الموضوع: هل بتتحول لما تركب عربيتك؟

قبل ما اشتري عربية من يجي كده خمس سنين ونص كنت انسان هادي ومشهور بهدوئ وكنت باستغرب لما باركب مع اصحابي عربياتهم وابص الاقي الواحد منهم اتحول من انسان محترم لواحد تاني ماعرفهوش

ودلوقت بقيت من المتحولون ، اول ما باركب العربية وادورها باقرا دعاء الركوب وبعدين اقلع وش المؤدب واكشر كده واشمر درعاتي وانزل الحلبة لحد ما اوصل لمكاني ارجع طبيعي تاني، وبابقي ماشي باقول يا شر اشتر وبادور علي اي سواق تاكسي او ميكروباص من النوع الي بيستنصح ده وباستلمة طول الطريق غبا وتزنيق لحدا ما اوصل او هو يفهم اني بايع القضية ويهدي كده ويخليه ورا ، بس مع بتوع الملاكي باسامحهم واخليهم يزنقو براحتهم لانه مش بيبقوا قاصدين ، وبابعد عن تلاته في التزنيق الستات لانهم خطر جدا (اخطر من النقل والاتوبيس) وطبعا النقل واخيرا وليس اخرا سواقين الاوتوبيس لاني قبل كده كنت باركب اتوبيسات وعارف بيقولوا علي بتوع الملاكي ايه ونفسهم يعملوا فيهم ايه

أنا عشان كنت عايش في السعودية فطبيعي عشان أتعامل في السواقة هنا في مصر لازم أتحول يعني أما ألاقي تاكسي ولا ميكروباص كاسر عليا ولاواقف في نص الشارع يركب زبون فطبيعي إني لازم أشتم

المشاركة الأصلية كتبت بواسطة ahmedfawzy14

الصراحة السواقة فى القاهرة عاوزة المتحولون

يعنى عندنا فى اسكندرية مش كل الاوقات ولا كل الطرق زحمة
ومفيش عندنا الغرز ده الا فى سواقة الشباب والميكروبصات
بس الطبيعى عندنا الكل يمشى فى طابور ولو تخطيت حد بأى طريقة يبصلك بصه غريبة كده اكنك شتمته مثلا

اما فى القاهرة انا بموت فيها عشان سواقة الملاهى بتاعة القاهروية
بحس انى فى سبق كبير كله بيسابق كله

ودى اصلا سواقتى فبعيش احلى اوقات ليا وانا بسوق عادى وسط القاهرة

انا ليا مقوله كل ما انزل القاهرة اقول الناس دى متحبش تضيع وقتها
فعشان كده كله بيجرى ناس منجزة الصراحة

مش المرض اللى عندنا فى اسكندرية

يا راجل حرام عليك...دا بمجرد ما الإسكندرانية يشوفو لوحة عربيتك إنك قاهرة ولا جيزة ولا قليوبية بتلاقي الكل بيزنق عليك ويكسر عليك و بيبقى نفسه ينزلك من العربية و يقولك خدها مشي...

مرة كنت في طريق العجمي "من 5 أيام كدا" و الطريق كان واقف و عينكم ما تشوف إلا النور و كأن الكل أتحولو لسواقين ميكروباصات و هوبا تزنيق من كل حتة و اللي يخش ببوز العربية لدرجة ان لازم العربيات تبقى لازقة في بعض بس متتجرحش.....ياراجل دنا حلفت مش نازل إسكندرية تاني بسبب سواقينها و شوارعها

المشاركة الأصلية كتبت بواسطة marsguy

عندي سؤال

هل من الممكن التحول يبقى بالعكس؟

يعني هل ممكن واحد عصبي بطبيعته يتحول إلى إنسان هادي عند القياده؟

انا بصراحه مافتكرش إني شفت حد كده؟ حد فيكم شاف؟

انا عمري ماشفت حد كده قبل كده :Angel_anim:

مستحيل على فكرة لو الانسان بطبيعته عصبي بيتحول لمجنووووووون لما بيسوق ويمشي يخبط في خلق الله

انا لما بكون مضايقة بيبقي ماليش نفس اسوق عشان عارفة اني هاضايق اكتر واتوتر عشان المعاقين ذهنياً اللي الواحد بيشوفهم خصوصاً بقي سواقين الميكروباص ويليهم في المرتبة الشرفية سواقين التاكسي وفي بعض الملاكي برده تصرفاتهم غريبة بس بتبقي متعقلة شوية يعني عشان خايفين علي عربياتهم لا تتبهدل :)
بس الحق يتقال برده عشان مبقاش بعمم فعلا واقول علي المساوئ فقط ونننسي الحاجات الكويسة :)
انا برده وانا ماشية بلاقي ناس في منتهي الذوق يشوفني جاية بعربيتي يشاورلي بإيده اني اعدي من غير عقدة ( انا اللي هاعدي الاول ومتشدش متشديش انتي ، متشدش متشديش انتي :boxing_smiley:) ومرة حصلت معايا برده كنت طالعة على صلاح سالم من شارع جانبي ووقفت (انا اتعودت اني اقف تماماً عشان أأمن نفسي من المفاجآت) وكان مطلع بسيط الشخص الاولاني عدي ومسمحليش والتاني هكذا والتالت شرحة الرابع بقي وقف فبشاورله بيأس كده واقوله عدي (وببرطم وعلامات الأسي تبدو علي وجهي وبقول في سري اه عدي عدي طبعا مش هاتسناني زي غيرك) لكن اتفجأت والله لاقيته توقف تماما ووقف العربيات اللي وراه وشاورلي عشان اعدي وفضل واقف لحد ماطلعت علي الطريق بسلام طبعا شكرته في المرايا ومشيت (هو يستحق الشكر بصراحة في الزمن ده اللي يسمحلك تعدي يبقي عمل فيك جميلة) :Angel_anim:

ومرة تانية برده كان في ملف كده الناس بتدخل فيه من اليمين فأنا دخلت وعايزة اعدل عربيتي بقي فكل ماطلع سنة عشان اعدل الناس من الناحيتين تزنق عليا ومتعدينيش وانا برده اسيبهم يعدوا مش مشكلة خلييكي انتي العاقلة اجي اتحرك سنة تانية الاقي الناس برده تصمم انها تزنق ومتعدينيش :angelsad2: لحد ماخلاص كنت هاعيط لاقيت ربنا بعتلي واحد وقف تماما برده ووقف اللي وراه وشاورلي اني اعدي ومتحركش غير بعد ماعديت خالص بجد ربنا يكرمه هو والناس الذوق اللي بتساعد الناس التانية خصوصا البنات الغلابة اللي سواقتهم علي قدهم :Angel_anim:
علي فكرة انا زيي زي بنات كتيير مش بنحب نزنق ولا ونغلس في سواقتنا عن قصد علي حد ولا ناخدها بالدراع زي بعض الناس وده طبعا مش بيعجب ناس كتير ورانا تفضل تدي كلاكسات لحد ماتجنني ويبقي هاين عليا انزل من العربية واسيبها في نص الشارع كده