الموضوع: القواعد الذهبية لاختيار زيت العربية.... موسوعة مبسطة لأساسيات زيوت المحركات

المشاركة الأصلية كتبت بواسطة hassan_attia

هندسه بعد اذنك دلوقتي انا عايز احافظ علي الموتور لاطول فترة ممكنه و مش فارق معايا توفير البنزين بس المشكله اني ساعات بستخدم العربية في اليوم علي فترات متابعده فاني الافضل استخدم ال 10w40 ولا 20w50 ولا 15w50 و كلهم مناسبين طبقا للكتالوج
و دلوقتي في حاجه انا مستغربها زيوت امسويل منزلين 20w50 تخلقي كامل بس sl طب دلوقتي مش مفروض ان الزيوت التخليقية مستوي خدمه عالي انا استفدت ايه بمستوي خدمه قليل بس زيت تخليقي و هل ينفع استخدم امسويل مع موتور كان طول عمره بين المعدني و النص تخليقي موديل 2005 ؟و ايه رايك في زيوت mannol & motul و خصوصا ان ال موتول فيه ايستر هل استخدمه ؟

بالنسبة ليا أنا شايف الـ3 لزوجات زي بعض... وعلشان نمسك العصايا من النص من ناحية حماية الموتور وسرعة السريان في بداية التشغيل فلزوجة 15W-50 كويسة جدا جدا .. خصوصا إننا داخلين على الصيف.. وكل الزيوت بتبقى سريعة السريان في الحر بدون استثناء.


أما بالنسبة لاستفسارك عن آمسويل...

فالقاعدة دايما هي مقارنة المواصفات أولا.. وبعدين نبقى ندور على موضوع التخليقي والمعدني...

ميزة الزيت التخليقي الحقيقي بتبقى في حاجتين :

1- سرعة سريان عالية في بداية التشغيل... وبالتالي حماية أكبر في النقطة دي تحديدا.

2- ثبات كيماوي عالي خصوصا في درجات الحرارة العالية قوي والمنخفضة جدا.. وبالتالي بيبقى عمره أطول في الموتور.


بس كده...


ومع ذلك.. فمواصفة API SL تعتبر أعلى من متطلبات كتالوج الفيرنا.. وبالتالي فالزيت مناسب لعربيتك..

إنما لو لقيت زيت معدني بنفس اللزوجة ومستوى أداء أعلى (SM أو SN) استخدمه وانت مغمض... بس ابقى غيره حسب توصيات الكتالوج.. مش أكتر من كده.

والزيت ده موجود فعلا في مصر... (التعاون SM بدرجة لزوجة 20W-50).



أما بالنسبة لزيوت Motul... فحسب كتالوج الفيرنا مفيش عندهم حاجة تنفعك... وحتى الزيوت التخليقية بتاعتهم اللي لزوجتها عالية زي 15W-50 فهي مخصصة للسباقات وبيقولوا إنها أعلى من كل المواصفات الحالية.. بس مش شايف أي اعتماد رسمي من أي جهة عالمية (ولا API ولا ACEA ولا أي حاجة خالص)..

https://www.motul.com/fr/en/products...iscosity%5D=32


أما زيوت Mannol.. فبصراحة ما لقيتش عندهم حاجة ملفتة.. زيوتهم عادية جدا ويمكن أقل من العادية..

accessory chemical module title

وأكتر حاجة بتقلقني من شركات الزيوت دي إنهم عندهم قايمة منتجات خاصة بالإضافات.. وأي شركة زي دول مش بفضّل أتعامل معاهم خالص... ودي نفس حالة زيوت ليكوي مولي وزادو مثلا.



ملخص الكلام...

اشتري آمسويل لو عايز حماية في بداية التشغيل ومشيك قليل... واشتري التعاون لو عربيتك بتمشي مشاوير طويلة نسبيا.


...

المشاركة الأصلية كتبت بواسطة hassan_attia

الف شكر يا بشمهندس معلش سوال تاني طيب دلوقتي في الكتالوج طبقا لظروف القيادة بتعتي و اللي الكتالوج مصنفها قيادة قاسيه الكتالوج بينصح بتغيير الزيت كل 6 شهور فهل انا لو جبت الامسويل هغيرة برده علي 6 شهور ؟ وفي حاجه تاني انا بردة مش فاهمها دلوقتي لو معانا 20w50 معدني و 20w50 تخليقي ليه التخليقي هيبقي اسرع في الانتشار عند بداية دوران الموتور مش هما الاتنين تقال و لزوجتهم عالية؟ بشكرك تاني و تعبتك معايا

طبقا للبروشور بتاع زيت آمسويل Premium Protection 20W-50 Synthetic Motor Oil...

AMSOIL Premium Protection 20W-50 Synthetic Motor Oil

هما قايلين إن الزيت يقعد لحد 15 ألف ميل (24 ألف كيلومتر) أو سنة كاملة .. أيهما أسبق... وده في جميع الحالات العادية والشاقة... وممكن أكتر من كده لو عملت تحليل للزيت وكانت النتيجة كويسة.

الكلام ده مكتوب بالنص في الصفحة التانية من البروشور في الرابط ده:
http://www.amsoil.com/lit/databulletins/g2212.pdf


بالنسبة لاستفسارك عن سرعة الانتشار.. فهو الحقيقي سؤال وجيه ومنطقي.. بس للأسف معنديش إجابة وافية دلوقتي.


...