الموضوع: تجربه العملاق كاسترول ماجنتك نصف تخليقى

السلام عليكم

مبدئيا عربيتى ابيزا 94 راكب فيها موتور 1.4 انجكشن apq
كنت بدور على زيت اغيره لان اللى عندى كان بيطلع فى الروح ولو رجعنا لورا شويه هنلاقى انى اول ما سقطت المكنه حطيت موبيل اقل حاجه ال1000 كم وده لانى كنت همشى بيه عشان انضف المكنه مطرح الركنه وركبت فلتر بص مظنش انه اصلى وبعدين حطيت زيت شيل الاحمر 3 الاف كم بدون تغيير الفلتر برضه وقعد معايا فتره مش بسيطه وبعدين قلت كفايه عليه كده والفكره مش عدد الكيلومترات بس الفكره فى الوقت وده لانى مبشيش بالعربيه مشاوير طويله فى العاده
بعد تجربه محمد سيد مع الليكو مولى شجعنى بصراحه انى اجيبه وخصوصا النصف تخليقى ال10 الاف كم وعلى ذلك ظبطت امورى واخدت ارقام الموزعين ولما كلمت الراجل فى التليفون قاللى انا فى المعادى عمارات صقر قريش رحت خاطف رجلى لحد هناك بالعربيه وللاسف ملقيتشى عنده ليكوى مولى بس قاللى عندى حاجه افضل منه ومرشحه بقوه لمواتير فولكس الا وهى الكاسترول الماجنتيك 10كم وبعديها موبيل 1 نصف تخليقى بس ده لو مفيش كاسترول قلتله بكام قاللى 195 4 كيلو يكفوا العربيه ويزيدوا بالفلتر اخدت جركن وطرت لفيصل اشترى الفلتر وجبت حاجه كوبى بس كويسه ب40 جنيه وبعديها على بتاع غيار الزيوت اول ما شاف الزيت قالى ده كويس جدا وسالنى على سعره وقاللى انه للاسف مش شغال فيه بس عنده الموبيل ودخلت فى نقاش قصير مع صاحب المركز عن الزيوت التخليقيه وان عربيتى موديل اقدم من انه يتحطله زيت تخليقى ولازم يكون معدنى وانه حتى لو نص تخليقى هيحتاج يتغير قريب مش 10 الاف زى ما موصى بيه بس للاسف المناقشه مكملتشى عشان كان وراه شغل وللعلم الراجل ده كان شغال فى شركه بترول وكلامه يرجع لمحاضرات كان بياخدها عن انواع الزيوت والانسب للمواتير
غيرت الفلتر بعد ما كلمت محمد سيد ومع انه اكد عليا ان المكنه بتاخد 3 وربع لتر بالفلتر الا انه الراجل كان مفضى ال4 لتر بالكامل جوه قلب الموتور وملحقتش اقوله بس هو اكد ان 3 لتر ده كلام فارغ ومينفعشى بس فى الاخر رضيت بالامر الواقع
نيجى بقى للمهم الانطباع
1- صوت المكنه متغيرشى بس هى من الاول صوتها هادى مفيش صوت تاكيهات واضح وعلى ذلك مفيش تغيير فى الصوت
2- فى السحب حسيت بنعومه اكثر والمكنه مش مجهده فى اخد السرعات وللعلم العفشه مدمره والبليه خشنه بشكل لا يصدق
3- فى بدايه دواره العربيه كان الصوت خشن لمده ثانيتين او تلاته فى الشتاء الصوت تقريبا خف جدا نقدر نقول انه اختفى
4- معنديش حساس الكوعه بس مفيش تغيير فى درجه الحراره يعنى العربيه هى هى
5- لون الزيت عسلى نقى ومميز بعض الشئ مستنى يويمن او تلاته كمان واشوف المقاس ولون الزيت
6- كنت ماشى على شارع الهرم وعمال عن عن عن عشان الزحمه والطريق خلاص بيفتح قدامى لاحظت دخنه بيضه جايه من قدام وبصراحه متأكدتش جايه من الموتور ولا من عربيه من الفولكس اللى قدامى وعليه جريت بالعربيه وقرصت شويه يعنى كنت بجيب اخر الغيارت عشان اشوف الدخنه جت منين بس الحمد لله مفيش اى دخنه او ريحه احتراق حتى مع الضغط

-كنت كلمت محمد سيد فى نقطه ايه اللى يميز الماجنتيك واكدلى ان حبيبات الزيت بتلزق فى اجناب الموتور لما العربيه تكون مركونه ومبتنزلشى كلها فى كارتيره الزيت وده عشان لما الموتور يدور بعد ركنه يوم او اتنين يكون فيه زيت فى جوانب الشميز وغرف الحريق عشان اول طلعه للبستم تواجه تزييت ولو بشكل قليل لحد ما باقى الزيت يتم دفعه عبر مضخه الزيت المهم مكدبتش خبر ودخلت على موقع الشركه واتاكدت ان الهدف فعلا زى ما محمد بيقول ان 75 من تاكل اجزاء المحرك بتكون خلال الدواره بعد ركنه من يوم الى اكثر وتمت معاجله الزيت ليلتصق بالمعادن مع الحفاظ على سيوله الزيت وفعلا المقياس بيطلع غرقان زيت اعلى من موشر الزيت نفسه فى حاله انى لسه مدورتش العربيه وبقيس الزيت وبعدين امسحه واركبه تانى وارفع عشان اعرف المقاس الحقيقى للزيت والكلام ده كلام محمد سيد اللى انا جربته وفعلا طلع صحيح

Castrol Malaysia - Castrol Magnatec 10W-40

ان شاء الله فى تقرير تانى بعد 1000 كم عن لون الزيت والاداء
بالمناسبه كنت بفكر اجيب موبيل خدمه شاقه للعربيه الفلوكس الجاز وده المفروض يمشى 20 الف كم بس بيتغير على 15 الف نظرا للطبيعه الحاره سعره 230 جنيه ديزل فقط مناسب لعربيات فولكس عموما