الموضوع: اي استفسار خاص بدهانات السيارات

المشاركة الأصلية كتبت بواسطة moody_687

لو سمحت انا عربيتي فيكترا وعايز ارشها وش نضافة فيما عدا السقف وهى كانت مرشوشة قبل كده نضافة فيماعدا السقف
انا عايز ارشها عشان الكبوت بدأ يتشال طبقات من البوهية وشكل الصنايعي مكنش خادم العربية ف المعجون
المهم انا روحت للتوكيل وقولت اعملها عندهم خاصا ان لو اوكر الابواب والجرايد اتشالت هيعرفوا يركبوها تاني ومش هيكونوا مهملين ولو حاجة ضاعت هيركبولي حاجة العربية من مسامير وخلافه
فسئلت التوكيل هتتكلف كام سمكرة ودوكوا قالولى 7000 ج وطبعا استغليت بس للاسف هيدوني بوية الفابريكة وبيقولولى العربية بتطلع نمبر وان هكنها فابريكة
روحت الحرفين ف الاسكندرية عند واحد اسمه حمادة قالي العربية هتتكلف 3000 ج وقالي برد اوكر الابواب والجرايد هتتشال والمرايات عشان البوهية متأثرش فيهم وقولتله انى عايز بوية اسكينز قالي لو انت عايز تجيب البوهية هاتها لو عايزني انا اجيبهالك مفيش مشكلة
انا مبقتش عارف اعمل ايه والوالد بيقولى الحاجة لو اتفكت من مكانها كل شوية مش بترجع تانى زى الاول هتلاقي الاوكر بتتلخلع من مكانها ومش ثابتة انا مش اعرف حد ف الاسكندرية بتاع دوكو وسمكرة نضيف للاسف وف الحرفيين ناس كتير انا مش عارف اعمل ايه وايه هي الخطوات والراجل اللي اشتريت منه العربية قالي انها رشة نضافة بس للاسف البوهية بتتشال تدريجيا فخخايف اوديها برة التوكيل وف نفس الوقت مستحرم 7000 الاف يدفعوا فيها انصحوني اعمل ايه وايه هى الخطوات المتبعة ولو ف حد يعرف بتاع دوكو وسمكرة كويس ف الحرفيين ف الاسكندرية يقولي

اولا التوكيل مفيش حاجه اسمها هيدولي بوية الفبريكه مفيش كده الرش النضيف هو المهم وبعدين 7000 جنيه حرام طبعا اما بالنسبه الحاجه الي بتتحل مش بترجع زي ما كانت يا باشا دي اكر وفوانيس عادي جدا المهم ونصيحتي بالنسبه ان انت الي تجيب الدهانات بتاعت العربيه لا خلي الصنيعي هو الي يجيبهم وقوله بالحرف انا ماليش اكتر من اني استلم عربيه ممتازه ومتشرطش عليه نوع دهان معين سيبه بس فهمه انك هتستلم واسف معرفش حد في اسكندريه

المشاركة الأصلية كتبت بواسطة moody_687

طيب افرض ياباشا الصنايعي مش امين خاصا ان ده اول تعامل ومفيش حد مرشحه ليا قبل كده يبقى ازاى مش اتابع عربيتي معاه انا قلقان بس ان لما تترش الاقي الرش اي كلام

اولا انت مش هتعرف تتابع اسف مش فني يعني علشان تقهم التفاصيل الصغيره وبعدين يا باشا انت مش بتدفع المبلغ كله في مبلغ بيفضل لحد الاستلام وبعدين الشيئ الوحيد الي انت ممكن تتابعه وانت بتدفعله فلوس بتشوف العربيه الي تم فيها يعني بتدفع عربون وبعد كده مبلغ تاني لما تلاقي العربيه بقي شكلها اتغير حصل فيها شغل يعني وبعدين في مبلغ علي الاستلام وربنا يوفق ان شاء الله

المشاركة الأصلية كتبت بواسطة moody_687

طيب ياباشا ايه رايك ف البوية الاسكينز التصنيع الهولندي انا فوجئت ان المركز اللي هعمل فيه العربية جايبلي بوية اسكينز صنع ف هولندا فانا قولتله هو مش الاسكينز الماني فرد وقالي ان الاسكينز ماركة المانية وبتتصنع ف هولندا وقالي ان هولندا والمانيا هما انضف بلاد بتصنع بويات وبعدين ياتى وراهما ايطاليا فهل كلامه صح ولا لا

انا رديت علي الكلام ده في الموضوع الي انت عامله بس تاني يا سيدي البويه الاسكينز الي عندنا هنا مش الماني خالص هي المفترض انها الماني بس الموجود دلوقتي تركي وهولندي والهولندي افضل واساسا لما كان الماني 100% كان بيبقي انتاج قديم طبعا تصدير لدوله ناميه الايطالي في ماكس ماير وده حاجه كويسه برضه اهم من ده كل خدمة التجهيز للعربيه تكون 100% وربنا يوفق

السلام عليكم

إيه رأى حضرتك فى بويات Glasurit اللى الصنايعية بيقولوا عليها البغبغان

أنا شوفتها عند واحد وقال لى دى ألمانى و كويسة جدا وهل يستحسن إن الورنيش يكون نفس

المنتج بتاع البوية

شكرا جزيلا

عايز اعرف تكلفة رش عربية 127 بعد السمكرة هل السمكري بيمعجن معاة العربية وهو بيسمكر ولا لا ولو هرشها هتبقي تكلفتها كاام والعربية بتاخد كام كيلو بويا وشكرا