تجربتى مع تغيير الكاتينه ومطلوب حل سريع

**hanzcanz** · 03-01-2013 11:02 PM

اخوانى الاعزاء
اخيرا قررت اغير الكاتينه للفيورا بتاعتى لأنها بقت زى الكراكه وصوتها مسموع من اول الشارع المهم انا سألت كذا ميكانيكى قالولى ان الموتور لازم يطلع علشان تتظبط صح فتوكلت على الله واشتريت كاتينه بالتروس 70 جنيه وجوان وش تقسيمه واولسيه امامى وخلفى علشان الكرنك ورحت للميكانيكى وسبت العربيه وبعدها بحوالى 4 ساعات اتصل بيا وقالى الاسطوانه بتاع الدبرياج عايزه حشو والبليه تتغير قلتله نغير الطقم كله بالمره لأنى عرفت من حضراتكم ان الحشو دا حل مؤقت فأشتريت طقم دبرياج (ديسك - اسطوانه - بليه) وبالمره علشان الشتاء كانت العربيه بدأت تحتاج انى لما اسخنها الصبح افضل دايس شويه على دواسه البنزين علشان تسخن فغيرت طقم الكهرباء كله بالمره
وعند التجربه
صوت العربيه بقى حاجه تانيه خالص والموتور مش مسموع لو وقفت جنب العربيه بخطوتين غير النعومه اللى ملحوظه طبعا حاجه تفرح
اخدت العربيه وجربتها لاقيتها بتقطع فى كل الغيارات وفى الاخر بعد محاولات كتيره رجعت استخدمت الابلاتين والكندنسر والبوجيهات القديمه والتقطيعه والتنتيش راحت فعرفت ان الطقم الجديد بتاع الكهرباء واخد رطوبه
بس المشكله هنا بقى
العربيه مش بتدور بسرعه زى الاول ممكن افضل ادور فيها ييجى عشر دقائق علشان تدور كويس ولو دارت وسبت الدواسه تشتغل ثوانى وتبطل لوحدها
من الاخر الدواره لما العربيه بتبقى بارده صعبه جدا
فشكيت فى التقسيمه بتاع الكاتينه هل ممكن تكون هى السبب؟
ورجعت للميكانيكى سألته قالى انا مش اول مره اغير كاتينه وعارف طبعا انى لازم اخد علامات قبل ما ابدل الكاتينه والتروس
فأنا دلوقتى بعد المصاريف دى كلها العربيه مش بتدور بسهوله لو بارده لكن لو سخنه بتدور عادى
اعمل ايه يا جماعه حد عنده حل للمشكله بتاعتى دى ؟ وهل ممكن اكشف على التقسيمه من غير ما اخرج الموتور تانى خارج السياره ؟ لأن المكان عندى ضيق جدا ودا اللى خلى اى ميكانيكى يقولى لازم علشان اركب الكاتينه اطلع الموتور

اسف على الإطاله
بس حبيت اقدم تجربتى ومنها الاقى حل لمشكلتى

**حمدى الفنى** · 04-01-2013 10:48 AM

عشان تعرف الكاتينة مظبوطة والا لاء ممكن من خلال فك غطاء التاكيهات والبوجية الاولاانى ومن خلال ميكانيكى عشان انت مش هتعرف بس انت بتقول رجعت الابلتين والكلدنصر الاقدام طب والبجوهات القديمة رجعتها اسمع هات اربع بوجهات من عند السرساوى فالدقى ان جى كى ابو صامولة سابتة والعلبة الصفر ابو علامة مائية عالعلبة ب55جنيه وركبهم قبل ما تعمل حاجة وشوف انشاء الله هدور على طول وشكرا

**hanzcanz** · 04-01-2013 08:46 PM

المشاركة الأصلية كتبت بواسطة حمدى الفنى

عشان تعرف الكاتينة مظبوطة والا لاء ممكن من خلال فك غطاء التاكيهات والبوجية الاولاانى ومن خلال ميكانيكى عشان انت مش هتعرف بس انت بتقول رجعت الابلتين والكلدنصر الاقدام طب والبجوهات القديمة رجعتها اسمع هات اربع بوجهات من عند السرساوى فالدقى ان جى كى ابو صامولة سابتة والعلبة الصفر ابو علامة مائية عالعلبة ب55جنيه وركبهم قبل ما تعمل حاجة وشوف ان شاء الله هدور على طول وشكرا

شكرا يا كبير على المساعده وسرعه الرد
عموما انا ملاحظ صوت التاكيهات عالى شويه اما بالنسبه للبوجيهات فالطقم اللى كنت شاريه جديد كان ngk بـ 37 جـنيه اللى كلهم فى علبه مشط مش اللى كل بوجيه فى علبه لوحده والبوجيهات القديمه اللى انا ركبتها كانت برضه ngk
عموما حضرتك طمنتنى انى ممكن ارجع للميكانيكى تانى واقوله راجع على التقسيمه من خلال البوجيه 1 وغطاء التاكيهات علشان بس ابقى انا فاهم لأنه ممكن يهرب منى ويقولى لازم علشان اراجع عليهم ارفع الموتور تانى
وشكرا ياباشا

**hanzcanz** · 04-01-2013 08:56 PM

هل لو التقسيمه طلعت مأخره او مقدمه سنه بسيطه لو هيظبطها هيضطر يرفع الموتور خارج السياره برضه ولا ممكن وهو مكانه ؟

**kamal_adly** · 11-01-2013 04:08 PM

طالما طقم الكهربا جديد ممكن يكون المشكلة دى من البطارية لو هى ميه .
جرب حط ميه جديدة و اشحنها كويس و شوف الدوارة ظبطت و لا

**original** · 11-01-2013 06:05 PM

الشك فى الآتى:
- بوجيهات
- كابلات بوجيهات
- تظبيط كربيراتير

**حمدى الفنى** · 13-01-2013 09:55 AM

البوجيهات ام 37 جنيه مضروبة هات الى قلتلك عليها من عند السرساوى ب55 جنيه وما ترحش لنفس الميكانيكى عشان تراجع عالكاتينة ولو ماخرة هترفع المتور تانى بس جرب البوجيهات الاول قبل ما تراجع

**حمدى الفنى** · 13-01-2013 10:02 AM

المشاركة الأصلية كتبت بواسطة hanzcanz

شكرا يا كبير على المساعده وسرعه الرد
عموما انا ملاحظ صوت التاكيهات عالى شويه اما بالنسبه للبوجيهات فالطقم اللى كنت شاريه جديد كان ngk بـ 37 جـنيه اللى كلهم فى علبه مشط مش اللى كل بوجيه فى علبه لوحده والبوجيهات القديمه اللى انا ركبتها كانت برضه ngk
عموما حضرتك طمنتنى انى ممكن ارجع للميكانيكى تانى واقوله راجع على التقسيمه من خلال البوجيه 1 وغطاء التاكيهات علشان بس ابقى انا فاهم لأنه ممكن يهرب منى ويقولى لازم علشان اراجع عليهم ارفع الموتور تانى
وشكرا ياباشا

البوجيهات ام 37 جنيه مضروبة هات الى قلتلك عليهم من عند السرساوى ب55جنيه ولما تيجى تراجع عالكتينة ما ترحش لنفس الميكانيكى ولو الكتينة ماخرة هترفع المتور تانى بس ركب البوجهات الجديدة الاول وشوف

**مصطفىىا** · 13-01-2013 12:57 PM

يسلموووووووووووووووووووووو

**aboomar22** · 13-01-2013 06:04 PM

هقولك على تجربتى فى تاخير الدوارة كانت العربية معايا لو جيت ادور الصبح تاخر اوى فى الدوارة لكن لو كنت فى اى مشوار خلال اليوم كانت بتدور عادى بعد ماغلبتى طلع العيب فى الكربراتير فيه بوابه صغيرة فى الكربراتير مربوطة باربع مسامير صغيرين فى جنب الكربراتير كده كانت المسامير دى مش مربوطة كويس فكنت لما اركن واجى ادور الصبح بيكون البنزين هرب من البوابة دى وتاخد وقت لحد ماتحضر بنزين غيره (طبعا تسريب خفيف جدا مع وقت طويل يكون فضى الكربراتير ) لكن لو فمشوار او الشغل مابيلحقش يفضى كله فكان بيدور بالشوية الموجودين والطلمبة تسحب غير اللى نزل طيب دى تعرفها ازاى حط شوية بنزين ضغيرين فى الكربراتير من فوق ودور لو دارت على طول يبقى دى المشكلة