الموضوع: هل بتتحول لما تركب عربيتك؟

غالبا مش بتحول
كلمه التحول دي فكرتني بايام الطفوله و باور رينجرز و وقت التحول ههههههههههههههههههههههههه هه

السلام عليكم ورحمة الله وبركاته

صباح الفل

انا مبسوط جدا اني اشتركت في المنتدي الظريف والوافي دا

فعلا موضوع جميل جدا .. انا فعلا بتحول بس مش في كل الاحيان ودي حقيقه

واعتقد برده ان من الاسباب حالة العربيه الي راكبها .. طبعا فاهميني..

وشكرا ياخي علي الموضوع الجميل دا

والله الواحد بيبقي خارج من بيته رايق ومزاجه تمام والحمد لله مفيش مشاكل واقعد اقول الاذكار بتاعتي الصبح قبل ماركب العربية واكملها وانا في العربية واحيانا اشغل الكاسيت والحياة بتبقي لطيفة لحد كده
وأذ فجأة وعلى حين غرة تلاقي معاق ذهنيا سايق عربيته ولا ميكروباصه ومصر انه يزنق عليك مع ان الحتة ضيقة جدا ولا منه عدي ولا منه خلاك تعدي بس اهو يرمي بوز عربيته وخلاص انا كل اللي بقدر اعمله اني بدي كلكس عنيف شوية مع نظرة احتقار في المرايا (ده لو عنده مرايا اصلا) الا بقي لو حد سخف عليا جامد فممكن ازعقله والاقي رجلي سرحت علي البنزين وصوت العربية علي لوحدها (تقريبا العربية بتتنرفز معايا برده مهي لازم تحس بيا) فافتكر ان كده غلط وافوق واحاول اهدي نفسي شوية عشان متهورش

بس بجد الناس بقت مستفزة فعلا ولو مزنقش عليك يقعد يقرفك كلكسات :boxing_smiley: ولو عايز تدخل يمين او شمال واديت اشارة يبقي نهارك مش معدي ازاي تدخل يمين او شمال انت بتهرج الطريق عندنا One Way only يإما ميرضاش يعديك فتقعد تهدي لحد ماللي وراك يديك كلكسات عشان تبطل لكاعة (طبعا هي مش لكاعة بس لو فاتني اليوتيرن ده هاتبقي مشكلة) يإما تاخدها بالدارع بقي وهو هايخاف ويسيبك تيجي قدامه ( بس دي مش بحاول اعملها كتير عشان عواقبها وخيمة طبعا)

ده غير طبعا اللي تلاقيه جايلك عكسي ومصر انك انت اللي توسعله او ترجع بضهرك ده بقي بوقف العربية قدامه واقوله مش هاتحرك انت اللي تعديني انا ده طريقي وانت اللي جاي غلط وطبعا بيبقي مضايق ومتنرفز (ماهو حق مكتسب بالنسبة له انه ييجي عكسي واحنا نوسع للباشا عشان يكمل الحتة دي عكسي وليه لأ دي حتة بسيطة يعني)

واحيانا لما بلاقي حد يزنق بعديه عادي حسب الموود بتاعي يعني وكمان بقول مانا لو زنقت عليه هاياخد بوز عربيتي ويشوهها اكتر ماهي متشوهة فمش لازم بقي حد يسيب علامة عليها النهاردة

انا لوعربيتي دي لو بتنطق وبتتكلم كان زمانها شتمتني وشتمت الناس اللي تسببوا في بهدلتها كده.:D
بس بجد اقدر اقول ان فعلا التحول ده مرض وفيرس ينتشر عن طريق الهواء اللي بنتنفسه وإن الواحد محتاج دبابة عشان يعرف يشوق بجد في شوارع المحروسة من العين دي