أبعاد العربية وتركيزى أثناء القيادة

**تامر.محمد** · 05-03-2013 10:12 PM

انت بتعند
انا احيانا باعمل كده للأسف

**abdo_2812** · 06-03-2013 11:17 PM

أبعاد الميجان من أفضل وأريح العربيات اللي أنا سوقتها في حياتي، وكمان التحكم فيها من أسهل ما يكون ماشاء الله
بقارن مثلا في الفئات العالية بـ كورولا وكارينز وماتريكس وحتى الأوكتافيا وإلانترا وأكسنت الجداد والقدام وأكثر من عربية تانية برضو سوقتها وكنت حابب الميجان أكتر في موضوع الأبعاد ده

يمكن علشان هي عربيتي ومتعود عليها جامد بس فيه عربيات من اللي فوق دي أنا متعود عليها برضو لأنها عربيات ناس قريبة مني وبسوقها بشكل متكرر

على كل حال، حاول مايكونش الكرسي واطي وبعيد ... يعني حاجة واحدة منهم كفاية أو ظبط الموضوع على أفضل رؤية للأبعاد، كمان في بداية السواقة بالذات حاول تراعي تظبيط الكرسي على أفضل رؤية وتحكم في أبعاد العربية وسيبك من الرفاهية في النقطة دي لحد ما تحفظ العربية كويس ...

نقطة العند دي بقى كانت عندي زمان :)
لكن الحمدلله مع الوقت كنت بدرب نفسي إني ماسخنش مع حد وما أسابقش حد إلا بمزاجي وفي ظروف طريق مريحة جدا وبدون مخاطرة وأعتقد فيه تحسن مشهود بفضل الله من كل اللي يركب معايا :)
النقطة التانية بقى ماتخليش أي حاجة تنرفزك، وحاول تذكر نفسك إن كل شيئ له أجل وميعاد وماتخليش الاستعجال يفقدك تركيزك بسهولة وربنا ييسرلك كل خير إن شاء الله
ويارب يحفظنا جميعاً من كل سوء ويستر طريقنا ويرزقنا الحلم والهدوووووء علشان السواقة في مصر بقت سبب رئيسي من أسباب العكننة وإثارة الأعصاب !!

**Mostafa.Ismail** · 06-03-2013 11:26 PM

كل دة هيروح مع الوقت ... لاتقلق.

**amrelsaqqa** · 06-03-2013 11:33 PM

على فكرة بتحصل لنا كلنا

انا مثلا هقولك على موقف عبيط جدا حصل معايا وكل ما افتكره اقول ايه الغباء ده ههههههه :d

ماشى في شارع جانبى عادى وفي مطب فانا كنت جاي براحتى وشوفت المطب قدامى عملت فيها عم الفاهم وقمت جاي كاسر يمين قبلها وواخد المطب بالعرض عشان كان عالى فعلا وغبي ( المهم ما بصيتش في المراية :d ما تفهمش ازاى :d والمشكلة ان اخويا كل ما يركب العربية يلعب في ظبطة المراية فانا ما لمحتش اي حاجة خالص )

المهم لقيتلك موتوسكل متخلف هو كمان كان ماشى في النقطة العامية بتاعتى ولا كلكس ولا اي بتنجان وكان هيطير الجنب بس الحمد لله لحقت نفسى وعدلت بسرعة ومشيت :D

مثلا ممكن تبقى بتدخل جراج ضيق جدا بضهرك وهو بتاعك و بقالك 3 سنين بتدخل وتطلع منه كل يوم ، وتيجى في مرة تلاقى نفسك كنت هتحك الرفرف في الجدار !

ممكن تبقى بقالك 5 سنين بتركن قدام بيتك وحافظ العربية والحتة بالمللى وتيجى في يوم تلاقى نفسك حكيت الطاسة اللى قدام في حرف سلمة وكسرتها !

المشكلة ان الواحد بعد المواقف الهبلة دى بيضايق اوى رغم انها مواقف هبلة ، خصوصا لما يكون هو اصلا بيسوق كويس ومن فترة ( بيسوق كويس فعلا مش اي كلام )

بس هتقول ايه بقى :d

**aw2100** · 06-03-2013 11:33 PM

الموضوع بتاعك ده شدنى انا عارف الفشر بتاع المصريين بس ده لو حقيقى على الطرق بتعتنا تبقى مصيبة انا بتكلم فى عنصر الأمان ومعلش فى التأنى السلامة وسيبكم من حكاية شد المواتير دى الهدف من سواقة اى سيارة هو انها توصلك بالسلامة ومتزعلوش منى انا اى شاب بشوفة بيجرى بهبل وبدون داعى بضحك علية علشان انتو عرفين طبعا بيبقى الشيطان لاعب فى دماغة وردى فى موضوعك ده حكاية ماساة حقيقية فيه واحد صحبى عمل حادثة بسيارة مرسيدس فيها اربعة وكانت النتيجة توفى 2 منهم بانفجار فى المخ و واحد شلل كامل بسبب تحطم العامود الفقرى وواحد ده المحظوظ كان نايم على الكنبة حصله كسر مضاعف فى الساق وحاليا بيعرج وطبعا سواق ال1/2 نقل اللى لبس فية محصلهوش اى حاجة وده كلة كان على سرعة 120 واللى حصل خلل فى عجلة القيادة دون سبب معروف انحرفت العربية من صاحبى اللى مات ودى شهاده اللى نجوا من الحادث علشان يبرؤا صاحب العربية النقل دى ماساة بحكيها لكل واحد منكم بيفكر يجرى دون اى لازمة والحوادث دائما بتكون خطأ من الغير او من السيارة مفاجئ دون قصد ولكن بص دائما على النتيجة وربنا يحميكم ويخليكم لاهاليكم واولادكم ويبعد عنكم شيطان اسمة السرعة الزائدة غير المسئولة اسف على الأطالة !!!

**aw2100** · 07-03-2013 03:24 PM

المشاركة الأصلية كتبت بواسطة MohammedAladel

أشكرك على نصيحتك الغالية

لكن بلاش تظلمنى انا بسرد مواقف بتحصل معايا انا نفسى متضايق منها !

بص ياستاذ محمد الحكاية ان الأنسان لازم يتحكم فى شيطانه لكل انسان شيطان يوسوس له بالشر وبيدخل للانسان من مداخل زى الكبر والعند زى مبيحصل لاغلب الشباب لما يلاقى توكتوك بيقفل عليه مثلا والحكاية تكبر فى دماغة شوف ابن ال... انا حاوريه ابن ال... هنا الشيطان بيبقى شغال 10/10 هنا بقى الرجوالة الصح مش مسئلة شنب و ... لا الرجولة انك تتحكم فى اعصابك وتكبر دماغك وتختلق الاعذار للسواق اللى قدامك علشان تهدى نفسك لا ده مش واخد باله يمكن لسة متعلم السواقة ولايمكن معاه حد عيان فى عربيته علشان كده بيجرى قوى المهم تحاول تقنع نفسك باى عذر ليه وبكده حترتاح قوى وتكمل بهدوء وتطلع لسانك للشيطان اللى بيلعب فى دماغ الواحد باستمرار للشر وبالنسبة لطريقة حساب مسافات العربية انا دائما بادى حوالى 20 سم تخيلية فى داير العربية وانا ماشى وده بيخليك فى الأمان وتبعد عن العربيات وتحذر اخطاء الغير ومش كل مرة ربنا بيسترها وفى الأخر انت وعربيتك اللى حتتحمل خطء الغير وربنا يبعد عنك شياطين الجن والأخطر شياطين الأنس !!!

**aw2100** · 07-03-2013 04:33 PM

المشاركة الأصلية كتبت بواسطة mohammedaladel

كلام جميل طبعا

بس أنا زعلت منك لما قلت (الفشر والكدب فى المشاركة اللى فاتت )

ماتزعلش منى انا طول عمرى للاسف باسمع كلام كتييييير فى اى موضوع وفى الأخر بيطلع فشر وتهويل فى المواضيع علشان كده انا لما لقيت القصة واقعية اتخضيت عليكم وحبيت اقول اللى انا باعمله بنفسى يمكن افيدك انت واحبابنا اللى فى المنتدى وعموما انا اسف ياسيدى رغم انى اتمنى ان يكون كلامك فشر مش حقيقة برضه هههههههههه ؟؟؟؟

-

-

-

الموضوع: أبعاد العربية وتركيزى أثناء القيادة

LinkBack

أدوات الموضوع

عرض

-

-

المواضيع المتشابهه

غفوة أثناء القيادة ( كيفية تجنبها للنقاش)

نصائح هامة أثناء القيادة

المخاطر الصحية أثناء القيادة (لازم كله يقرأها)

عند تهدئة سرعة السيارة أثناء القيادة دون توقف....وسؤال للماهرين في القيادة

الكلمات الدلالية لهذا الموضوع

المفضلات

المفضلات

ضوابط المشاركة