اقتباس المشاركة الأصلية كتبت بواسطة wild_man مشاهدة المشاركة
معظم الهجوم مش على البنات نفسهم, بقدر ماهو على الأهل و طلباتهم و المقارنة بين نفسهم و بين غيرهم من ناحية الماديات...

لو فعلا عاوزين نعمل حاجة مفيدة و تبقا عمل ايجابي بدل ما احنا قاعدين نتبادل الاتهامات... ممكن البنات يعملوا نوع من التوعية و التغيير لأفكار أهلهم في الموضوع ده, لأن ياما جوازات حلوة جدا و الأهل يبوظوها بحكمتهم المعهودة في مثل هذه المواضيع
علي فكرة ده فعلا بيحصل
انا كان مرة اتقدملي شاب كان زميل صاحبتي في الكورس وعرض عليا انه يتقدملي وقالي علي كل امكانياته ورحت قلت لأهلي وهما في الاول عارضوا شوية وقالوا لأ وكانوا بيتقلوا عليه في الطلبات شوية (مش افترا منهم يعني بس عقليات اهالينا بتختلف عن عقلياتنا شوية)
ورغم اني مكنش في بينه وبينه قصة حب وكان يعتبر جواز صالونات بس انا كنت هاوافق عليه عشان اخلاقه ولإنه فعلا انسان محترم وعايز يدخل البيت من بابه من غير لف ودوران وبالفعل انا قعدت مع اهلي اكتر من مرة وهاجمتهم عشان بيتقلوا عليه في الطلبات وحاولت اوصل الموضوع بين الطرفين لحلول وسطية وكل حد مننا يتنازل شوية مش شرط يعني نجيب احسن سفرة ولا افضل انتريه يعني ومش شرط نفرش ال 5 اوض كلهم قبل الجواز يعني وحتي في الشبكة قلتله قدم اللي تقدر عليه في الشبكة وانا عندي شوية دهب صغيرين كده احطهم علي تمنها ونجيب حاجة معقولة وفعلا اهلي ابتدوا يستجيبوا شوية بشوية وكانوا خلاص بيتفقوا بس محصلش نصيب لأسباب تانية خالص بعيدا عن موضوع الماديات ده.

بس الموضوع محتاج شوية تروي وتفاهم
وكمان في نصيحة حلوة اوي سمعتها بخصوص الموضوع ده
لو شاب عايز يتقدم لبنت لو كان يعرفها قبل مايدخل بيتهم يعني مش شرط يكون مصاحبها يعني
يقعد معاها ويفهمها وضعه المادي ايه وايه بالضبط اللي يقدر يجيبه ويفهم منها ايه طلبات اهلها والله كل واحد فيهم عرف يقنع اهله بإمكانيات التاني خير وعلي بركة الله يروح يتقدم وخلاص مش هايحتاج يتكمل في ماديات اساساً متفقوش خلاص محصلش اي حاجة ومخسروش حاجة ويعتبروا الموضوع مفيهوش نصيب وبس من غير ماطرف يعيب في التاني ويلوم علي ماديته وطمعه.
والبنت هي تبقي حلقة الوصل بين الاتنين زي ماعملت انا كده عشان ميحصلش صدام بين الاهالي وبعضيها او بين العريس واهل العروسة.
لإن في الاخر هما الاتنين هايعيشوا مع بعض والعفش والكلام ده هايبقي شوية كراكيب وخشب محطوطة في البيت واللي هايفضل هو العشرة الطيبة والمودة والذرية الصالحة.