الموضوع: مساعدة من مالكى النيسان - هشتغل خدمة عملاء فى نيسان

السلام عليكم و رحمه الله و بركاته

محتاج مساعدة من مالكى النيسان علشان هشتغل خدمة عملاء على التليفون فى بروجيكت أوتموتيف لسيارات نيسان

أنا كل خبرتى فى السيارات أنى بعرف أسوق المانيوال و الأتوماتيك
مش أكتر لكن معرفش مكونات السيارة و معرفش المصطلحات اللى بتتقال من الأعضاء الخبراء هنا فى المنتدى

أنا عندى أنترفيو مع مدير البروجيكت بعد أسبوع

أية اللى المطلوب منى أعرفة عن سيارت نيسان و أية اللى أقدر أفيد بية العميل من معلومات لما يتصل بيا يستفسر هو أكيد على السيستيم هيكون عندى مكونات السيارة و مميزاتها و سعرها

لكن أنا فية مصطلحات كتير مش هكون عارف معناها لو العميل سألنى فيها

مثلا أنا فتحت موقع نيسان حاليا و بشوف مميزات نيسان صنى سوبر صالون
يعنى أية باور سترينج و يعنى أية أوفر درايف و يعنى أية فرامل abs هل ال abs اللى هو مانع أنزلاق السيارة فى المطر مثلا ؟؟ و الجنوط اللى هو العجل بتاع السيارة ؟؟ و أية هو ال ebd ?? و ال ba و التعليق الرياضى ؟؟

و ياريت لو فية أى مصطلحات تانية حد يقولى معناها علشان أقدر أفيد العملاء و أكون فاهمهم

و أية أهتمام عملاء نيسان لما بتتصلوا بخدمة العملاء الأسئلة بتكون على أية ؟؟

و أية هى الموديلات الحالية اللى عليها أقبال من الشعب المصرى ؟؟

هنتظر ردودكم و مساعداتكم

مع تحياتى للجميع

من الحاجات المهمه جدا ان حضرتك لو حد سألك عن معلومه و مكنتش عارف الاجابه انك تقول للعميل انك هتسأل و ترد عليه او تحوله للشخص المختص اللى يقدر يفيده بالمعلومة الصحيحه سواء كان مسؤول مبيعات او قطع غيار او حتى احد المهندسين . يعنى مش لازم تبقى فاهم فنيا بحيث ان واحد يقولك مشكله فتقوله الحل لكن تبقى عارف مين اللى عنده المعلومه و يقدر يساعده لان دة بيفرق مع العميل جدا بدل من لو حد فتى عليه لمجرد انه مش عايز يعترف انه مش عارف الاجابه و جزء كمان مهم هو الاستماع لشكاوى الناس و محاوله حلها مع الأطراف المعنيه لأن ده بيحسس العميل انه اشترى حاجه قيمه و ان التوكيل بيهتم به و مش بس عايز ياخد منه فلوس و خلاص.

بالنسبه لموديلات نيسان لازم تبقى عارف الفروق ما بينها يعنى الفرق بين الجوك و القشقاى او مثلا الفروق بين الصنى السوبر صالون و ال ex فى الشكل الجديد و الاختلاف بين ال ex ما بين الشكل القديم و الجديد

برضه يستحسن تبقى عارف مواعيد الصيانات لكل موديل و ايه اللى بيتعمل فى الصيانات دى او تبقى مجهزها فى ورقه و اكيد طبعا التكلفه المبدأيه و بالنسبه للمقابله حاول تطلع من ال Wikipedia معلومات عن تاريخ شركه نيسان و تطورها بصفه عامه و تاريخها فى مصر لان ده بيعطى انطباع كويس انك مهتم بالشركة و فخور بالانضمام ليها و بالتوفيق