دلوقت القانون الجديد بتاع المرور هايتطبق من غير اي زيادة في العلامات الارشادية او التوضيحية . . . يعني موت وخراب ديار
امبارح كنت راكن في مكان طول عمرنا بنقف فيه من غير مشاكل ولا قلق . . . ميدان المحطة عندنا في بنىسويف بعد ما طوّروه وياريتهم ما طوّروه
قللوا اماكن الانتظار بصورة رهيبة وخلوها في نص الميدان بس
اي حد يركن بمحاذاة الرصيف بكامل الميدان يتاخد مخالفة بدون سابق انذار يعني مافيش اي حاجة تقول ممنوع الانتظار
كنت عند الدكتور ورجعت لقيت ورقة ملزوقة ع الازاز بتقول الانتظار في الممنوع . . . طب اتمنع امتى؟؟؟ منعوه ليه؟؟؟ طب انا هعرف ازاي انه اتمنع؟؟؟ هشم على ضهر ايدي؟؟؟ طب متعرفونا يا جماعة . . . مش احنا اسرة مع بعضينا؟؟؟ مش عارف ليه الحكومة والمرور في وادي واحنا في وادي؟؟؟ هو احنا مش الشعب وهم في خدمة الشعب برضه؟؟؟
انا مش زعلان ع المخالفة اد مانا زعلان اني ملتزم بالقواعد والتعليمات ومع ذلك هدفع مخالفة!!
ع العموم الموضوع برضه فيه نقطتين عجبوني :laugh:
1- انهم لزقولي ورقة تعرفني :p
2- امبارح كان 28-7-2008 يعني لسه 1-8 ماجتش