الموضوع: المرجع الشامل فى مصطلحات التصوير

بسم الله الرحمن الرحيم

الموضوع ده يا جماعة هنخليه مرجع شامل لكل مصطلحات التصوير الفوتوغرافى
إن شاء الله اللى هيقرأ الموضوع ده هيقدر يفهم أى حوار يدور بين المحترفين بخصوص التصوير
من هنا تبدأ معرفتك بالتصوير وتقدر تستعمل نفس المصطلحات اللى بيستخدمها كل المصورين المحترفين فى العالم وتتكلم بنفس مصطلحاتهم

كاميرا إحترافية DSLR
إختصار الحروف بمعنى Digital Single Lens Reflex
هى ببساطة كاميرا تتميز ب 3 فروق أساسية عن أى كاميرا تانية
1- يمكن تغيير العدسات
2- تحتوى على سنسور كبير ، الجزء الحساس لإلتقاط الصورة ، أكبر من باقى الكاميرات ، وده ينعكس على جودة الصورة والألوان
3- ودى نقطة متفردة فيها وهى أنك ترى منها نفس ما تراه العدسة بالظبط ، لأنه يوجد مراية تعكس كل الضوء الذى يمر عبر العدسة وتسقطه على ما يسمى فيو فايندر view finder وده بتحط عينك عليه وتشوف منه ، الفرق إن أى كاميرا فيها فيو فايندر بيكون جنب العدسة يعنى مابيكونش شايف اللى العدسة شايفاه بالظبط إنما شايف جزء منه ، ده يفرق فى تكوين الكادر زى ما هنشرح فى مواضيع بعد كدة
ده شكل كاميرا dslr وهى بالمناسبة تعتبر أبسط موديل


الكاميرات الإحترافية بتكون نوعين على حسب مقاس السينسور :
1- كاميرات فول فريم full frame
ودى بيكون مقاس السينسور بتاعها 35 مم وهى الأكبر والأفضل

2- كاميرات كروب سينسور crop sensor or sub frame
ودى بيكون مقاس السينسور أقل من 30مم
دى صورة بتظهر فرق المقاس بين السينسورز المختلفة


فتحة العدسة أو الأبارتشر Aperture
دى ببساطة هى الفتحة اللى بيمر منها الضوء داخل العدسة ، وبيمز ليها بحرف إف F ورقم ، الرقم الأصغر يدل عى فتحة أوسع والرقم الأكبر يدل على فتحة أضيق
كل لما الفتحة بقت أوسع (رقم الإف أصغر) يبقا العدسة بتسمح بمرور كمية أكبر من الضوء وبالتالى تناسب التصوير بالليل أكثر والتصوير للحركات السريعة زى ، وده هنشرحه بالتفصيل بعدين لأنه من أهم المواضيع فى التصوير
دى صور توضح فرق المقاس بين أرقام الأبارتشر المختلفة


بتترواح قيم الأبارتشر من f/1.2 حتى f/36 وفيه أرقام أصغر وأرقام أكبر بس نادرة جداً
هنشرح الفرق بينهم بالتفصيل فى مواضيح لاحقة إن شاء الله ، بس ممكن نعرف إن كلما العدسة بقت أوسع (رقم أصغر) بتبقا أغلى بكتير

الشاتر Shutter
الشاتر سبيد هو سرعة إلتقاط الكاميرا للصورة ، وبتتقاس عادة بجزء من الثانية
مثلاً شاتر 1/250 يعنى الكاميرا فتحت لتمرر الضوء إلى السينسور لمدة جزء واحد من 250 جزء من الثانية
ممكن دى تبدو سرعة عالية على تفكيرنا ، بس دى فى التصوير سرعة عادية أو متوسطة
بتتراوح سرعة الشاتر فى الكاميرات الإحترافية من 30 ثانية ودى سرعة بطيئة جداً (نص دقيقة) وحتى 1/8000 من الثانية ودى سرعة عالية جداً
فايدة الشاتر سبيد ، إن كل لما ناخد الكادر أسرع كل لما قدرنا نثبت حركة أى جسم بيتحرك ونجيبه ثابت ، من أول مثلاً واحد بيجرى ، لحد ريش مروحة بتلف ، لحد رصاصة خارجة من مسدس ، لكن العيب على الناحية التانية إن لما بنعمل كدة بنقلل كمية الضوء اللى واصل للسينسور جداً ومابيبقاش كافى لتسجيل الصورة وهنا بنحتاج عدسة بأبارتشر واسعة (قيمة إف صغيرة) وده هنشرحه بالتفصيل فى مواضيع لاحقة
دى صورة توضح فرق الصورة لجسم بيتحرك مع إختلاف سرعة الشاتر

ونفس الكلام هنا فى حالة تصوير جسم بيسقط سقوط حر

وهنا الفرق عند تصوير جسم يدور مثل الملاهى مثلاً


الأيزو أو الحساسية ISO sensitivity
دى بتقيس حساسية السينسور للضوء ، بمعنى لو الأيزو = 100 يبقا السينسور هيحس بالضوء زى ما انت شايفه بنفس شدته الأصلية سواء بالنهار أو بالليل ، أما أيزو 200 يعنى إن السينسور هتبقا حساسيته الضعف وبالتالى إلتقاطه هيكون أقوى للضعف ، أو بمعنى آخر لو بتصور فى نص الإضاءة الطبيعية السينسور هيقدر يحس بيها كأنك بتصور فى إضاء طبيعية ، طب لو أيزو 400 ؟ يبقا ضعف الأيزو 200
بتتراوح قيم الأيزو من أول أيزو 50 حتى أيزو 25600 وأحياناً أكثر ، بس ضرورى هنا نأكد إن كل لما الأيزو بيرتفع بنقدر نصور بالليل أكتر لكن على الناحية التانية بتزيد النويز noise فى الصورة وده هنشرحه بالتفصيل بعدين
دى صورة بتوضح الفرق فى إستجابة السينسور للضوء عند إختلاف قيم الأيزو

ودى صورة أوضح كمان


البعد البؤرى للعدسة Focal Length
وده عادة بيمز ليه بقيمة بالملليمتر ، بحيث أنه كلما قلت القيمة تكون زاوية التصوير أوسع wide angle فنرى مشهد واسع جداً ، أما إذا زادت قيمة الفوكال لينس تصبح الزاوية أضيق وتكون العدسة فى هذه الحالة تليفوتو telephoto أى عدسة تقرب الأشياء البعيدة
تتراوح القيم من 8 مم وحتى 1200 مم
ولفهم التدريج ، العين البشرية على هذا المقياس تساوى 50 مم ، أى أن عدسة 50 مم ستعطيك مشهد يساوى ما تراه بعينك بالظبط ، أما عدسة 100 مم ستقرب المشهد مرتين ، وعدسة 24 مم ستجعل المشهد أوسع والأجسام أبعد
دى صورة توضح الفرق فى المشهد


عدسة برايم Prime lens
دى عدسة بيكون لها بعد بؤرى واحد ، يعنى مثلاً عدسة 50 مم أو عدسة 24 مم أو عدسة 200 مم
العدسات البرايم بتكون صورها حادة وقوية ولكنها تفتقد لإمكانية الزووم أو تغيير البعد البؤرى
وده شكلها


عدسة زووم zoom lens
دى عدسة بيكون ليها رينج من البعد البؤرى ، يعنى مثلاً 18-105 بمعنى إنها بتقرب وتبعد الصورة فى حدود الرينج ده ، أو 24-70 أو 70-200 أو 18-200
ضرورى نفهم هنا حاجة ناس كتير بتغلط فيها
عدسة زوم مش معناها إنها بتقرب الحاجات البعيدة ، لأ ، معناها إنها ليها رين من البعد البؤرى ، فمثلاً عدسة 10-22 هى عدسة زووم ولكنها لا تقرب شئ لأن الرينج بتاعها كله أقل من 50 مم يعنى أقل من الصورة اللى بتشوفها العين البشرية
حاجة تانية هى ال إكس X اللى كل الناس عارفاها
الناس بتفتكر إن كل لما ال إكس زادت معناه الكاميرا بتقرب أكتر ، وده برضه غلط
مفاجأة ؟
أيوة غلط
لما تكون عدسة 10-20 بنقول إن الزووم بتاعها 2 إكس ، وعدسة 100-400 تبقا الزووم بتاعها 4 إكس ، وعدسة 200-400 يبقا الزووم بتاعها 2 إكس برضه ، يعنى الإكس هو مجرد الفرق بين أبعد صورة وأقرب صورة ولكنه لا يعنى أبداً التقريب الكلى للكاميرا ، فمثلاً العدسة 18-200 تساوى 11 إكس ، والعدسة 100-400 تساوى 4 إكس ولكن الأخيرة تقرب أكثر من الأولى بمقدار الضعف برغم إنها 4 إكس مش 11 إكس
تمام كدة ؟
دى صورة بقا للعدسة الزووم ، وهنلاحظ إنها أكبر وفيها رينج أو بكرة زيادة عشان تغير منه البعد البؤرى


الترايبود tripod أو الحامل ثلاثى الأرجل
هو الحامل اللى بنحط عليه الكاميرا عشان نثبتها أثناء إلتقاط صورة بشاتر بطئ وذلك لمنع الإهتزاز


المونوبود Monopod حامل ب رجل واحدة
ده أفضل من الترايبود أنه أخف وسهل الحمل والإستخدام ، ولكنه لا يصلح لترك الكاميرا عليه بمفرده بل يجب الإمساك به
ده شكله

ودى طريقة إستعماله الصحيحة


الغوريللا بود Gorillapod
ده بيكون زى الترايبود بس حجمه أصغر بكتير وبتكون أرجله مفصلية ، ويفيد فى تعليق الكاميرا على جسم بارز أو سطح غير مستوى كفرع شجرة مثلاً
دى صورته


مانع الإهتزز image stabilizer
فى كانون يطلق عليه IS وفى نيكون يطلع عليه VR وفى عدسات سيجما يطلق عليه OS
فى النهاية المعنى والوظيفة واحدة وهو عبارة عن ميكانيزم بداخل العدسة مسئول عن تقليل إهتزاز يد المصور بشكل كبير وده لضمان صورة ثابتة غير مهزوزة ، ملحوظة عند إستعمال شاتر سريع لا نحتاج مانع إهتزاز لأن السرعة العالية كفيلة بألا تعطى لأى حركة مهما كانت صغيرة ، أما عند التصوير بشاتر بطئ فى الليل مثلاً فإستعمال مانع الإهتزاز يفيد جداً جداً ، لأنه ليس فى كل صورة يكون إستخدام الترايبود ممكناً
ده شكله


عمق الميدان أو مجال الصورة DOF
وده إختصار لمصطلح Depth of Field
كل لما عمق الميدان يزيد ويبقا أعرض معناه إن كل الأجسام فى الصورة تظهر بنفس الوضوح ، أما إزذا كان ضيق تكون الأجسام البعيدة فى الخلفية مشوشة أو ممسوحة ، وده ميزة ومطلوب جداً فى عمل عزل للخلفية والتركيز على العنصر أو الشخص المراد تصويره ، وبيتم التحكم فيه ب 5 حاجات مش هنقولهم دلوقتى وهنعملهم موضوع لوحدهم إن شاء الله لأنه موضوع مهم جداً فى التصوير
دى صورة توضح يعنى إن كل الأجسام البعيدة بتطلع ممسوحة شوية أو blurred وده مش عيب فى التصوير ولا حاجة بالعكس ده مقصود

وفى الصورة اللى تحت هنشوف الكاس الأخضر والأصفر تم عزلهم لصالح إظهار الكاس الأحمر أكثر


الفلاتر Filters
هى فلاتر من الزجاج لها خصائص معينة توضع أمام العدسة (أحياناً داخل العدسة) لإعطاء تأثير معين
ده شكل الفلتر


الفلاتر أنواع كثيرة ، سنذكر بعضها هنا
فلتر يو فى UV filter
يحمى من الأشعة الفوق بنفسجية ، ودى كانت ذات تأثير ضار قديماً أيام التصوير بالفيلم ، أما الآن معا إستخدام السينسور الرقمى لم يعد له تأثير يذكر ولم يعد لهذا الفلتر دور مهم ، ولكن مازال يستخدمه الكثيرون كحماية لزجاج العدسة نفسها من الخدش أو الكسر
شكله زى اللى موجود فوق

فلتر بولاريزر Polarizer filter
ده بيعطى تأثير لون السماء بيكون أزرق أكثر ، وبيلغى تأثير الإنعكاسات من على الأسطح وبيعمل تجسيم للسحاب
ده شكل صورتين بيه ومن غيره
هنا هنشوف تأثيره على لون السماء

وهنا تأثيره على تجسيم وإبراز السحاب وأيضاً لون السماء


فلتر إن دى ND
إختصار Natural Density
ده مجرد فلتر إعتام وبيسمح بإستخدام شاتر بطئ عندما تكون الإضاءة قوية فى منتصف النهار ، وده بنستخدمه عند تصوير شلالات المياه والأمواج وتصوير الشوارع بحيث تظهر السيارات كخطوط مضيئة متصلة
ده شكله

ودى نوعية الصور اللى بيستخدم فيها
المياه الضبابية

والشوارع


الفلتر النجمى star filter
بيستخدم لإعطاء بريق مميز لكل نقطة تلمع فى الكادر ، مثل كشاف إضاءة بعيد أو إنعكاس أو لهب شمعة
وبيتحدد نوعه على حسب نوع الأشعة اللى بيعملها سواء 4 أو 6 مثلاً
ده شكله


وده تأثيره




أنواع التصوير
التصوير أنواع كثيرة هنذكر بعضها بس
الأشهر تصوير البورتريه Portrait
وهو ببساطة وبدون شرح هو تصوير الأشخاص


تصوير اللاندسكيب أو المسطحات landscape
مثل تصوير البحر والمدن والحدائق


تصوير الماكرو macro
هو تصوير الأشياء الدقيقة كالحشرات مثلاً


تصوير الأبستراكت Abstract
وده إعطاء تركيز أو كلوز أب على شئ عادى غيرمألوف تصويره وإظهار شئ من الجمال أو المعنى فيه ، وده أقرب للفن منه للتصوير


تصوير العمارة Architecture
هو تصوير المبانى من زوايا غير مألوفة وإظهارها الجمال فى التصميم



أتمنى تستفيدوا من هذا الموضوع وترجعوا إليه عند الحاجة
تحت أمركم فى أى إستفسار أو توضيح
الموضوع من إعدادى الشخص وكل حرف مكتوب فوق كتبته من دماغى دون نقل من أى أحد ، ما عدا الصور بحثت عنها فى جوجل ووضعتها فى أماكنها المناسبة لتوضيح الشرح
يمكنكم النشر وإحتسبوا النية لله بنية نشر العلم
تحياتى وأى إستفسار تحت أمركم