×★ ☆ بالصور : تقرير عن عمل عزل وكتم للصوت للعربية بالكامل وبالتفصيل ☆ ★×

**Y a r i s** · 01-02-2013 12:40 AM

طيب هو مبدئياً انا مش عارف اسمي عنوان الموضوع ايه
هل زيادة لعزل تويوتا يارس وبقيت العربيات ممكن تتبع نفس المنهج
هل اسمي الموضوع عمل كتم لصوت الكبينة لليارس
او هل اسميه كيف اركب طقم سيستم ساوند ... هو الموضوع طويل طويل ... بس المشكلة ان مفيش تشجيع ، يعني انا مش بطلب الاقي ناس بتسقفلي وتقلي برافو ههههههه. لا لا انا قصدي تفاعل مع الموضوع ولو الواحد يعرف. نص معلومة ميبخلش علينا بيها فمين عارف ممكن معلومة تافهة. قديمة انتا تعرفها غيرك معندهوش فكرة عنها ... الموضوع منقول من منتدى غربي قسم اندونيسيا منتدى مخصوص فقط لليارس فقلت انقلوا كصور فقط واترجموا بفكري وبطريقتي واسلوبي علشان كل الناس العرب تستفيد منو واهو فكرة صغيرة ممكن بتوسع مدارك الواحد ... وتبقى زي الشرارة كدة لافكار وافتكاسات اخرى .

نقول
بسم الله الرحمن الرحيم

الجزء الاول : عزل الشنطة

اولاً هنجيب العوازل الي بالشكل ده ... انا معرفش بتتباع فين
علشان كده لمن اطرح الموضوع ممكن يطلع واحد ابن حلال ويقلنا اه واللهي انا شوفت العازل ده في المكاني الفلاني مثلاً :

ده جهاز لقياس مستوى الضجيج في السيارة

لاحظ نسبة الضجيج في السيارة

عاوزين بقه نفور او نشيل كل حاجة في الشنطة ( استيبن وسجاد وخلافوا )

نبتدي بقه نلمع ونمسح الصاج الاصلي للعربية

هنجيب العازل ونبتدي نجلد ونلزق كل حته متستعجلوش هحطلكم صورة صورة
لكل حاجة المفروض تتجلد وطبعاً من المعروف الصاج بيرن والسجاد بيكتم شوية صوت لكن مع العازل بتعنا بقه هنتكم خالص الصووت منها اننا منسمعش الضجيج الخارجي للسيارات ومنها علشان زي ما هتشوفوا في الموضوع وتكملتوا ازاي هنركب سب وفور بحيث انو تعمل زلزال العربية لمن تشغل البييز

بالنسبة للسجادة الي في الجنب بتجيب ملقط وتفكها
بلاش الشغل الفلح ونجيب مفك وننتر الكيلبسة على فكرة الكليبسة الوحدة الاصلية ب ٥ جنية
وهنفك السجادة الي في ظهر الشنطة

بس ياسيدي وبنتدي نجلد الشنطة والظهر والجناب
بحيث انها تعمل عزل للشنطة

اهم حاجة الشياكة في الشغل يا جماعه بلاش الشغل العفش

كدة خلصنا اول جزء اننا عزلنا الشنطة كويس جداً جداً

**Y a r i s** · 01-02-2013 12:41 AM

الجزء الثاني : عزل الكبينة .

بعد ما عزلنا الشنطة هنخوش بقة لعزل الكبينة بارضيتها
ونفك الكراسي بالظهر بالقعدة بكلو ونطلعها بره علشان نشتغل على رواق

الجزء ده الي تحت الكرسي الخلفي ممكن نستغلوا في تركيب الجي ام
وممكن نملاه صوف حراري او زوجاجي كعازل للصوت وممكن نجلدو

المهم منسيبهوش كده طرزان صاج على اللحم

هنفك كمان الرف الاصلي بتاع الفبريكة ونجلد تحت منو

طيب هنجيب بقه يا حلو طقم سمعات نضيفة
وجوز سمعات بيضاوي وعلى فكرة اليارس السمعات الخلفية لليارس بيضاوي
بس مش مكتوب عليها لا تويوتا ولا يابان ولا هم يحزنون

طيب كمان نفك ياحلو جناب القايم الخلفي
بسم الله مشاء الله والله اكبر

اللهم صلي على النبي
ياجدع قوول ( عليه الصلاة والسلام ) حسنة ببلاش كده

بس يامعلم ونبتدي نجلد الرف والقوايم

نجلد حتى العلبة البلاستيك بتاعت القايم

خلي بالكو اننا بنستخدم العازل حتى ورى النمر بتاعت العربية
علشان مع تشغيل صوت الكاسيت بتلاقي الصاج بتاع النمر بيدب في الشنطة

ثم نرجع كل حاجة مكانها
هههههههه اذا عرفت وابقى تعاله قبلني لو عرفت هههه

**Y a r i s** · 01-02-2013 12:42 AM

الجزء الثالث : .

هنجيب بقه جي ام حلو كده او اتنين انتا وامكانياتك
وعلى فكرة لسه مخلصناش موضوع العزل ده لسه في عزل الابواب

هنمدد الاسلاك من تحت السجاد وبلاش الشغل العفش
الناس الي بتمدد من البلاستيكات بتاعت العتب

لاحظ الطبة بتاعت الاسلاك تحت درج التابلوة

شوف بقه الشياكة فاكر الطبة الي فوق نطلع منها بمنتهى السلاسة سلك الكهربا
علشان ناخود وصلة من البطارية يامعلم

شغل على مية بيضه اهو
مش الكوفتاجية بتوع الكباب والطرب والعك الي بيعملوه في عربيتنا

ده الجهاز مش عارف بتاع ايه

طيب لمن نشوف بقه جزء الرابع الاجمل والاجمل
بتاع عزل الابواب وتركيب سمعات فيها

**Y a r i s** · 01-02-2013 12:43 AM

الجزء الرابع : تركيب السمعات والعزل في الابواب .

نفك السمعات بتاعت الفبريكة ونرميها في الزبالة

طيب نبتدي نجلد الباب من جوا بالعازل
ولك ان تتصور بقه ازاي لمن يبقى صوت الابواب مكتوم

بعد ما جلدنا الابواب من جوا كمان زيادة الخير خيريين
ونقفل كمان المكان الفتحات الفاضية بحتت ابلكاشة كرتونة اي حاجة يبقى كده احنا حولنا باب العربية من باب. لصندوق يديك بيز ويمنع الصوت الخارجي

ونقفل ورى السماعة كمان بعازل

ونزيد العازل عازل

وبعد كده خالص بدل ما نحط الكيس المشمع بتاع الفبريكة نحط عازل

ونحط فوق العازل عازل قماشي

وبعد مانعمل العازل ونركب السمعات
نيجب بقه نركب تويترات مريات جانبيه
ومحدش يقلي بتتجاب منين موجودة في اندونسيا فقط

ونيجي للبيبان الخلفية
نشيل المشمع الي في الابواب ... ونبقى نفرشوا تحت المرتبة الي هينام عليها
بتوع مصنع تويوتا ههههههه

ونبتدي نحط عازل زي ماعملنا قدام

حتى الديكور بتاع الباب الفيبر البلاستيك بتاع الابواب
نبتدي نجلدوا من جوا

الباب الامامي التاني كزالك

**mazagngi2010** · 01-02-2013 01:15 AM

متشكرين يامعلم شغل على ميه بيضا وبعد كل ده الجهاز قرا كام؟
فيه موضوع مصرى صميم و تحفه كان عامله الاستاذ عصام غنايم عن عزل اللانوس من الاخر
http://www.nilemotors.net/Nile/315571-a.html

**bmya** · 01-02-2013 01:29 AM

يا ياريس باشا شغل ميه ميه تسلم ايدك طيب مقولتش ايخ الاخبار بعد العزل وبعدين العازل ده نجيب منين بقه في مصر عاوز اعمل السيريون اسمه ايه وبكام

**Y a r i s** · 01-02-2013 01:56 AM

تسلم ايدكم انتم بجد يا شباب
بجد حبت مواضيع انا مشوفتهاش قبل كده بس ممتازة ومواضيعكم على مواضيعنا كده يبقى عندنا خلفية قوية وحصيلة معلوماتية عالية ربنا يخليكم ليا يارب. وميحرمنيش من مشاركاتكم الجميلة .... اقولكم كمان على حاجة انا لمن رحت معرض العربيات اتوماك وركبت العربيات الفخمة ورغم دوشة المعرض الا اني بمجرد ما قفلت الابواب حسيت بهدوء بهدوء قاتل مكنتش سامع ولا نفس ولا صوت من دوشة المعرض لدرجة اني كنت بسمع صوت النفس الي طالع وداخل لصدري وحسيت سدري بيشخلل كده من السجاير من كتر الهدوء والعازل بتاع الصوت الي في الاستروين. والمارسيدس والبي ام والفولفوو. والاوبل. بجد عربياتنا تفتقر للعوازل الي نزلة فيهم. :). وتحياتي

-

-

-

الموضوع: ×★ ☆ بالصور : تقرير عن عمل عزل وكتم للصوت للعربية بالكامل وبالتفصيل ☆ ★×

LinkBack

أدوات الموضوع

عرض

-

-

-

المواضيع المتشابهه

عملت فرش جلد لـ GEN-2 إسود x بيج للعربية بالكامل عند جينز كار

تقرير : إضافة عازل للصوت لشنطة السيارة !!!

بالصور هيونداي ماتريكس موديل 2006 جميع الكماليات مانيوال فابريكا بالكامل

بالصور: سيارتان محترقتان بالكامل في عباس العقاد

الكلمات الدلالية لهذا الموضوع

المفضلات

المفضلات

ضوابط المشاركة