الموضوع: شوية مشاكل فى فيكترا a برجاء المساعدة

مساء الفل على عصابة اوبل الجامدة

العربية معايا بقالها 4 شهور زى الفل مفيش مشاكل والحمد لله وحسب نصايح الاخوة هنا اول ما اشتريتها عملت سرفيس كامل سيور وبلى شداد وفلاتر وللذى منه

من يومين كدة لقيت العربية مخرفة وبتهيس ولمبة الشيك انجين بتنور ثانية وتطفى كدة مرة كل مشوار وبعدين بقت تزيد تنور مرتين تلاتة اوكل 10دقايق كدة حاولت اركز معاها شوية لاحظت ان كل مرة اللمبة تنور فيها العربية يحصل فيها زى نتشة زى الزغطة كدة وكمان صوت جاى من ناحية الكرسى اللى جنب السواق من عند الضفيرة كدا زى صوت سلكتين ملمسين او راديو مخروش كدة خايف ليكون حاجة كبيرة خصوصا ان العربية من ساعتها مكتومة وسحبها رايح وانا راكنها وخابف اطلع بيها برجاء المساعدة

وياريت لوفى صنايعى اومركز محترم لصيانة الاوبل يكون فى فيصل اوقريب من هناك لانى ببقا هناك مرةكل اسبوعين او عشر ايام


بالمرة بقى كمان انا طمعان فى كرمكوا انا بدات الاحظ ترشيح زيت من عند غطا التاكيهات وبعض النقط من عند مقياس الزيت او من تحت المقياس كدة من نص العربية




افيدونا يا جماعة انا خايف العربية تفتح بقها ........... شكرا مقدما

احب اشكر كل الاعضاء اللى ساهمو فى المشاركة دى بكل خبراتهم وفعلا لولا مساعدتعم كنت هدوخ سبعين دوخة مش سبعة بس بين الصتايعية الفتايين وبتوع قطع الغيار خصوصا انى من المنوفية يعنى الاوبل دى طلاسم بالنسبالهم

المهم جمدت قلبى واخدي العربية امبارح وركزت مع الصوت لقيته فعلا نفس المكان قمت فاكك الجزء الفبر اللى تحت التابلو ودعبست لقيت حاجتين سودة قولت واحدة منهم وفكيتها سالت عليها في شبين مالقيتهاش قولت بكرة الجمعة وانا معزوم عند حماتى :) فى فيصل قلت اسال عليها طبعا جبت اسماء بتوع قطع الغيار من المواضيع القديمة فى المنتدى واديتها تلفونات اللى يقولى مافيش حاجة اسمها كدة واللى يقوللى مش موجودة دور عليها استيراد لحد ما اتصلت بسرور شارع شامبليون قالى موجودة بس هات القديمة عشان نتاكد عشان ما بترجعش
روحت صليت الجمعة فى وسط البلد وروحت عليه جبتها لقيتها عندة ب 125 جنية وما رضيش ينزل مليم
روحت ركبتها بنفسى وجربت العربية مشوار صغير لقيتها تمام
بكرة ان شاء لله هسافر بيها واشوف النتيجة وابلغكم بيها

ومليون شكرا مرة تانية