العزيز أ/مصطفى،
قبل أي شئ دعاؤنا بالرحمة والمغفرة لوالدتك الغالية ونسأل الله أن يطهرها من الذنوب والخطايا كما يطهر الثوب الأبيض من الدنس، وأن يدخلها فسيح جناتة برحمتة وهو أرحم الراحمين.
طبعا حتستغرب ان أول مشاركة ليا في المنتدى تكون للرد على موضوعك على أني عضو هنا من سنة ونصف تقريبا، بس غالبا كنت باتفرج بس لان مافيش شئ أضيفة، يعني بطبيعتي ما بأحبش ردود الشكر المشهورة في المنتديات.
وأيضا كنت قبل قرأءة هذا الموضوع قرأت لك موضوع أخر عن فلتر تكييف اللانوس والذي طال بأسلوب المسابقات اللي انت عاملة وأصبحت الردود تتهمك بالغرور نظرا لاسلوب الموضوع، وبصراحة دة كان شعوري ودة برضة اللي شدني أشوف موضوع لوحة التكييف علشان أتأكد من أسلوبك.
واليك تصوري النهائي، طبعا انت ماشاء الله عليك ربنا حباك موهبة البساطة في الشرح والقدرة على تصوير الجزء المراد شرحة بصورة تصل إلى الأعضاء بسهولة، وسبب أني بأقول كدة أني عملتها من سنة وفكيت لوحة التكييف وغيرتها كلها بواحدة استيراد علشان الوايرات اتنين منهم قطعوا، وطبعا كنت شغال بطريقة التجربة والخطأ لما طلع عين أهلي، فأكيد أنا مقدر جدا ان اللي انت شرحتة ببساطة محتاج ساعات علشان تكتشفة طالما انك ما عملتوش قبل كدة.
ثانيا فيه نقطة مهمة لازم تاخد بالك منها، ان مش كل الناس ممكن تسيب الكيبورد وتنزل تجرب في عربيتها لمجرد الاختبار كما في موضوعك الأخر، أنا أكيد فكيت عربيات كتير زي حالاتك ولو راجعت ملفي الشخصي حتفهم انا ليه عندي الجرأة وأنا بأفك علشان تخصصي أو شغلي، وحتى انا والحمد لله ربنا رازقني بكورولا حديثة مستحيل أجرؤ أفك فيها مسمار والنترا دي نص نص ممكن أفك وممكن لا ولانوس ودي حقل التجارب بتاعي، فطبعا ماتلومش على الناس اللي خايفة تفك أو عايزة تفضل أمام الكيبورد لانها موهبة أولا وشجاعة ثانيا وتعود ثالثا.
لكن الطريقة التانية اللي انت استخدمت فيها الفيديو في الموضوع دة ممتازة لانها اولا حتزيل حاجز الرهبة من عند الكثيرين ثانيا حتسهل جدا عمليات الفك والتركيب لانهم مش حيحتاجو يمشوا ورا كل سلك ومسمار علشان يفهموا رايح فين وجاي منين زي ما بنعمل، وفي الأخر طالما انك لا تبغى ربح من الموضوع وعاملة لوجة الله حتوصل الفائدة المرجوة وتكسب الثواب، مع تقدير الجميع للمجهود الجبار المبذول منك لاننا في الأصل مش صنايعية وأكيد بيكون الموضوع صعب جدا.
أرجو أن تتقبل رسالتي ونصيحتي لأنك فعلا عامل موضوع أكثر من ممتاز (شغل بتاع برة)
تحياتي
أحمد نصر
المفضلات