فلتر هواء الاسبور..

**start_wow** · 30-12-2012 11:04 PM

مساء الخير
دلوقتي الواحد احتار بين الفلتر هواء الاسبور..فيه اللي بيقول بيجيب نتيجة كويسة مع العربية وبيحسن من الاداء وفيه اللي بيقول ولا ليه تلاتين لازمة في العربية غير انه بيلم تراب وبيضخم صوت العربية وبس..عايزين القول الفصل في الفلتر هواء الاسبور ده..
حد يقدر يفيدنا عنه اذا كان ليه لازمة ولا مالهوش لازمة غير تضخيم الصوت؟

**Chemist Shehap** · 30-12-2012 11:44 PM

متابع

**MohammedAladel** · 30-12-2012 11:59 PM

من ناحية يزود الأداء أنا أعرف إنه هيزوده فعلا بس حاجة بسيطة ..... هو ليه طريقة معينة للتنظيف ... هيزود استهلاك البنزين نسبياعند الحرق واستهلاك زيادة مع السرعات بجانب الصوت العالى ...... يعنى الفلتر الستوك أفضل ... دا اللى قرأته هنا لكن مش متأكد من صحة الكلام لأنى مجربتش الفلتر الرياضى ....

**khalid_adel** · 31-12-2012 12:27 AM

لو حطيته في المكان الصح وهو انه ياخد هوا بارد من خارج العربيه وليس الهوا السخن اللي جنب الماتور زي مااغلب الناس بتركب علي كده وخلاص وبص الله صوته حلو وجميل ازال :)
لو ركبته صح حتاخد فايدته وهو عامه مش بيعلي صوته غير لما تكبس بنزين لكن لو بتدوس بالراحه محدش حياخد باله انك مركب فلتر ونفس الكلام في البنزين طبعا

**Ahmod** · 31-12-2012 12:36 AM

المشاركة الأصلية كتبت بواسطة khalid_adel

لو حطيته في المكان الصح وهو انه ياخد هوا بارد من خارج العربيه وليس الهوا السخن اللي جنب الماتور زي مااغلب الناس بتركب علي كده وخلاص وبص الله صوته حلو وجميل ازال :)
لو ركبته صح حتاخد فايدته وهو عامه مش بيعلي صوته غير لما تكبس بنزين لكن لو بتدوس بالراحه محدش حياخد باله انك مركب فلتر ونفس الكلام في البنزين طبعا

+1111111

الفلتر الاسبور بيعتمد على كذا حاجة

1- مكانه :

بمعنى لو متركب في مكان صح والمكان اللى recommended ليه من K&N الاداء هيتحسن على السرعات العالية

2- الحالة الخارجية للجو :

بمعنى ماتبقاش ماشي في عز الحر الساعة 2 الضهر ومنتظر ان الاداء يكون كويس !! بالعكس ده بيكتم العربية في الحر خصوصا مع التكييف

اما لو الجو ساقعة وبليل !! زي اليومين دول كدة هتلاقي العربية بليل فايقة جامد

3- نضافة الفلتر :

لو الفلتر اتوسخ العربية هتتكم فلازم كل فترة تنضفه

على الاقل كل شهرين لازم يتنضف وخلي بالك انه لما بيتوسخ بيزود استهلاك البنزين جاامد جدا !! غير ان العربية برضوا اداءها بيقل

عموما يا اما تركبه صح وبعيد عن الهوا السخن وتبقى مهتم انك كل فترة تنضفه

ياما ماتركبهوش احسن

**Ahmed salamaa** · 31-12-2012 12:55 PM

المشاركة الأصلية كتبت بواسطة Eng.Geo

هضيف حاجة بسيطة بعد خالد وأحمد
الفلتر تأثيره عالمواتير الكبيرة أفضل بكتير من المواتير الصغيرة
في المواتير الصغيرة ... أقل من 1600 وبما فيهم ال 1600 نفسه وكتير من ال 1800 و ال2000 : بيخنق العربية في السرعات الواطية وبيكون الأداء أقل من الفلتر الأصلي ... حتي لو حاطه في أفضل مكان يجيب منه هوا بارد وطول دراه الفلتر مش طويلة ومش قصيرة ... مناسبة
تيجي عال RPMs العالية تلاقي العربية سحبت اللي هي عايزاه وهتلاقي التسارع أفضل بفرق ملحوظ من الفلتر القديم علي ال RPMs العالية
أمتي تحس ان الفلتر موت العربية وماينفعش للعربية ده ؟
العربيات اللي عزمها بيخرج بدري ومفيش عزم في اأواخر .... الفترة اللي بيخرج فيها العزم الفلتر هيقلل منه وتيجي في الأواخر هتلاقي الفلتر بيساعد بس أساسا الموتور مفيهوش عزم ... هتحس الموتور مات
هتحس بتحس أمتي ؟
العربيات اللي عزمها بيخرج في الأخر .... هتلاقي التسارع بقي عالي بس في الأخر ... وطبعا لو هي بطيقة في الأول هتبقي أبطأ
أحسن أداء مع المواتير الكبيرة فوق ال 2000
وطبعا تاخد هوا ساقع والماسورة ماتكونش طويلة

الاربي ام العالي اللي هو كام يعني انا العربية عندي من اول 2.5 و انت طالع بتفوق دة علي السرعات العادية لكن و انت بتجري 140 يعني الاربي ام بيبقي علي 4 و ال 150 علي 4.5 و بعد كدة بحس انها ماتيت و صوتها عالي علي الفاضي مع انها مكانتش كدة كنت بجيب ال170 عادي جدا و مش عارف المشكلة من اية ف اانا قولت اركب فلتر سبوور مع العلم ان عربيتي كربراتير 2 باب 2000cc

**start_wow** · 31-12-2012 10:44 PM

حاسس ان فكرة الفلتر الاسبور موضوع متعب شوية لانه محتاج تركيب بطريقة معينة وتنظيف كل فترة وبعدين النتيجة مش مضمونة في الاخر لأداء العربية.

**Sehsss** · 31-12-2012 11:26 PM

أنا مركب فلتر k&n بس الاستوك، يعني ما فيش تغيير بيركب جوه العلبة عادي وما بيعملش صوت وممتاااااز وحسن من أداء السيارة، لكن الفلتر الاسبورت زي (الماشروم) مش مقتنع إنه ينفع في مصر نظرا لنسبة التراب الهائلة اللي موجودة في مصر، بالإضافة إنه لازم يركب في مكان صح علشان الهواء البارد