شوية استفسارات و محتاج مشورتكم

**peter magdy** · 25-03-2013 12:49 AM

مساء الخير على احلى شباب المنتدى
و مساء خاص لمشرفنا المميز / استاذ باسم و لكل الاصدقاء
انا كنت عايز على كام حاجة كدة و كنت منتظر من حضراتكم الافادة علشان حضراتكم عندكم خبرة
--------------------------
بالنسبة للمية
انا عايز ازود مية خضراء للسيارة و كنت جبت جركن 25 جنية بس طلع مضروب
فسمعت عن مية بنزينة موبيل - بس سمعت ان المية ليها تركيزات مختلفة و مية موبيل على ما اعتقد انها 30 % فهل دى كويسة ولا اجيب منين مية - علشان كل اللى موجود مضروب
-----------------------
بالنسبة لزيت الموتور
انا عرفت ان الزيت ميقعدش اكتر من 6 شهور فى الماتور حتى لو ممشيش المسافة المقرر انة يمشيها ( يعنى قصدى لوهو يمشى 5000 كم و انا مشيت 2500 كم بس عدى علية 6 شهور فى الماتور ) هل اغير الزيت و هو لسة محتفظ بقوامة ولا استنى علية شوية
و هل اغيرة فى التوكيل ولا اغيرة فى محطة شل و اغير الفلتر كمان ؟
هل اشترى الفلتر قبل ما اروح ولا هما بيغيرة هناك - لو هشترية هجيبة منين و بتاع لانسر ولا بتاع العربية عادى ؟
----------------------
بالنسبة للكاوتش
هل اسيبة هواء عادى ولا اغيرة للنيتروجين
علشان كل ما اسأل ناس تشكر فى الهواء و تقول ما فيش فرق و النيتروجين دة اشتغالة - و ناس جربتة و رجعت للهواء العادى تانى
و ناس تقول النيتروجين بيريح العربية و خصوصا فى المطابات
اللى جربوة برضو يفيدونا برأيهم
---------------------------------------------------------
انا اسف على الاسئلة الكتير
و ارجو من حضراتكم الافادة
شكرا

**hany901119** · 25-03-2013 08:36 AM

ازيك يابيتر ....

انا سمعت قبل كده بردو ان الميه الخضرا بتاعة موبيل كويسة ولكن لسه مجربتهاش (فى طريقى للموضوع ده) فى العربيه اللى قبل دى كنت بجبلها ميه خضراء مركزة امريكى تضاف على الماء اللى موجود فى الريداتير عادى وكانت بتاع 300ملى تقريبا وبـ 15ج ليا فترة بدور عليها ومش لاقيها ولو حصل ولقتها هبلغك على طول وعلى العموم انا لما بزود ميه للعربية بحط ميه معدنية ازازة صغيرة كده بزود منها علشان مفهاش املاح تاكل الريداتير واللى قالى كده صنايعى ضليع فى تصليح الرداتيرات.

بالنسبة للكاوتش انا عن نفسى مرتاح مع الهوا ومحستش بأى فرق لما ركبت عربية نسيبى التويوتا كرولا 2003 وهو مالى الكوتش نيتروجين علما بأنى ياما ركبتها وهريتها مشاوير مش يوم ولا اتنيييين .

نيجى للزيت ياعم بييييتر انا دلوقتى ماشى على زيت فيسكو 3000 واللى بيمشينى 10000كيلو لكنى بنزل الزيت على 7000كيلو والزيت ده يابيتر هو روح المكنة راعيها فى الزيت ومواعيد تغيروه تديك زى ماانت عايزعلما بأنى بحط اضافة مع تغير الزيت اللى انا قولت عنها قبل كده اللى اسمها ايزى علشان تدينى عمر اطول للمحرك وتبردوا وبتعمل زى عملية تغليف لأجزاء المحرك من الداخل لتقليل الاحتكاك وطبعا التأكل ودى اضافه للماتور الغاز لأنى مركب غاز (يوجد اخت هذه الاضافة للماتور البنزين) وبحطها دلوقتى مرة آه ومرة لأ وكده كده حاول متصبرش على ميعاد الزيت لانه كل مابيتوسخ من الرصاص اللى موجود فى البنزين الشوائب دى بتترسب فى الماتور فحاول اصلا مطولش على الزيت مراعاة لعربيتك بغض النظر على ميعاد تغيروه.

**bassem.naguib** · 25-03-2013 09:39 AM

بيتر باشا .. أزيك .. مش ظاهر ليه .. لعل المانع خير

المشاركة الأصلية كتبت بواسطة peter magdy

بالنسبة للمية
انا عايز ازود مية خضراء للسيارة و كنت جبت جركن 25 جنية بس طلع مضروب
فسمعت عن مية بنزينة موبيل - بس سمعت ان المية ليها تركيزات مختلفة و مية موبيل على ما اعتقد انها 30 % فهل دى كويسة ولا اجيب منين مية - علشان كل اللى موجود مضروب
-----------------------
هات الكانز كويسة عن تجربة .. وبتتزود بمياه عادية لأنها مركزة .. أو ممكن تزودها مياه مقطرة لو عاوز تدلع العربية .

بالنسبة لزيت الموتور
انا عرفت ان الزيت ميقعدش اكتر من 6 شهور فى الماتور حتى لو ممشيش المسافة المقرر انة يمشيها ( يعنى قصدى لوهو يمشى 5000 كم و انا مشيت 2500 كم بس عدى علية 6 شهور فى الماتور ) هل اغير الزيت و هو لسة محتفظ بقوامة ولا استنى علية شوية
و هل اغيرة فى التوكيل ولا اغيرة فى محطة شل و اغير الفلتر كمان ؟
هل اشترى الفلتر قبل ما اروح ولا هما بيغيرة هناك - لو هشترية هجيبة منين و بتاع لانسر ولا بتاع العربية عادى ؟
----------------------
يفضل طبعاً أن الزيت ميقعدتش كتير في العربية حتى لو ممشتش المسافة المقررة ليه .. تغيره في التوكيل أو بره دي حاجة ترجع ليك .. مع عدم الإخلال بشروط الضمان حتى لا تخرج العربية من الضمان .

بالنسبة للكاوتش
هل اسيبة هواء عادى ولا اغيرة للنيتروجين
علشان كل ما اسأل ناس تشكر فى الهواء و تقول ما فيش فرق و النيتروجين دة اشتغالة - و ناس جربتة و رجعت للهواء العادى تانى
و ناس تقول النيتروجين بيريح العربية و خصوصا فى المطابات
اللى جربوة برضو يفيدونا برأيهم
---------------------------------------------------------
بالنسبة للنيتروجين أنا شايف أن الميزة الأساسية فيه هي عدم تأثره (بالتمدد أو الانكماش) بحرارة الجو الخارجية .. مثال لذلك لو على طرق سفر باستمرار وفي جو ساخن يفضل النيتروجين .. إنما مشيك جوة البلد مش حتفرق كتير .. بالإضافة أنه مفيهوش نسبة بخار مياه في مكوناته تؤثر على الجنط نفسه لو الجنط حديد أو على الكاوتش .

انا اسف على الاسئلة الكتير
و ارجو من حضراتكم الافادة
شكرا

متنساش يوم الخميس الجاي .. ومفيش أعذار .. حنة مش عارف مين .. وفرح مين والكلام ده .. ويا ريت هاني يجي علشان نتشرف بيه .

http://www.nilemotors.net/Nile/342204-a.html

**bassem.naguib** · 25-03-2013 11:09 AM

يا ريت تشرفنا بوجودك يا باشا لو ينفع .. وحنكون سعداء بتواجدك معانا .

**elmanahry** · 26-03-2013 05:04 AM

الاعزاء اريد اعرف الفرق بين المية الخضرة والحمراء زودت السيارة بمياه خضراء ولكن الدورة امتلات بفقاقيع هواء ارسلتها للتصليح فاستبدل الصنايعى الماء الاخضر بالماء الاحمر وارسل لى نصيحة باستعمال الماء الاحمر واشتريت جركن مياه حمراء احتياطى بعد تغيير المياه من الخضراء للحمراء بالمناسبة دائما كنت استعمل مع السيارة مياه حمراء ولم تحدث مشاكل الا بعد ان ذودت بمياه خضراء ارجو الافادة وشكرا

**bassem.naguib** · 26-03-2013 09:58 AM

منور يا د. محسن .. عاش من شافك .

المشاركة الأصلية كتبت بواسطة elmanahry

الاعزاء اريد اعرف الفرق بين المية الخضرة والحمراء زودت السيارة بمياه خضراء ولكن الدورة امتلات بفقاقيع هواء ارسلتها للتصليح فاستبدل الصنايعى الماء الاخضر بالماء الاحمر وارسل لى نصيحة باستعمال الماء الاحمر واشتريت جركن مياه حمراء احتياطى بعد تغيير المياه من الخضراء للحمراء بالمناسبة دائما كنت استعمل مع السيارة مياه حمراء ولم تحدث مشاكل الا بعد ان ذودت بمياه خضراء ارجو الافادة وشكرا

الموضوع ده فيه الخلاصة :

http://www.nilemotors.net/Nile/85378-a.html

وأنا من وجهة نظري يفضل النوع الذي أوصى به صانع السيارة .. وأكيد حيكون مكتوب في مانيوال السيارة .