الشكر كل الشكر لله اولا ثم ليك
انت موضوعك فعلا هايل جدا وان شاء الله هيكون مرجع كويس اوي لأنه جديد من نوعه وان شاء الله يكون شامل ومفصل ومصور - ودة الجديد فيه
في انتظار باقي السلسلة كما اتفقنا وعلي ما تعمل السلسلة ان شاء الله تكون العربية خلصت واعتقد هيتزامن الأنتهاء منها مع انتهاء السلسلة.
كل الشكر ليك مرة اخري والف مبروك العربية وربنا يتممها علي خير ان شاء الله
اما عن تقيمي للنص - ففعلا اختيار جديد كلياً
وعشان تبقي عارف
فولكس عملتها قبل كدة بس مانزلتش مصر للأسف (او لحسن حظنا - الله اعلم)
فولكس نزلت مرة الأبيزا تحت اسم بولو بلايا Playa وتحمل شعار فولكس - واعتقد الكلاسيك امتداد ليها - واكبر دليل علي ان عربيتك دي سيات بشعار فولكس انك هتلاقي البطارية في نفس المكان بتاعنا (وليس تحت الطوربيدو) وكمان قربة المياة في مكانها عندنا (يمين فوق ماستر الفرامل) وكمان خزنة زيت الباور (شمال البطارية وليس امام الردياتير) وكل دة مش نفس الأماكن بتاعة البولو - يعني البولو كلاسيك اقرب للأبيزا من البولو هاتش او البولو فوكس دة غير طبعا تشابه الفوانيس والكبوت والغمازات والفلاشرات.
وانا شوفت ابيزا كتير بالأكصدامات دي وفعلا شكلها بيبقي تحفة ومختلف
وكان معانا هنا عضو بس انت ماتفتكروش (ابو جاسر) كان راكب عنده الأكصدامات دي
انت ممكن تعمل الهوايات شبك حديد وتدهنا اسود بأطار احمر بتخلي العربية شكلها رياضي جداً
والموتور دة ميزته انه 1600 بس مش هيدخلك ان شاء الله في الشريحة بتاعة الدعم عشان 1595 سي سي
والمنافولد الحديد دة بيبقي مميز جداً وبيفرق كتير مع العربية
ياريت تعرف تجيب عفشتها الخلفية كمان وتركبها عندك عشان الأستبليزر بار اللي بينزل معاها ولو عرفت تجيب باقي الكيت هيفرق معاك جدا (يمكن تلاقي الكيت دة في الحرفيين وبيركب من داخل الشنطة وبيمسك البطاحات الخلفية ببعض ومش بياخد مساحة في الشنطة)
اما عن الطابلوه والعدادات فدي مختلفة عن عندنا كتير
احنا نهاية الأر بي ام عند 6.5 وليس 7 والred zone من 6 وليس 6.5
كمان الأضاءة عندنا برتقالي - هتلاقيها عندك اخضر
كمان السرعة عندنا 200 وليس 220
وطبعا اختلافات السرعة والأر بي ام عشان اختلاف المحركات
ربنا يا رب يباركلك فيها ويديك خيرها ويكفيك شرها
تحياتي ليك
المفضلات