الموضوع: محتاج رأيكوا و مساعدتكو يا رجالة البى ام

اى مساعده يا رجالة البى ام :(

المشاركة الأصلية كتبت بواسطة CosmicOne

السلام عليكم و رحمة الله و بركاته

كنت بفكر لو ربنا شاء و رزقنى انى اغير العربيه بتاعتى (سيفيك 2007) على اول السنه الى جايه مثلاً ان شاء الله

طبعاً انتوا عرفين ان اى عربيه فى مصرنا الحبيبه دلوقتى علشان تكون تتطوير عن السيفيك هتبقى مش اقل من 180 الى 190 الف (استرا او سيراتو او اكتافيا او فوكس الخ....)

انا جيه فى دماغى ان بالسعر ده ممكن اشوف بى ام مثلا 316 موديل 2011 كده والا حاجه
بس كنت محتاج منكوا ضرورى بعض الاستفسارات لانى معنديش ادنى خبره فى البى ام , و اسف جداً مقدماً للأطاله, و هحاول اخلى استفساراتى فى شكل اسأله حتى تكون سهلة الرد

1-فى حدود 180 الف و تكون موديل 2011 او 2012 مثلاً يجيبوا 316 والا 318 والا 320؟
اعتقد ان الفلوس دي متجبش حتي e90 316 2011 ورايي ممكن تجيبلك 320 ٢٠٠٩ مستريح وتكون حالتها نضيفه
2-ايه اشهر المشاكل فى الموديلات ديه الوتو؟
انا معايا e90 2007 والمشاكل اللي ظهرت معايا لغايه دلوقتي او في الموديل دا عموما هوا سربنتينه التكييف بدات تسرب عند ناس كتير اوي والاتجاه اليومين دول في الصيانات للموديل دا هوا سربنتينه التكييف وتغيير مساعدين امامي وجلب شداد وبارات دركسيون
3-ايه اقل موديل فى المشاكل فيهم و اكثرهم اعتماديه و افبهم تكلفة صيانه؟
اكترهم اعتماديه بالنسبه للبنزين هيا ال 316 عشان المكنه ال١٦٠٠ لكن صياناتهم كلهم واحده
4-كنت طول عمرى بسمع من ناس قرايبنا و كده معاهم بى امات ان الفتيس الاوتو بتاعها بعد ال100 الف كيلو بيبقى فيه مشاكل و بيحتاج يتغيير
عن تجربه وخبره الفتيس مفيهوش مشاكل واخره بيحتاج سوفت وير ومتجبش فتيس الا اذا اكلت خبطه في الجير بوكس من تحت ونزلت الزيت اللي في الفتيس ومشيت عليها
5-هل هتكون اعتماديه العربيه زى الهوندا من حيث قلة المشاكل مع العلم انى بمشى يوميا مشوار الشغل بتاعى من مدينة نصر الى القريه الذكيه عن طريق الدائرى فكل يوم رايح راجع مش اقل من 100 كيلو
زيها زي اي عربيه تانيه بتحتاج صيانات دوريه واهتمام وقطعه الغيار اللي تحطها اصلي في العربيه تاكد انك هتنساها بعد كدا
6-مهمه اوى ديه بالنسبالى ان انا من الناس الى بتحب تعمل كل حاجه فى التوكيل و انا عربيتى عامله دلوقتى 126 الف و لسا الحمد لله بعمل كل شىء فى التوكيل, فكنت عاوز اعرف سعر الصيانه الدوريه كام فى البافاريه و سعر القطع الدورية التغيير زى تيل و سيور و بوجيهات و فلاتر و كل حاجه بتغغير دورى
لو اعتمدت انك تعمل كل صياناتها في التوكيل يبقي متجيبهاش احسن لان اولا الاسعار مضروبه في اتنين دا لو مكنش مضروبه في تلاته، ثانيا شغل التوكيل شيل وحط كل كذا الف كيلو بغض النظر عن حاله قطعه الغيار ايه، ثالثا لو انتا رايح بعيب في العربيه ومحتاج تغير قطعه غيار واحده، ممكن تلاقيه مغير ٣ قطع تانيين بردو بنظام شيل وحط لغايه ما يوصل للعيب او بطريقه تانيه انه عشان يديلك ضمان علي قطعه الغيار دي يبقي لازم يغير القطع التانيه اللي شاكك فيها وكدا كدا هيقنعك وهتتفاجيء بالفاتوره وهتدفع
7-ايه اكبر صيانات فى العربيه ديه فى التوكيل (عند كام الف يعنى) و تكلفتهم كام تقريباً؟
راجع الموضوع المثبت عن e90 هتلاقي اسعار معظم الصيانات واسعار قطع الغيار جوا التوكيل وبرا التوكيل
8-ايه رأيكوا فى المستعمل الى بيتباع فى التوكيل او عز العرب و هل مضمون والا ممكن يبقى فيه لبس؟
بتبقي الحاله تمام لانه بيديلك ضمان علي العربيه تقريبا سنه بالاضافه انه بيكون عامل تقرير شامل عن حاله العربيه بس الاسعار مبالغ فيها جدا
9-هى طنابير العربيه ديه e90 بتحبتاج تغيير كل اد ايه؟ علشان بسمع انهم بيتعبوا بسرعه و هكذا المساعدين و جلب المساعدين؟
بالنسبه للطنابير لو رحت التوكيل هيغيرهم كل مرتين تغيير تيل يعني تيل اه وتيل لا، لكن بره هيغيرهم علي حسب حالتهم وانا عندي في عربيتي مغيرتش الطنابير وخرطتهم بعد ٧ سنين استهلاك وشغالين معايا كويس ومتوقع يتغيرو كمان تغييره تيلين كمان، بالنسبه لشغل العفشه بردو اول حاجه تتغير في عفشه العربيه عندي كانت المساعدين وجلب الشداد وبارات الدركسيون ودا بعد ٧ سنين استهلاك او بطريقه تانيه بعد ١٣٠ الف كيلو
اسف تانى جداً على الاطاله و جزاكم الله خيراً على اى افاده منكم لأخوكوا :)

انا عن نفسي بعمل كل صيانات العربيه بره التوكيل عند واحد محترم ومضمون وباسعار اقل كتير عن التوكيل وعن باقي مراكز الصيانه بره كمان، والحمد لله العربيه علي الشعره والحاجه اللي بعملها مش بشتكي منها تاني وربنا يوفقك ان شاء الله وتبقي بيمر قريب

تكمله للرد السابق من الصيانات اللي عملتها بردو في العربيه اني غيرت رادياتير وطلمبه ميه وكوعه ترموستات ودا لان اللي كان قبل مني مكنش بيحط ميه تبريد bmw وكان بيحط ميه عاديه غير كدا تقريبا كل الصيانات اللي عملتها في العربيه كانت صيانات عاديه جدا وربنا يوفقك

اولا جزاك الله خيرا وربنا يباركلك يا استاذ احمد على تعبك و ووقتك فى الرد عليا :)

كنت عاوز اعرف بقا:

هيا ال316 2011 تعمل فى حدود كام المفروض مع العلم انى بتكلم على الشراء اول العام القادم ان شاء الله,

انا بصراحه مستبعد شويه ال320 علشان خايف من الترخيص و البنزين و تكاليف عربيه اعلى فى الفئه و المحرك و كمان انا عمرى ماجبت مستعمل فكنت عاوز اقرب حاجه ممكنه للزيرو فى الحاله,

بالنسبه للصيانه هل قطع الغيار الى بره هى هى الى فى التوكيل والا صنع بلاد تانيه او استيراد؟

و بردوا عموماً يعنى الصيانه الدوريه فى حدود كام فى التوكيل؟

ليه الطنابير بيغيروها مره و مره؟ انا الحمد لله هوندتى عامله 126 الف من غير الهوا فى الطنابير بس انا بغير تيل فى الوكيل قبل حتى ما يبدأ يصفر خالص

هل ممكن شراء القطع مثلاً من التوكيل و تركيبه عند حد بره؟ و هتبقى نفس الاداء و الجوده؟

بالنسبه للناس الى فى القاهره مين تاجر بى ام يكون امين فى المستعمل و ميضحكش عليا لو حبيت اشترى و انا معنديش اى خبره؟

و جزاكم الله خيراً و اسف تانى على الاطاله

المشاركة الأصلية كتبت بواسطة CosmicOne

اولا جزاك الله خيرا وربنا يباركلك يا استاذ احمد على تعبك و ووقتك فى الرد عليا :)

كنت عاوز اعرف بقا:

هيا ال316 2011 تعمل فى حدود كام المفروض مع العلم انى بتكلم على الشراء اول العام القادم ان شاء الله,
انا مش متابع الاسعار بالنسبه للموديلات الاقرب للزيرو بس ممكن تدخل علي كونتاكت كار وتشوف الاسعار وتخصم منها ١٠ الاف جنيه وهيكون هوا دا سعر السوق
انا بصراحه مستبعد شويه ال320 علشان خايف من الترخيص و البنزين و تكاليف عربيه اعلى فى الفئه و المحرك و كمان انا عمرى ماجبت مستعمل فكنت عاوز اقرب حاجه ممكنه للزيرو فى الحاله,
انا معاك ان الضريبه عاليه شويه، انا كنت دافع ٨٠٠ جنيه في السنه وبردو استهلاك البنزين اكتر من العادي بحوالي ٢٠٪ مش كتير يعني بس كل دا ميتقارنش بانك تتمتع بقوه الماتور، دي لوحدها هتنسيك كل الفلوس الاضافيه اللي بتدفعها
بالنسبه للصيانه هل قطع الغيار الى بره هى هى الى فى التوكيل والا صنع بلاد تانيه او استيراد؟
فيه قطع غيار جديده بره التوكيل بتبقي هيا هيا اللي في التوكيل ومن نفس الشركه ونفس البلد، بس الفرق ان قطعه الغيار اللي في البافاريه بيبقي عليها اللوجو بتاع bmw لكن بره معليهاش اللوجو وبنص التمن تقريبا، دا بالاضافه ان البافاريه بتدي ضمان علي قطعه الغيار ودا اللي عامل فرق كبير جدا في الاسعار، بس في رايي الشخصي ان حرام ادفع ضعف تمن قطعه الغيار عشان خاطر الضمان وساعات الضعفين كمان، دا بالاضافه ان بيبقي فيه قطع غيار استيراد ودي بتبقي عربيات مستعمله وجايه من برا نصين ودي طبعا بتبقي ارخص كمان في السعر، بس قطع الغيار الاستيراد متجبش منها غير الحاجات الكبيره اوي، زي مثلا فتيس او كومبريسور تكييف، لكن قطع الغيار العاديه بتتجاب جديده اصليه من برا عادي وبسعر ارخص كتير من البافاريه،

و بردوا عموماً يعنى الصيانه الدوريه فى حدود كام فى التوكيل؟
دي ملهاش سعر محدد بتبقي علي حسب انتا هتغير ايه الصيانه دي؟ لو هتغير زيت بس ولا هتغير تيل كمان؟ كل حاجه وليها سعر وليها كيلو متر بتتغير عليها، علي حسب ما افتكر اسعار التوكيل كانت في تغيير الزيت ٥٧٠ جنيه ١٠ الاف كيلو، تيل وطنابير قدام ٣٠٠٠ جنيه، تيل وطنابير ورا ٣٥٠٠، جوز مساعدين قدام بالبطاحات باستعدال الركب كانو ٦٥٠٠ جنيه، طبعا كل الاسعار دي فلكيه وبرا باقل من نص السعر دا والقطعه هيا هيا اللي في التوكيل

ليه الطنابير بيغيروها مره و مره؟ انا الحمد لله هوندتى عامله 126 الف من غير الهوا فى الطنابير بس انا بغير تيل فى الوكيل قبل حتى ما يبدأ يصفر خالص
هما نظامهم كدا، متقيدين اوي بالكيلو متر اللي متحدد لقطعه الغيار، ومتسجل عنده في ملف العربيه ايه الحاجه اللي مفروض تتغير، ولو كنت مغيرها بره مش هيعترف بيها وهيقولك غيرها تاني، ولو حالتها كويسه هيقولك غيرها بردو، يعني باختصار هتقعد جنبه علي الكمبيوتر هيطلعلك بتاع ٦ حاجات المفروض يتغيرو من قبل حتي ما يبص علي العربيه
هل ممكن شراء القطع مثلاً من التوكيل و تركيبه عند حد بره؟ و هتبقى نفس الاداء و الجوده؟
علي فكره معظم اللي شغالين برا كانو شغالين في التوكيل، واللي لقط الصنعه بسرعه بيفتح برا مع نفسه، واللي علي قده هوا اللي بيقعد في البافاريه،بالنسبه لقطع الغيار فيه قطع غيار كتير التوكيل مش بيرضي يطلعها وبيقولك لازم تركبها هنا، وفيه حاجات عادي ممكن تشتريها من التوكيل، بس بدل كدا كدا هيا نفس قطعه الغيار اللي في التوكيل هيا اللي بتتباع بره وبتمن تقل بكتير ولو اشتريتها من البافاريه ومركبتهاش عندهم مش هتاخد الضمان يبقي هاتها من برا احسن
بالنسبه للناس الى فى القاهره مين تاجر بى ام يكون امين فى المستعمل و ميضحكش عليا لو حبيت اشترى و انا معنديش اى خبره؟
انا بصراحه معرفش اي حاجه في القاهره بس نصيحه متشتريش من تاجر واشتري من ركيب بيبيع عربيته مباشره لان التاجر هيبعلك نفس العربيه بمكسب ٥ الاف جنيه علي الاقل، وكدا كدا اكشف عليها كويس في البافاريه او عند حد محترم برا
و جزاكم الله خيراً و اسف تانى على الاطاله

طيب يا استاذ احمد ال٣١٨ متعتبرش وسط في التكاليف بين ال١٦ و ال٢٠؟
و هل نفس سعر الترخيص بتاع ال٣٢٠؟