البنزين - البنزين - البنزين

**م.احمد زكريا** · 16-01-2013 09:10 AM

بسم الله الرحمن الرحيم

بخصوص موضوع الكروت الذكية للبنزين ودعم البنزين والكلام الدائر عن تطبيقه من اول ابريل القادم

وان سيكون بواقع 5 لتر في اليوم / الدعم مقدم للسيارات اقل من 1601cc / ولجميع السيارات قبل عام 1995 مهما كانت سعتها الليترية

نيجي نتكلم مع بعض بالعقل شوية

اولا: رفع الدعم او ترشيد الدعم هو مطلب وواجب وطني ولازم يتنفذ فعلا ... لان لو دورنا حوالينا هانلاقي اننا ارخص سعر بنزين وسولار في الدول المحيطة عشان كدة بيتهرب وبيتباع سوق سوداء

ثانيا: رفع الدعم هايكون جزئي وليس كلي (يعني لتر البنزين 92 السعره في مصر 1.85 جنيه سعره الحر في ايطاليا مثلا 1.7 يورو ) ومتوقع ان سعره بعد رفع الدعم الجزئي يكون من 2.5 الى 3 جنيه

ثالثا: بالنسبة لـ 5 لتر في اليوم - فده بصراحة رقم قليل جدا لانه واضح انهم واخدينه على متوسط الاستهلاك على مستوى الجمهورية لذلك اقترح ان يكون طبقا وسكن صاحب السيارة ( يعني سكان القاهرة والجيزة والقليوبية غير سكان محافظة زي المنيا مثلا) ويكون نصيب السيارة طبقا للمرور التابعه ليه ونلغي قصة التوكيلات ديه وكل واحد يسجل في المرور بتاعه

رابعا: نيجي لمضوع تحديد الـ CC وهو شرط مجحف بصراحة وللاسباب التالية:

1- الراكب عربية اكبر من 1600 cc هو كده كده بيدفع استهلاك بنزين اعلى من غيره وهو متحمل ذلك بمذاجه فما ينفعش ترفع عنه الدعم نهائي كمان

2- في سيارات من بعد 1995 بسعات اكبر من 1600cc زي الاوبل فيكترا والبيجو بريستيج والبيجو 406 ده غير الاسبرانزا الصيني والشيروكي التسعينات (كلها قيمتها السوقية من 40 الف الى 70 الف جنيه) وقيمتها نازلة اساسا في السوق بسبب الضريبة واستهلاك البنزين وبعد رفع الدعم سعرها هاينزل للارض يعني خسائر متلاحقة

3- اصحاب السيارات اعلى من 1600 ديه غالبا وبنسبة كبيرة ليسوا اول يد لان سعر السيارات ديه وقت نزولها زيرو كانت عالية جدا (200 الف للبيجو 406 على سبيل المثال) وسعر البيع مستعمل من 65 الى 75 الف حسب الموديل وملاكها الحاليين من الطبقة المتوسطة وليسوا اصحاب رفاهية ولا يحزنون

لذلك اقترح :

1- ان تكون كمية البنزين المدعوم طبقا ومحال اقامة صاحب السيارة او المرور التابع له السيارة لتحقيق عدالة في الاستهلاك

2- تحديد الكمية لا ترتبط بسعة لترات المحرك لان سعه اللترات تحقق العدالة في الاستهلاك من نفسها مش محتاجة زيادة كمان

3- افضل الغاء بنزين 90 والابقاء على البنزين 80 و90 لسهولة التطبيق والتداول وتخصيص محطات باكملها للسولار بعيدا عن البنزين وتكون مجهزة لاستقبال النقل والمقطورات

4- اجبار التاكسي على التحويل للعمل بالغاز حتى لا يتعللوا برفع اسعار النقل باسعار البنزين والسولار

.................................................. ..............

يا ريت المقوافق على رأيي واقتراحاتي او له اضافة او الغاء يشاركني

ويا ريت حد يوصل لطريقة لرفع المطالب ديه لوزير البترول / التموين/ رئيس الوزراء / رئيس الجمهورية

ونحاول نشتغل عليها قبل بداية التطبيق

وشكرا

**dodyam** · 16-01-2013 09:52 AM

بالعكس أنا متفق معاه فى موضوع اسكندرية تاخد بنزين أكتر من مطروح
لان فى محافظات مفيهاش ازدحام مرورى كما أن مساحتها صغيرة
فبالتالى استهلاك البنزين بها قليل
مينفعش تقارنها باستهلاك البنزين فى محافظات اخرى مزدحمة مروريا و مساحة مدينة القاهرة و اسكندرية مثلا كبيرة عن سوهاج و مطروح

**mohamed_selim** · 16-01-2013 10:17 AM

هل تعلم ان مساحة محافظة مطروح اكبر من مساحة محافظة اسكندريه ؟
متبصش على المدينه انت بتتكلم عن المحافظه اللى هى فى مطروح مثلا ماسكه من سيدى برانى و السلوم لحد الحمام مع امتدادها فى الصحراء الغربيه

هل تعلم انا محافظة البحر الاحمر و الوادى الجديد اكبر محافظات مصر؟ هتقوله المدينه زحمه و اسكندريه اكبر من مرسى مطروح هيقولك بنزل السلوم كل يوم و ارجع ....

ده غير النفسيات بقى :)

**akmm** · 16-01-2013 10:20 AM

وهل تعتبر السيارات الصينى اللى سعتها اكبر من 1600 cc باختلاف انواعها سيارات تترفع من الدعم ...واصحابها اساسا شارينها لرخص سعرها مش لحجم الموتور او السعه اللتريه الكبيره .

**Khaled Online** · 16-01-2013 10:35 AM

موافق على الكلام المنطقي خاصة موضوع
+ إلغاء التوكيلات عند نقل الملكية (ويستثنى منها الحالات الإنسانية زي واحد عامل توكيل لابنه أو ما شابه لكبر سن الوالد)
+ التاكسي يقلب غاز إجباري وسائقو التاكسي معظمهم عاملين كده فمش هيبقى فيه اعتراض يذكر
+ تحديد الكمية حسب السكن لأن مش ممكن أبدا تديني 5 لتر في القاهرة اللي الحركة فيها بالمتر ومشوار ال20 كيلو بين نقطتين بيتاخد في ساعة إلا ربع ده لو الدنيا سالكة شوية والجو حر جدا وفي نفس الوقت تدي واحد ساكن في مدينة شبه فاضية من الناحية المرورية (بورسعيد، المنيا، مطروح، الغردقة وكلهم مدن ساحلية عدا المنيا ومش محتاجين تكييف معظم فصول السنة) نفس كمية البنزين. ده ظلم مش طبيعي، واللي يقول ما هو ننقل المدن دي أو مدن جديدة أقوله ايدي على كتفك بس اجبر الشركات إنها تنقل هناك (عن طريق تقليل الضرايب عليها زي المصانع في المناطق الصناعية في أكتوبر والعاشر) وهتلاقي الموظفين اللي معظم شعبنا يندرجو في فئتها نقلو مع شركاتهم وهم مبسوطين هربا من زحمة ودوشة وغلاء القاهرة

غير موافق على:
- اللي معاه أكتر من 1600 ياخد دعم زي اللي معاه أقل. والحل إن سقف السنة يترفع ل10 سنين فاتت
يعني الدعم يبقا لكل العربيات موديلات 2003 فما قبلها. إحنا في 2013 وهما بيتكلموا في 1990 و1995 الرحمة يا عالم شوية

**Abo Yasso** · 16-01-2013 11:17 AM

السلام عليكم
انا مش عارف تتعمل بموضوع السكن ده !!!
انا مثلا ساكن فى اطراف الجيزه وشغلى فى مصر الجديده بعمل حوالى 110 كيلوا فى اليوم ده لو انا من البيت للشغل ومن الشغل للبيت (زى الرا............) لآمؤخده
وكمان عندى ناس فى الشركه من سكان الآقاليم من الشرقيه وفى ناس من طنطا
مع العلم ان عندى ناس كمان من سكان مصر الجديده
موافق جدا على شرط تحويل التاكسى الى غاز ولو ان اغلب التكاسى عملين كده فعلا لآنه توفير كبير ليهم
الدعم بتاع ما قبل 1995 ده كتير قوى تتزق شويه لغايه 2000

**Dr-Daly** · 16-01-2013 11:20 AM

-تحديد الدعم بناءاً علي الفئات اللتريه ده لازم طبعا وإتأخر كتير قوي وكان المفروض يحصل من بعد زمن عبدالناصر علطول نظراً لتغير أيدولوجيه الدوله من الإشتراكي الي رأسمالي،
وأيضاً لتقنين الدعم اللي بيروح بهبل في الهواء!!
خلينا نتكلم بالعقل والمنطق: لما واحد مش معاه فلوس ومتوسط الحال زي ما حضراتكم بتتكلموا يعني أكيد موظف يعني مش مسافر سواح صح كده طيب هيروح يجيب عربيه صيني 2000Cc طب هوه جايبها ليه؟؟ منظره مثلاً؟؟ طب وياخد من الدوله دعم أكتر من غيره ليه طالما العدل والعقل بيرفضوا ده!!
الطبيعي لموظف متوسط الحالي زي معظم اهلنا يجيب فئه 1300CC-1600cc بأقصي تقدير ودي في معظم الأحوال تكفيه يتنقل بإرتياح شديد للزيارات الأسريه مثلاً بين مناطق الدلتا وخط القنال والقاهرة الكبري والإسكندريه كمثال، أما لو ناوي يسافر بيها الأقصر وأسوان أو شرم الشيخ ف الطبيعي يستخدم وسيله مواصلات تانيه صممت لهذا الغرض نطالب من الحكومه تحسينها زي الأوتوبيس أو القطار ده المنطق وده المعمول بيه في أوروبا الغنيه عنا بمراحل.،

-إعتراضي فقط علي الحد الموضوع ب ال 1800 لتر سنوياً ده لأنهم تقريبا يساووا حوالي 18,000كلم بإفتراض متوسط إستهلاك ١لتر/10كلم وأقترح رفع الحد الأقصي مثلاً الي 2000-25000لتر بكده هنغطي معظم الشعب العادي اللي عربيته مش بتمشي سنويا فوق ال25000كلم كمتوسط، مع منع الدعم عن سيارات الشركات الخاصه لأن الدعم مفترض يروح للشعب يعني المواطن مش للشركات الخاصه ذات الربحيه وأعتقد ساعتها مش هيبقي فيه مشاكل وإعتراضات منطقيه أخري
-أما الجزئيه الخاصه بالسيارات القديمه فأقترح بدأ التطبيق من سنه2000 بكده هندخل فئه كبيرة سياراتهم ليست ذات قيمه سوقيه عاليه ملاكها من الطبقه المتوسطه المفترض بالقانون مساعدتها داخل نطاق الدعم الجزئي
أعتذر عن الإطاله ولكم الشكر

**mohamed_selim** · 16-01-2013 11:28 AM

مين حدد متوسط استهلاك العربيه ب 25000 ؟ كبيرها من 15000 ل 20000 و احسبها لما نشوف عربيه مستعمله و موديل سنه معينه بيكون اغلبها فى الحدود دى و لو اكتر من 20000 فى السنه بيتخفس بسعرها الارض و نقول دى متهانه

**حماده المصري** · 16-01-2013 12:36 PM

معاليك الموضوع بكل المقايس تعبان مشوفتهاش في دوله حصلت قبل كده

وان كان حصل ف مش بالاسلوب ده ولو كان بالاسلوب ده ف في بدائل اكيد انما مش بالهمجيه دي

تعالى بقى نشوف حاجه مع بعض كده

اولا: رفع الدعم او ترشيد الدعم هو مطلب وواجب وطني ولازم يتنفذ فعلا ... لان لو دورنا حوالينا هانلاقي اننا ارخص سعر بنزين وسولار في الدول المحيطة عشان كدة بيتهرب وبيتباع سوق سوداء

هو بيتهرب ويتباع في فلسطين مش في الكونغوا عشان فلسطين جنبنا وسياسه السلطه هي دعم فلسطين

مشوفناش ازمات بنزين قبل الثوره

احنا ارخص الناس عشان العمله ضايعه مش عشان الدعم

اللتر ب 2 جنيه يعني بدولار واحد تجيب 3 لتر بنزين

تعالى شوف الامارات اللتر ب 2 درهم او اقل بشويه بسيطه

والدولار ب 6 جنيه وفي نفس الوقت ب 3 درهم ونص

فرق انحطاط العمله بتاعتنا دي هو الي عامل ان الموضوع رخيص مش عشان احنا بنبيعه رخيص

ده لان السعر العالمي للبترول بالدولار طبعا

-

الموضوع: البنزين - البنزين - البنزين

LinkBack

أدوات الموضوع

عرض

البنزين - البنزين - البنزين - انشر الموضوع فى :

-

-

-

-

-

المواضيع المتشابهه

أزمة البنزين ومؤشر البنزين لعربيتى الكورولا 2003 مانيوال

وزير البترول يناقش اليوم صرف البنزين بكوبونات لرفع الدعم عن البنزين

البنزين بقي يتشفط من بعد أزمة البنزين .. أستهلاك عالي ... حد بيحصل عنده كدة ؟

هل يوجد علاقة بين نوعية طلمبة البنزين واستهلاك البنزين وسحب العربية ؟

هل بالفعل يوجد مادة تضاف مع البنزين لتنظيف دورة البنزين؟

الكلمات الدلالية لهذا الموضوع

المفضلات

المفضلات

ضوابط المشاركة