الموضوع: زهقت من التوكيل وعايز حد بره

انا برضوا مابحطش اللا 95 بس انا مابعتمدش على العربيه كتير واخر مره جيت افولها بالسعر الجديد والتانك كان ناقص شرطتين بس وعملت 65 جنيييه فاقولت حرام بجد مشوار عبيط ادفع فيه المبلغ ده المهم ياعني انشاء الله اجرب ال 92 وربنا يستر بقى

المشاركة الأصلية كتبت بواسطة hany63

ياباشا بلاش تطلع من التوكيل الا بعد سنه من نهاية الضمان بدل ما اسف في اللفظ تتعور في حاجه جامده و دي نصيحه لوجه الله عشان ممكن الضمان يخلص و تحصل حاجه جامده بيجيبوا عليها موافقه من المانيا و تتعمل ياببلاش لو عيب صناعه يا حضرتك بتتحمل جزء بسيط و انا عارف انهم على قدهم بس تقدر تقول شغالين زي الالات و بينفذوا سياسة الشركه الام بحذافيرها

انا مع الرأى ده برضه و خاصه حضرتك مشترى العربيه وكيل فخساره تخسر الضمان لانه بينفع برضه لو لاقدر الله حصلت مشكله كبيره التوكيل هيتحملها . بالاضافه الى الموضوع ده لو خرجت بره التوكيل هتدخل نفسك فى مواضيع انك لازم تبقى عارف جداول الصيانه الدوريه و ايه اللى بيتغير فى كل صيانه و لازم تنزل تشترى قطاع غيار بنفسك و تدور على الاصلى مع ان حضرتك هتبقى المسئول عن كل حاجه خاصه بالعربيه و فى الاغلب هتلاقى نفسك كسلت فى عمل الصيانه و بقيت بتروح فقط لما تحصل مشكله ودى بتبقى بدايه بهدله العربيه. انا فاهم طبعا ان حضرتك زهقت من المعامله و قله الخبره لكن حضرتك تقدر تعمل حاجات بسيطه بس تضبط بيها الدنيا شويه عن كده زى ان حضرتك تشوف فرع توكيل تانى غير اللى بتروحله و احتمال تلاقى العماله فيه افضل و بكده المشكله تتحل و حضرتك برضه معاك الضمان و حل تانى كتابه ورقه فيها جميع الملاحظات و وضعها لهم على الزجاج من الداخل تستخدمها زى checklist و قبل ما تمشى اتاكد ان كل اللى فيها اتعملش إلا تطلب مقابله مدير الصيانه و تشتكى من سوء الخدمه . المهم انك تكمل فتره الضمان و لما تخلص ابقى شوف حد بره التوكيل براحتك يا فندم و بالتوفيق لما فيه الخير

متشكر لردك
بس للاسف جربت فروع التوكيل كلها سواء الاسكندريه او العبور او شبرا وكلهم منتهي الاهمال اللي في الدنيا وبجد ندمت اني اشتريت عربيه تبع الشركه دي
انا لسه ليا في الضمان لحد شهر سته الجاي
وقلة الخبره عندهم مبهدلاني الصراحه
بحس انهم بيستريحوا علي حساب العميل
بمعني انه كلمة(الجزء دا محتاج يتغير) سهله اوي عندهم بحس انهم بينفعوا الوكيل علي حسابنا
ولما تيجي تغير الحاجه لازم بيبوظوا حاجت تانيه
ربنا يستر انا لسه لحد اللحظه دي مقررتش بس انا مسافر بكره باذن الله اسكندريه
وقبل مااخرج من البيت هاصلي استخاره واللي فيه الخير يقدمه ربنا

المشاركة الأصلية كتبت بواسطة ak007

متشكر لردك
بس للاسف جربت فروع التوكيل كلها سواء الاسكندريه او العبور او شبرا وكلهم منتهي الاهمال اللي في الدنيا وبجد ندمت اني اشتريت عربيه تبع الشركه دي
انا لسه ليا في الضمان لحد شهر سته الجاي
وقلة الخبره عندهم مبهدلاني الصراحه
بحس انهم بيستريحوا علي حساب العميل
بمعني انه كلمة(الجزء دا محتاج يتغير) سهله اوي عندهم بحس انهم بينفعوا الوكيل علي حسابنا
ولما تيجي تغير الحاجه لازم بيبوظوا حاجت تانيه
ربنا يستر انا لسه لحد اللحظه دي مقررتش بس انا مسافر بكره باذن الله اسكندريه
وقبل مااخرج من البيت هاصلي استخاره واللي فيه الخير يقدمه ربنا

و نعًِمَ العمل. خلاص يا فندم بالتوفيق ان شاء الله و ابقى طمننا على حضرتك عملت ايه و السلام عليكم

سلام عليكم
رحت يوم الاثنين التوكيل
قلتلهم عايز اكشف علي العفشه كويس وكدا وشرحتلهم الحوار
المهندس بعد تلات ساعات قاللي محتاجه
2 شداد ميزان (700 جنيه ومصنعيه 740 جنيه)
ميزان(1500 جنيه ومصنعيته مضافه مع الشدادات)
2 بيض مقص(800 جنيه ومصنعيه 280 جنيه)
2 بيض طرف(800 جنيه و مصنعية 300 جنيه)
2 مساعد (2000 جنيه ومصنعيه 440 جنيه)
2 بطاحات بالبلي(1000 جنيه ومصنعيتهم مع المساعدين)
2 جلبة مقصات(1000 جنيه ومصنعية 530 جنيه)
بالاضافه لعشره في الميه ضريبة مبيعات علي ثمن قطع الغيار
بالاضافه لعشره في الميه ضريبة مبيعات علي المصنعيات

من الاخر الكلام اللي فوق دا كلله هايتكلف 11 الف جنيه
طبعا ذهلت لان العربيه يادوب معايا من سنه ونص زيرو ومشيت بيها 60 الف كيلو بس وتطلب تغير كل الكلام دا.
دا شككني في التوكيل وقلت انهم بيستسهلوا فقلت اروح لهريسه في محطة الرمل اشوف رايه

رحت لهريسه وقابلني واحد محترم اسمه المهندس احمد هريسه
قلتله علي اللي في العربيه انه فيها صوت حطه في العفشه وهوا جرب العربيه وقالي محتاجه
2 شداد ميزان
2 بطاحات بالبلي
2 جلد مقصات
دول لازم يتركبوا
وقال كمان من الافضل نغير
2 بيض مقص
2 بيض طرف
لكن المساعدين سلام
والميزان صعب انه يبوظ
قلتله اوك نغير كل دول
غيرناهم ودفعت تمنهم 2400 جنيه
بعد ماركبناهم رحنا جربنا العربيه
للاسف الصوت لسه موجود

قال يبقي نكشف علي قاعدة الجيربوكس
لقيناها بايظه
جينا نطلبها لقيناها مش موجوده
المهم حشرلها حتة جلده وقال دا حل مؤقت
رحنا جربنا
الصوت لسه موجود

قلنا يمكن العيب في المساعدين رغم انه قال انهم كويسين لكن ادينا بنجرب
جبنا من عنده مساعد شمال (لانه الصوت غالبا كان بيطلع من الجمب الشمال)
ركبناه وجربنا العربيه لقينا الصوت لسه زي ماهوا

قال يبقي كدا لازم نغير قاعدة الجير بوكس
رحت اشتريتها من التوكيل ب 1120 جنيه لانها مش موجوده عند هريسه

وانا راجع في الطريق لقيت العربيه بقت انعم والصوت اختفي لوحده كدا بقدرة قادر
لما رجعتله قلتله الصوت اختفي
جرب العربيه ولقي فعلا الصوت اختفي

قالي خلاص بلاش نركب القاعده الجديده وخليها معاك لو الصوت ظهر تاني نركبها

روحت البيت وبعد يوم واحد من استخدام العربيه
الصوت فعلا مختفي
لكن فيه صوت تاني كان بيظهر معايا لما باخد بالعربيه مطب (من المطبات اللي بتبقي فوق الطريقه مش الحفر دي) جامد والعربيه بتترزع فيه وللاسف نسيت اقوله علي الصوت دا

دلوقتي اعمل ايه في نصب التوكيل دا اللي طالبين حاجات ب 11 الف قضيتها بره ب 2500 بس ؟
تاني حاجه انا الوقتي اعتبر غيرت كل العفشه اصلا يبقي الصوت اللي بيظهر لما العربيه بتترزع في المطب دا لسه سببه ايه ؟

كدا لازم ارجع مشوار تاني لهريسه اركب القاعده دي ونشوف ربنا يسهل بقي

معلش انا اسف - بس ممكن افهم ازاى عربية بالماركة ديةو زيرو و باقالها سنة و نصف و لسة فى الضمان زى ما فهمت و يحصل للعفشة كل دة معلش دية مش 128 اكيد ممكن يكون العيب فى طريقة معاملة حضرتك للسيارة لانى لاحظت ان حضرتك بتدور على حد برة التوكيل و على حد قولك يكون فى اسكندرية - القاهرة - اة اى مكان مش فارقة - معلش حاول تغير طريقة معاملتك للسيارة لان مشكلة العفشة دليل على عدم مراعاة اسلوب معين فى التعامل مع الطريق

المشاركة الأصلية كتبت بواسطة mazaya010

معلش انا اسف - بس ممكن افهم ازاى عربية بالماركة ديةو زيرو و باقالها سنة و نصف و لسة فى الضمان زى ما فهمت و يحصل للعفشة كل دة معلش دية مش 128 اكيد ممكن يكون العيب فى طريقة معاملة حضرتك للسيارة لانى لاحظت ان حضرتك بتدور على حد برة التوكيل و على حد قولك يكون فى اسكندرية - القاهرة - اة اى مكان مش فارقة - معلش حاول تغير طريقة معاملتك للسيارة لان مشكلة العفشة دليل على عدم مراعاة اسلوب معين فى التعامل مع الطريق

العربيه عامله 62 الف كيلو في السنه ونص دي
معظمهم في الجبل_زلط وكدا
وبعدين انا بسوق بسرعه خصوصا بالليل
وانت حضرتك عارف بقي المطبات عندنا مش مطبات
دي اكمنه
تلاقي كل واحد قدام بيته طلبت يشغل نفسه يقوم نازل عامل مطب
من غير مايحط يافطه قبله تعرفك انه فيه مطب ولا حاجه
وطبعا المطبات بالليل مش سهل تتشاف
فكنت باخد مطبات كتير بيها الصراحه

طب ماكدة العربية مش حتكمل معاك لانها مش مصممة لكدة و حتتعبك فى المستقبل - انت عايز جيب 4×4 حتبقى انسب لطبيعة العمل