاي بيها في اول صيانة , هل صحيح الكلام ده ولا ايه ؟ خصوصا ان العربية صوتها عالي

و كمان فيه دبدبة بسمعها جاية من ورا في المطبات و النقر الصغيرة , يا ترى دي من ايه ؟

اولآ تحياتى لحضرتك و مبروك للعربية حابب اقول لك بالنسبة لزيت الفتيس ما تقلقش منه انا معايا اختها ال 516 و فى صيانة ال1000 ما غيروش غير زيت الموتور و زيت الفتيس بيتغير كل 50.000 الف اما صوت الموتور العالى فده عشان العربية تعتبر لسه فى مرحلة التليين ( الموتور لسه جديد ) و بالنسبة لصوت الدبدبة فقولهم فى التوكيل عليه يراجعوا على العفشة و ما تنساش برده ان العربية لسة عفشتها جديدة و ده عادى و كل شىء حيبقى تمام ان شاء الله و ما تنساش بعد ما تعدى ال 5000 الاف الاولى ابدء احكم على العربية و حالتها على ما تكون عملت تليين للعربية و تحياتى لك