الموضوع: لما الموتور يكون مساعدك........و العفشة تعكنن عليك

السلام عليكم

مخنوق شوية و قلت أفضفض.

معايا حالياً فى الإمارات عربية ياباني مش لازم أقول نوعها علشان محدش يزعل.....6 سلندر و 3000 سي سي.........واحد قريبي كان سايبهالي أركبها لحد ما أنزل مصر لأني نازل قريب و طبعاً أبيعهاله قبل ما أنزل.
العربية دي موديل 1998 يعني عمرها 14 سنة تقريباً مع العلم انها أعلى موديل فى الماركة دي.......بقالها معايا 9 شهور تقريباً.......عفشتها كانت فى التراوة..........الموتور حلو و التكييف تلاجة.

رحت من فترة لميكانيكي قولتله أكشف على العفشة و قولي محتاجة أيه.

قالي مش محتاجة غير شداد يمين و أخوه شمال بس.........سألته متأكد.........قالي أيوة و الفرامل هنخرط الطنابير و خلاص على كده......مع أني مش بحب شغل الخراطة بس هنا حتى التوكيل بيعمله كل 40 ألف إجباري.........كان توكيل نيسان عربيتي اللى بعتها.

جبتله الشدادين و فك الطنابير و خرطهم و ربط العفشة و كله تمام.

العربية جربتها و كانت زي الفل لمدة أسبوع.........و رجعت تاني زي ما كانت بنسبة 90% تقريباً.

قعدت بيها شوية لحد ما أتخنقت...........رحت جايب جوز مساعدين خلفي علشان كانت حاسس أنهم بايظين.......و جوز مقصات أمامي و 4 طنابير و تيول.

عداني العيب كده ؟

رحت للمكيانيكي و قولته غير.............أخدت نص يوم تقريباً.........و استلمت العربية فلة شمعة منورة.

أسبوعين تلاتة و رجعت تاني بنسبة 70% زي ما كانت.

رجعت للميكانيكي تاني..........قالي فيما معناه تعالى ربط عفشة كل فترة...متنساش أنها عربية قديمة........و هي فعلاً كل ما العفشة تتربط بتمشي كويس أسبوعين تلاتة.

رجعت بالذاكرة كده لأول عربية جبتها..........كانت بى أم ....فئة تالتة....يعني أول فئة و ساعتها كان عمرها 15 سنة برضه................شتان الفرق.........كانت العفشة يوم ما تعمل فيها شغل تحس بيه على الطريق......العربية طوبة ماشية.

مرة كنت ماشي على الدائري بتاع شيراتون رايح للميكانيكي أغير جوز مساعدين قدام.........فى الملفات على 80 حاسس أن العربية مش راسية......و أنا راجع بعد ما غيرت المساعدين و فى نفس الملف كان معايا تليفون و مش مركز فى السرعة ببص على العداد لقيت نفسي ماشي 120 أو 130 و مش حاسس أصلاً.

الألماني ألماني برضه.

الموضوع للفضفضة ليس إلا.