الموضوع: استهلاك البنزين غريب جدا في التيدا

السلام عليكم

انا لسه جايب نيسان تيدا 2013 والحمد لله العربية ممتازة بكل المقاييس وانا سعيد جدا باختياري ده. امبارح فولت التانك بنزين 92 من بنزينة موبيل وسافرت على اسكندرية من القاهرة. عملت بالضبط بعد التفويل ٢٦٥ كيلو من باب بيتي في القاهرة لباب بيتي في اسكندرية. المهم بابص على عداد البنزين

..

..

لاقيته ماجابش حتى التلتين يعني ع الشرطة اللي قبل النص كمان!!!!!!


استغربت جدا.. مشيت شوية كمان في اسكندرية ولفيت وعملت ييجي ٥٠ كيلو كان مشاوير نزل شرطة كمان.. بالشكل ده. انا ممكن ارجع القاهرة النهاردة والعداد مايوصلش للتلت كمان..

يا تري دي حاجة غريبة؟ ولا التيدا فعلا استهلاكها للبنزين كده؟ اصل لو ده استهلاك البنزين تبقى دي اكتر عربية اقتصادية شفتها في حياتي:

ملحوظة: انا ما اتبعتش تعليمات التليين طبقا لنصيحة مهندس الصيانة في اوتو ايجيبت. يعني باقرص عليها عادي ساعات ووصلت ل ١٤٠ ع الصحراوي كذا مرة. وبعدي ال ار بي ام ٣ ... انا بس في العموم رجلي هادية ع الاكسيلاتير ومش بعدي ٢ ونص ار بي ام في اغلب الأوقات

تحياتي