الموضوع: مشكله في الفيكترا وعجز الصنايعيه عن تحديد السبب

السلام عليكم ورحمة الله
من فتره كان عندى كوبلين شمال باظ واتكسر والعربيه وقفت ... وغيرته بواحد جديد وركب تمام ..

اول ما الكوبلن اتركب ببص لقيت عداد السرعه واقف .. ومش بيشتغل خالص ..

رحت لكهربائي .. قالى دي شغلانة ميكانيكي ..

رحت عند عبدالعزيز اوبل ( الأسكندريه ) فك العجله الشمال وبص على حساس السرعه لقاه راكب ..

حطينا العربيه عالكمبيوتر طلع الايرور التالى .. No Speed Signal

ولحد هنا مش قادرين نحدد العطل منين ... ووديتها لاكتر من صنايعي بعد عبدالعزيز مقدروش يعرفو العطل منين ..

مع العلم ان قبل ما الكوبلن يتكسر كان فيه حاجه غريبه بتحصل ... مش عارف اذا كنت هقدر اوصفها ولا لأ :) ..

لما العربيه تبقي واقفه وتيجي تحود لدركسيون لحد الاخر تلاقي طقه ومع الطقه دى العداد يترفع لحد 120 مثلا وينزل تانى للصفر ... كذلك الامر يمين وشمال ..

انا كنت فاكرها علبة دركسيون ... بس لما غيرت الكوبلن الطقه دى راحت والدركسيون شغال عادى جدا


وكذلك الامر لما الكوبلن اتكسر ... كنت بدي للعربيه غيار وادوس بنزين الاقي العداد بيلعب مع نفسه وصوت تكسير من قدام عشان الكوبلن اتبري ..

من يومها وانا سايب العربيه مش بحركها عشان خايف الاعطال تكتر بس بجد تعبت من الموضوع ده رحت لصنايعية الدنيا كلهم محدش عارف العطل منين ومعظمه بيقولي روح التوكيل بس مستحيل يعني ميكونوش عرفين العيب فين !؟؟؟؟؟؟؟؟؟


وعندى حاجه تانيه بس دي مش مؤثره على المشي خالص .. انى لما بحط بنزين 92 وبمشي شوية الاقي لمبة check engine منوره والأر بى ام واطى ولازم تزود بنزين .. لما رحت حطيتها عالكمبيوتر مطلعش حاجه لانى كنت حاطط 90 ... ده ممكن يكون من ايه ؟؟؟


انا عارف ان الموضوع صعب ومتعب شوية بس بجد جزاكم الله خيرا على المجهود المبذول فى المنتدي هنا :) .....