السلام عليكم ورحمة الله وبركاته بسم الله الرحمن الرحيم
بالنسبة لموضوع الجي بي إس تراكرز انا كنت شغال سنة ونص في شركة تتبع سيارات
الحمد لله أخدت خبرة كبيرة في الحاجات دي بس لأسباب شخصية أنا سيبت الشركة دي وشغال دلوقتي في مجال تاني خالص
أنا أصلا مهندس إتصالات " هندسة إلكترونية منوف "
ندخل بقي في الموضوع علي طول عشان أنا شايف ناس كتير بتسأل عن الحاجة دي ومحدش كتير عارف عنها لأنها لسة جديدة ومانتشرتش في مصر جامد عشان الناس تبقي متأكدة منها
أجهزة التتبع الموجودة في مصر عموما كلها صيني
بس فيه فرق بين صيني فرز زبالة زي التليفونات الصيني اللي إنتشرت في مصر وبسعر رخيص
فبتبوظ بسرعة وبين الأجهزة النضيفة اللي بتتصدر لأوروبا ومش بيبقي فيه فرق بينها وبين أي منتج عالمي قوي ومعاه ضمان
أول حاجة أي واحد فينا لو هيسأل عليها وهو بيشتري جهاز هيا السعر
السعر دا بيتغير من جهاز للتاني علي حسب إمكانيات الجهاز وعلي حسب قوة السوفت وير بتاعة وسهولة الويب سايت اللي بيتم المراقبة والتتبع من خلاله وعلي حسب قوة البوردة بتاعة الجهاز وقوة الـchip بتاعت الإرسال والإستقبال
يعني مالأخر ممكن تلاقي جهاز ب 500 جنيه وجهاز بألف وخمسمائة وجهاز بألفين وهكذا
فرق السعر دا طبعا بيقابله فرق كبير في إمكانيات الجهاز نفسه ودقة تحديده للمكان
بالنسبة للأسعار بتبدأ من 1350 ودا جهاز كوبي مش أوريجنال فيه مايك وزرار طوارئ لحالات الخطر وتقدر تتتبع من خلاله العربية من علي الأكونت الخاص بيك علي موقع الشركة وتقدر توقف العربية وتشغلها عن طريق رسايل من الموبايل
الجهاز التاني دا بقي الأوريجنال عامل بحوالي 1700 جنيه ودا بيبقي فيه مايك وممكن يركب ليه سبيكر بس الإسبيكر بيغلي السعر شوية تقريبا حوالي 100 جنيه زيادة مش فاكر بالظبط
وطبعا زي ماقولت فرق الأسعار بين الأجهزة وبعضها بيبقي لأسباب كتير
الجهاز أبو 1700 دا أفضل من أبو 1350 في الموقع بتاعه وسرعة إستجابة الجهاز للأوامر وسهولة التعامل مع الموقع الخاص بيه وكدا
فيه بقي أجهزة أعلي من كدا كمان بس دي بقي بيركب لها كاميرات وحساسات للأبواب وممكن rfid عالأبواب وحساسات بنزين وشاشات ملاحة
الجهاز لوحده من غير الإكسسوارات اللي فيه تقريبا كان عامل 2000 بس الإكسسوارات اللي فيه دي بقي مش فاكر بكام بالظبط والله
أنا طولت عليكما أنا عارف بس كان لازم أعمل كدا لأن بصراحة مش بحب الفتي الكتير
الحاجة دي أنا كنت شغال فيها والحمد لله تقريبا عندي خبرة كبيرة قوي فيها عشان كدا وأنا بقلب لما لقيت الإستفسارات كتير عليها قولت أجيب مالآخر عشان مش عايز ألاقي حد تاني داخل يسأل علي التراكرز
:D[/FONT][/FONT][/FONT]