أول أمبارح مونت من محطة و بالرغم من أن التانك كان نصه تقيبا و أنا عارف أن العربية المفروض تأخد حوالي 24 لتر أذ فجأة الطلمبة تفصل بعد 13 لتر !!!
و بعد محاولات التانك أخد 15 لتر بالعافية !!!
لكن مؤشر البنزين كان مازال ناقص حوالي 12 لتر كمان علي الاقل

بصراحة أستغربت و قولت معقول يكون علق ؟
العربية لسه جديدة و كانت عاملة أكثر من 300 كم مشاوير

المهم مشيت و يادوب كام مشوار عملت فيهم 150 كم و كنت قريب من امارات المعادي قولت أفول التانك
و كانت المفاجأة المفجعة

العربية أخدت 23 لتر بنزين بعد ماقطعت مسافة 150 كم
بصراحة مشيت و أنا مش مصدق نفسي و كنت عمال أكلم نفسي و أكلم العربية لدرجة أن زوجتي قلقت و سألتني هو فيه مشكلة في العربية ؟

النهاردة بقي المؤشر نزل درجتين و أنا يادوب ماكملتش 60 كم !!
زي مايكون التانك مخروم أو فيه تسريب بنزين

أنا كنت شاكك في العربية

لكن بعد الموضوع ده و كلامكوا أتأكدت أن فيه لعبة بتتعمل في المحطات
بصراحة انا شاكك أن طلمبات البنزين بتضخ البنزين بسرعة عالية فيحصل فوران داخل التانك و يعمل زي طبقة فوم فالعوامة تقرأه علي أنه أتملأ و الطلمبة تفصل

و بعد ماتمشي بالعربية يكون البنزين هدأ و يبدأ منسوبه ينزل في التانك و العوامة تقرأ المنسوب الحقيقي فيبدو علي أنه استهلاك عالي

أنا ناوي أجرب تاني لما أكمل ال 100 كم و أشوف الحكاية أيه بالظبط
و ياريت حضراتكوا تتابعوا معايا الموضوع و نبلغ بعض أول بأول