تقرير فحص التوكيل للميجان 2006 - هل العربية كويسة و اشترى ولا سيئة ؟؟

**mada0202** · 17-03-2013 07:18 PM

السلام عليكم و وحوش الميجان

النهاردة كشفت على عربية ميجان 2006 اوتوماتيك عاملة 134 الف كيلو و ده كان التقرير بتاعها

فيا ريت تدلونى اذا كان التقرير كويس ولا وحش علشان ان شاء الله هشترى العربية بكرة .

هما سلمونى تقرير بالحاجات اللى محتاجة تتغير فى العربية و كبس الماتور

كبس الماتور كان : 10 - 7 - 7- 9

و الحاجات المطلوب تغييرها
1 ديفيزور
4 كويل
1 فيوز 40
1 علبة دريسكيون
2 مقص
1 طنبورة دينامو
1 شريط ايرباج
2 مدفع حزام
1 كمبيوتر ايرباج
2 حساس جنب ايرباج
1 حساس ضغط فتيس
1 uch
1 كمبيوتر فتيس
1 حساس مستوى زيت الموتور
1 حساس شكمان سفلى
1 حساس abs

و فى اخر التقرير مكتوب
السيارة بها اصلاحات خارط التوكيل و قطع الغيار اصلية.

مع العلم انهم مردوش عليا فى نقطة اذا كانت العربية مرشوشة من جوة ولا لأه و انا بصراحة معنديش اى خبرة فى النقطة دى.
و النقطة التانية قالولى ان العربية عاملة حادثة علشان كده مدفع الحزام و شريط الايرباج و كومبيتور الايباج و حساس جنب ايرباج محتاجين يتغيروا

و لما كلمت الراجل صاحب العربية على النقطة دى قالى هو فعلا العربية حصلها حادثة خفيفة فى جنب الباب و العتب من تحت و كان فعلا اثارهم باينين على العربية و قالى هو ده اللى خلى حساسات الايرباج تضرب.

النقطة التانية ان فيه كارت تشغيل ضايع و قالى انه فيه ناس بتعمل الكروت دى ب 500 جنيه

لان التوكيل بيعمله ب 1850 جنيه

النقطة الاخيرة انا خايف ان العربية جايبلها نص امامى لاننا لما بصينا على العتب حسيت بس ده مجرد تخمين ان العتب ملحوم.

افيدونى ان شاء الله لانى اتفقت مع الراجل انى مش هنفذ الا لما اسال.

**iaibrahim** · 17-03-2013 07:47 PM

لا طبعا ...كل ده يعنى مصاريف كتيره وللعلم هناك احسن منها بكتير بس هو المطلوب فيها كام مع التوفيق

**Land_Cruiser** · 17-03-2013 07:49 PM

لو مكان حضرتك هاصرف نظر . الحاجات اللي محتاجه تغيير كتير و فيها مقصات و حساسات و بالذات بتوع الايرباجز دول وارد جدا تكون عامله حادثه كمان و الايرباجز فتحوا ده غير انها ماشيه كتير و العربيه دي فيها تكنولوجيا زياده عن اللزوم. يستحسن تصرف نظر و تدور علي واحده تانيه ماسكه نفسها شويه حتي لو أغلي

**hossam_elwani** · 17-03-2013 07:57 PM

بلالالالالالالاش حاجات كتير واساسيه كفاية كميوتر الفتيس عليك

**mada0202** · 17-03-2013 08:09 PM

اولا انا بشكركم كلكم على اهتمامكم بالرد .
خلينى اوضح كام نقطة
العربية تمنها على 55 الف جنيه
و اتفقت مع صاحب العربية انه هيغير الكلام ده على حسابه (حساس الايرباج و حساس الحزام و حساس abs و حساس الشكمان)

بالنسبة لموضوع الايرباج فاللى فهمته من المهندس و من صاحب العربية ان اللى حصل ان العربية اتخبطت فكمومبيتور حزام الامان سجل الصدمة و فرقع حساسات الايرباج بس الايرباج اللى فى التابلوهات منفجرش.

بالنسبة لحساس الفتيس فالمفروض ان صاحب العربية قالى انه غير حساس الفتيس و الكلام ده اكدهولى المهندس قالى ان حساس الفتيس متغير فسألته طب ده فيه مشكلة قالى معرفش

و عموما العربية عاملة صيناتها خارج التوكيل.

تقريبا كده انا وضحت الصورة تماما.

منتظر ردكم

**mada0202** · 17-03-2013 08:12 PM

نقطة اخيرة ممكن تكون الحاجات المكتوبة دى محتاجة تغيير علشان هى مستهلكة ولا عموما التوكيل بيقول اى حاجة حتى لو بسيطة محتاجة تتغير. لان على كلام صاحب العربية انه مغير معظم الحاجات دى.

**hilal** · 17-03-2013 08:49 PM

نصيحة لله من واحد باع الميجان بالخسارة
ابعد عن الاتوماتيك في موديل 2005 وموديل 2006 ، لأن فيهم عيوب تصنيع ، ومشاكل الفتيس هتخليك تلعن اليوم اللي اشتريتها فيه ، والله الموفق والمستعان

**hilal** · 17-03-2013 08:53 PM

بالاضافة لما سبق ، العربية دي حاجاتها غالية ، وهتصرف عليها تمن عربية زيرو ، وإلا هتفضل تتفرج عليها فقط وتتحسر ، دي عربية بنت ......... بلاش عشان الرقابة

**mada0202** · 17-03-2013 08:56 PM

المشاركة الأصلية كتبت بواسطة hilal

بالاضافة لما سبق ، العربية دي حاجاتها غالية ، وهتصرف عليها تمن عربية زيرو ، وإلا هتفضل تتفرج عليها فقط وتتحسر ، دي عربية بنت ......... بلاش عشان الرقابة

ليه بتقول كده - ده انا قرات كتير عن العربية هنا فى المنتدى و الناس مبسوطة منها .

**hilal** · 17-03-2013 09:01 PM

موديل 2005 و 2006 الاتوماتيك بالذات فيهم عيب فتيس لو كانت زيرو ، وعشان كده هتلاقيهم أرخص موديلين ، أنا دخت بها في مراكز الخدمة وصرفت عليها أكتر من 10 آلاف جنيه ، وفي النهاية بعتها بالخسارة واشتريت نفسي ، وهتروح بعيد ليه ، إسأل الاول على قطع الغيار المطلوبة وشوف بنفسك وخد قرارك ، بس نصيحة من واحد مجربها ، اللوجان برقبتها