عايزة اعمل الليزك و خايفة

**magic girl** · 09-03-2013 09:36 PM

السلام عليكم يا جماعة..

مبدئياً انا الحمد لله بالبس نضارة من وانا عندي 7 سنين كده ، طبعاً من ايام لما النضارات كانت عجيبة و شكلها مسخرة " أول نضارة جبتها كان على الجنب سلحفة حمرا هههههههه، لكم ان تتخيلوا "

المهم طبعاً انا اتخنقت من النضارات، و جربت العدسات فترة بس بتضايقني و متنفعش في البلد دي اصلاً " ابقى ماشية في الشارع و الاقي 3 طن عادم اسود مهبب يدخلوا في عيني، ماهو طبيعي تلتهب حتى لو كنت بايونيك وومان "

فحجزت و هاروح بكرة إن شاء الله مستشفى وطني عشان اشوف هاتنفع معايا العملية ولا لأ عشان اعرف انها بتختلف من شخص للتاني..

بس اسكت على كده؟؟ ابدااااا.. قعدت ادور في النت و اقلق نفسي..

دلوقتي فيه أراء ضد العملية دي تماماً.. و فيه اراء اخرى بتؤيدها بشدة.. و انا محتارة..

ده غير اني دخلت على اليوتيوب و شفت اول 3 دقايق فيها و الحمد لله جالي panic attack

المهم، حد عنده تجارب واقعية انه عمل العملية ولا قدر الله حصلت أي مضاعفات؟؟ سواء ليه او لحد يعرفه؟؟ عشان انا الضراحة كل اللي بشوفه كلام دكاترة بيخفوا الناس منها بس اللي بيعملوا العملية بيبقوا منشكحين أوي..

**hany63** · 09-03-2013 09:43 PM

على حسب معلوماني
اولا لازم يكون قصر النظر ثابت من مده
و بعدين الكشف الاولي على القرنيه هيحدد مدى تقبلها للليزك
واعرف ناس كتير عملوها و استغنوا عن النضاره
و بالتوفيق

**EngAhmedSayed** · 09-03-2013 09:43 PM

انا هقولك على نصيحه و هقولك على مستشفى و له تقولى مغربى و رمد الجيزة و الكلام ده

فى مستشفى عام
اسمها قلاوون فى الدراسه الحسين هى معروفه هناك اسالى الف من يدلك
سياتك متخصصة عيون و ايه الدكترة العيون من افضل دكترة مصر
بس سياتك لازم تروحى الساعه 8 الصبح تكونى هناك علشان ليهم عدد معين
بس مستشفى جميله جدااااااااو نظيفه جدااااااااااااا
و انا اثق فى رايهم بخصوص حالة سياتك
ربنا يشفى كل مريض
ربك المستعان

**eemmoo** · 09-03-2013 09:51 PM

انا زيك والله متردد ومش عارف اعمل ايه
لكن رحت مستشفى الرواد قولت اتوكل على الله واعملها عشان حاسس ان نظرى بدأ يضعف ومش عارف البس نظارة
قبل ما اعمل التحاليل سألت الدكتور قولتله هى العمليه دى مضمونه 100% رد عليا وقالى :
مش انت بتطلع على السلالم كويس قولتله اه كويس .. قالى مش وارد وانت طالع فى يوم من الايام تتشنكل فى سلمه قولتله ممكن طبعا
قالى العمليه دى كده ممكن تكون مع شخص ناجحه ومن غير اى مضاعفات وممكن مع شخص تانى يحصله شويه مضاعفات
بصراحة هو قالى كده ومن ساعتها مش عارف اعمل ايه

**dongol123** · 09-03-2013 09:52 PM

أنا عملت العملية من خمس سنين و عادي مفيش أي مشاكل ولا أي مضاعفات المهم الدكتور يكون كويس وخبرة وعمل عمليات كتيب من النوع ده

**buddha** · 09-03-2013 09:53 PM

[youtube]http://www.youtube.com/watch?v=O4kDC4sZ5Jg[/youtube]

بالتوفيق ان شاء الله

**aboomar22** · 09-03-2013 09:57 PM

دى مش عملية ولا حاجة تقدرى تقولى جلسة ليزر انا امى عملتها فى العينين والعملية اقل من نصف ساعة وبتخرج تمشى بعدها بساعتين وهيا شايفة كويس قوى هى عملتها عند دكتور كويس قوى اسمه عمرو السمرة فى ميدان الدقى الشارع اللى على ناصيتى بن شاهين وعملها فى مستشفى العيون الدولى وان شاء الله تبقى تبشرينا لما وتوليلنا الدنيا احلى بدون نظارة ان شاء الله