الموضوع: حكايتى مع الميكانيكى/ محمد عبدة

انا مش زعلان منك يا صبحى ولا حاجة و معاك ان عبدة مصنعيتة غالية بس قصة انة صنايعى عادى مش مضبوطة

عبدة شغال فى التوكيل من 14 سنة و لو كان وحش كانوا مشوة من زمان... عبدة اشتغل فى عربيتى و عربية والدى و عربيات ناس كتير اوى اوى معرفة سواء فى الشغل او من اصحابى او جيرانى و محدش اشتكى من الصنعة... يمكن فيه ناس علقت على المصنعية انها غالية لكن الطبيعى ان اى حاجة كويسة بتبقى غالية

اللى زعللنى كمية الفتى اللى شوفتها... يعنى قبل كدة اتفتح حوار مشابة و واحد قال انة بيغير كاتينة عند الميكانيكى بتاعة ب30 جنية... دا الواحد لما بيغسل العربية بيدفع اكتر من كدة... و واحد يقولك دا نص لبة... على اساس انه خبير فى عالم الميكانيكا و مسك الراجل امتحنة و اختبر شغلة... او اللى يقول ان مفيش علاقة بين طلمبة الزيت و الكارتيرة... اكيد دا مشافش عربية دايو الا فى الجرنال

لو هنتكلم على حاجة يبقى نتكلم بموضوعية...

عبدة غالى؟

اه غالى... بس طبيعى الحاجة الكويسة غالية و دة حال اى حاجة فى الدنيا مش الميكانيكية بس

صنعتة وحشة؟

لا... و دة بناء على تجارب من 10 سنين من اول الصيانات الدورية لحد تعديل كامل فى الموتور و العفشة و الفرامل فى اكتر من عربية و مع اكتر من شخص

عبدة خبرتة قليلة؟

مينفعش السؤال دة يتسال فى واحد شغال فى التوكيل من 14 سنة و عدى علية بدل العربية 1000 و كل التعديلات اللى بتتعمل فى الدايو بتبقى على ايدة

مصنعيتة مقابل صنعتة متناسبة؟

احيانا اه و احيانا لا... ساعات بيقول على مصنعية كويسة و ساعات بيبالغ و دة ساعات بيحصل معايا انا شخصيا بس انا بعرف اقرص علية لما احسن انة بيبالغ شوية (و للعلم يا صبحى انا عملت موضوع من سنتين عن حاجات اتعملت فى عربية ابن خالتى و انت رديت و قولت دى تتكلف 200 و لو عند عبدة تتكلف 400 و الحقيقة ان الصيانة تمت عند عبدة و اتكلفت 200)

هل عبدة امين؟

جدا... و لما بيقول "نغير كذا بالمرة او احتياطى" مبيبقاش فتح شغل انما عن خبرة سابقة... يعنى اللى كسر كامة و راحلة هيقولة غير طلمبة زيت لان غالبا هى السبب... ممكن صنايعى تانى يغير الكامة و شكرا و بعد 3 شهور تكسر كامة تانى و دة حصل بالفعل مع زملاء هنا

ليه بيحب يغير و مبيصلحش؟

هو اتعلم كدة فى التوكيل و اكيد كلنا عارفين ان الى بيتصلح عمرة ما بيبقى زى الجديد... و فى المقابل فيه ناس بتبقى عايزة تصلح حاجات ميتة اساسا سواء استرخاص او توفير فا طبيعى الحاجة بتبوظ تانى... اسم بالله انا شوفت واحد جاى لعبدة الورشة و بيسال "هى دى ممكن تتلحم؟" و ماسك فى ايدة سكترة لانوس مقطومة اتنين...

هل الغلا بتاع المصنعية جاى منين؟

احسب الوقت اللى بيتاخد فى الشغلانة كبداية... يعنى تغيير اويل سيل سكترة اللى هو ب5 جنية بيحتاج فك سكترة او فك القطمة... تغيير اويل سيل كرنك بيحتاج فك فتيس و طقم دبرياج... حالة زى الموضوع بتاعتنا بتحتاج فك منافول السحب و فرن الشكمان غير ان الطبب الخلفية صعب الوصول ليها سواء للفك او التركيب فا الموضوع مش بيتحسب بتمن القطعة اللى اشتريتها انما بالوقت و المجهود المطلوب لتغييرها

احسب كمان الشغلة اتعملت ازاى... يعنى فيه ناس بتغير اويل سيل كرنك خلفى و تقفل و شكرا... و بعد يومين تلاقى الاويل سيل بيجيب زيت... مش لان الصنايعى وحش لكن عشان الاويل سيل مضروب زى معظم قطع الغيار اللى فى السوق و دة مش ذنب الصنايعى... عبدة بيركب الاويل سيل و يركب الفلام و يدور العربية فترة بدون فتيس عشان يتاكد ان الاويل سيل تمام و حكم تسرب الزيت بالتالى هو وفر عليك مصنعية فك الفتيس تانى لو الاويل سيل بايظ دا غير انة بيقولك فى الاول هات الاصلى عشان اللى فى السوق مضروب زى برضة ما بيقولك غير طلمبة الزيت لو كسرت كامة

ببساطة الحاجات اللى بيقولها دى لمصلحتك لانها هتوفر عليك وقت و فلوس فى المستقبل... اى واحد عادى هيغير الجزء التالف و يركبلك القطعة اللى اشتريتها و خلاص... و لو رجعت تكلمة فى اى حاجة هيقولك انا ركبت اللى انت اشتريتة و مليش فيه

طبعا دة بخلاف ان عندة البرنامج اللى بيعمل سكان عشان لو شاكك فى حساس قبل ما يغيرة على الفاضى و عندة برضة بعد القطع زى صوابع السخن بتاعت النوبيرا و الصباع الالومنيوم بتاع طلمبة المية جاهز بدل ما تروح تعملة عند خراط او تشترية جاهز من ابو الحسن... انا مش بقول انه هيديهولك هدية انما على الاقل وفر عليك المشورة و عربيتك بتخلص فيها كل حاجة و انت قاعد

اخر حاجة التقفيل... اعتقد كلنا ياما شوفنا عربيات فيها حاجات راكبة بنص عدد مساميرها او بمسامير مش بتاعتها او فيها حاجات راكبة بشكل غلط او مكسورة او مربطة بكوليهات (من الاخر شغل تلصيم و عك) و هو مبيعملش كدة

اللى شايف ان الحاجات دى كلها ملهاش اى ثقل هيلاقى ان مصنعية الراجل مبالغ فيها بشدة

طيب هو مبيبقاش موجود فى الوشة اوقات كتير

دا صحيح... بس مش معنى كدة ان اللى فى الورشة شولة جوافة... انا جربت اسلام و محمد فى شغل قبل كدة (صيانات) و الاتنين كويسين و فاهمين شغلهم... طبعا لو فيه حاجة فنية (عمرة مثلا) لازم عبدة اللى يبقى موجود و يشتغل بايدة و دة بيحصل (و حصل معايا فى عربيتى) لكن برضة شغل الفك و التركيب بيعملة محمد و اسلام

هو يعنى مفيش غير عبدة دة اللى بيفهم فى الدايو؟

لا طبعا فيه ناس كتير كويسة زى محمد هاشم اللى فى بين السرايات (اما ابو الحسن) و طارق اللى فى الكيلو 4 و نص و للعلم انا اعرف هاشم من قبل ما اعرف عبدة و هو كمان كان شغال فى التوكيل (مهندس استقبال) و لما بكون بعمل شغلة فى الرفيع (تيل او بوجيهات او جوان غطا تاكيهات) بعملها عندة لان هو ارخص من عبدة و واقف عند ابو الحسن فا الموضوع مش محتاج مشوار لعبدة على حاجة صغيرة زى كدة فا محمد هاشم لا غبار علية مع الاخذ فى الاعتبار فرق الخبرة و التجهيزات مقارنة بعبدة

طارق صنايعى كويس بس فيه حد هنا راحلة و قال ان عربيتة اتاخد منها حاجة فا بطلت ابعت حد ليه من ساعتها... غير كدة انا مجربتش صنايعية فى شغل عشان اقول دا حلو و دة وحش (زى ما ناس تانية بتعمل)

دة مفهومى عن المناقشة الموضوعية سواء لعبدة او اى حد فى الدنيا بيعمل اى حاجة... انما القصة تقلب شتيمة و حسبنة على الفاضى و المليان و فتى و تاليف و هرى فارغ فا دا يبقى اسمة........

MMamdouh