الموضوع: إيه الفرق بين مواتير التربو والمواتير العادية؟؟؟

المشاركة الأصلية كتبت بواسطة truss

موضوع هايل يا بشمهندس أحمد و وضح حاجات كتير

لكن عندى سؤال:

هل استهلاك البنزين مع التربو بيزيد لنفس السعة اللترية, يعنى دلوقت المفروض ان فيه نسبة مثالية بين البنزين و الهواء و لما حطيت تربو زودت كمية الهواء , هل بكدة كمية البنزبن المفروض تزيد ؟

مع العلم انى لما بشوف مواصفات عربيات زى فولكس tsi 1400 سى سى بلاقى ان ارقام استهلاك البنزين جيدة جداً

فعلا... استهلاك الوقود بيزيد لنفس السعة اللترية... والكلام ده موجود في الموضوع في آخر فقرة فيه.

بس الفكرة مش في زيادة الاستهلاك... إنما كفاءة الاستهلاك


يعني إيه الكلام ده؟؟؟


يعني لتر البنزين في الموتور الـ1300 تربو اللي بيطلع 150 حصان مثلا هيمشي العربية مسافة أكبر من موتور 2000 بيطلع نفس القدرة الحصانية


طيب إيه الفكرة؟؟؟


الفكرة أساساً جاية من ناحية الوزن... !!!

الموتور الـ1300 التربو بيبقى أصغر في الحجم وأخف من الموتور الـ2000... والأجزاء الداخلية بتاعته أصغر وأسهل في الحركة ... يعني بتحتاج بنزين أقل عشان تتحرك

طبعا ... الكلام ده بفرض إن نفس الجيربوكس هيركب في الموتورين وعلى نفس العربية


_________

إنما موضوع موتور الـTSi بتاع فولزفاجن ده مختلف شوية

الموتور ده متركب عليه تربو + سوبرتشارجر

ايه السوبرتشارجر ده؟؟؟

السوبر تشارجر Supercharger هو عبارة عن ضاغط هواء أو كمبريسور Compressor بيعمل نفس اللي التربو بيعمله بالظبط

إنما الفرق بينه وبين التربو حاجة واحدة.... إنه بيشتغل عن طريق توصيل ميكانيكي على الموتور ... عن طريق كاتينة أو ترس أو سير... زي كمبريسور التكييف مثلا




السوبر تشارجر بيبقى واحدمن اتنين

واحد بيستخدم توربينة زي بتاعة التربو بالظبط... وهو كده أقرب للبلاور اللي بيتباع في الأسواق






والنوع التاني بيسموه الضاغط الحلزوني Screw Compressor وده النوع المستخدم في الضواغط الصناعية، والنوع ده كفاءته أعلى.. حجمه أكبر... وأغلى طبعا






طيب إيه ميزته؟؟؟

أكبر عيب في التربو إنه مش بيستجيب بسرعة مع اختلاف دوران الموتور.. عشان التوربينة محتاجة ضغط هواء العادم يكون كبير نسبيا عشان تتحرك أو تستجيب لما نعلي دوران الموتور

وهو ده اللي إسمه تأخير التربو Turbo Lag، يعني الموتور هياخد شوية وقت عشان تاخد استجابة عالية (ممكن ثانية أو اتنين على الأكتر)



إنما الميزة الأساسية في السوبر تشارجر واللي بيفرقه عن التربو هو إنه بيضغط الهوا بمجرد إن الموتور يشتغل لإنه متوصل بشكل مباشر على الموتور، وبالتالي بناخد استجابة فورية من الموتور.

بس عيبه الرئيسي إنه بيستهلك جزء من طاقة الموتور... يعني الـطاقة (الصافية) اللي هيزودها على الموتور ممكن تكون أقل من التربو اللي بيدي نفس كمية الهوا



...

المشاركة الأصلية كتبت بواسطة MohammedAladel

كان ليا سؤالين

يقال إن لما العربية تبرد استهلاكها بيكون أعلى للبنزين ليه ؟هل بتبقى حركة البساتم غير سلسة مثلا ودرجة لزوجة ا لزيت بتبقى مش متناسبة مع السرعة اللى انا ماشى عليها والعربية باردة عشان كدا بتبذل محهود اكبر وتاكل بنزين ؟؟

السؤال التانى..... حضرتك قلت إن الهواء اللى بيبقى داخل الموتور بيبقى دافئ هل دا مع التربو فقط ولا مع كل العربيات ؟

وإيه اللى يخلى الهواء االداخل للمحرك دافئ خاصة فى الشتاء دى ؟

زي ما قلنا في موضوع "ثرموستات الكوعة... المفترى عليه"

درجة حرارة التشغيل هي اللي بيتحسب عليها خلوصات الأجزاء المتحركة جوه الموتور لإن المعادن كلها بتتمدد مع ازدياد درجة الحرارة

المشكلة إن المعادن المستخدمة في الموتور مش كلها زي بعض... يعني الشميزات من معدن غير المعدن المستخدم في البستم ... السبايك على عمود الكرنك من خامة مختلفة عن عمود الكرنك نفسه


المقصود بكلمة المعادن هنا هو السبيكة المستخدمة في تكوين خامة الأجزاء دي... واللي عادة بتكون مكونة من خليط من عدة معادن وعناصر


طيب.. كل خامة من دول ليها معامل تمدد مختلف عن الخامة التانية، وبالتالي ممكن تلاقي أجزاء قافشة ... وأجزاء تانية مبوشة (خلوصها واسع)


الأجزاء القافشة أكيد بتعمل مقاومة كبيرة بتخلينا نزود الطاقة اللي محتاجينها عشان نحركها... بمعنى آخر... هنزود البنزين اللي بيتحرق

الأجزاء المبوشة... وبالذات لو في أماكن محتاجة تكون محكومة عشان ما تهربش الضغط .. برضو هتخلينا نزود الطاقة اللي محتاجينها عشان نعوض فرق الضغط اللي هرب



آخر حاجة ... وأهمها من وجهة نظري


غرفة الحريق لو ما وصلتش لدرجة الحرارة المناسبة للحريق... حرق البنزين هيبقى ناقص.. وده معناه إن الانفجار اللي بيحصل جوه السلندر ضعيف ومش قادر يحرك البستم زي ما احنا عايزين
______

بالنسبة للهوا


بشكل عام على كل الغازات ... كل ما قلت درجة الحرارة ... الهوا بينكمش ووزنه بيتقل، وده معناه إن المتر المكعب من الهوا البارد ممكن يكون وزنه 100 جرام مثلا... إنما لو كان سخن.. فوزنه هيبقى 50 جرام بس (مثلا بردو) ... وبالتالي كمية الهوا اللي بيساعد على الاحتراق هتقل (الحاجات دي ليها معادلات.. بس مش عايز أشغل دماغنا بيها دلوقتي)

بس لو الهوا بارد جدا ممكن يقلل من كفاءة الاحتراق لإنه بيبرد الموتور

في العادة... درجة حرارة الجو اللي كفاءة الموتور بيتحسب عليها بتبقى حوالي 15 درجة مئوية، وكل ما زادت درجة الحرارة قلت القدرة اللي خارجة من الموتور (والعكس صحيح لغاية حد معين).


وهو ده السبب الأساسي إن معظمنا بيحس إن العربية سحبها أحسن في الشتا


بالنسبة للتربو.. غالبا الإنتركولر بيقدر يبرد الهوا بحيث يوصل لدرجة حرارة أعلى من درجة حرارة الجو بحوالي 15 - 30 درجة مئوية... وفي الحالة دي يعتبر مقبول.



...