الموضوع: Positive Crankcase Ventilation Valve مين ده

اسمه Positive Crankcase Ventilation

نتيجه لحركه البساتم فبيحصل خلخله للضغط في الفراغ الموجود اسفل البساتم و الخلخله دي لازم يتعمل لها تنفيس علشان متاثرش علي السيلات والشنابر
وفي نفس الوقت بيحصل تسريب بسيط لمخلوط الوقود والهواء من الشنابر مع وجود بخار للزيت

علشان تحافظ علي البيئه مينفعش انك تطرد بخار الزيت و مخلوط الوقود الغير كامل الاحتراق للشكمان فبيتم اعده تدويرهم واعادتهم لغرفه الاحتراق مره ثانيه

بيتم اعادتهم عن طريق استغلال وجود فرق ضغط قبل وبعد بوابه الهواء .بعدها ضغط منخفض وقبلها الضغط الجوي فبيتم توصيل خرطومين من الفارغه بتاعه الموتور واحد فيهم بيتوصل في الخرطوم الكبير اللي بين فلتر الهواء و بوابه الهواء وده غالبا الخرطوم الواسع و الثاني بيتوصل عند بوابه الهواء وده غالبا بيكون خرطوم رفيع

نتيجه لوجود فرق ضغط بين الخرطومين بيحصل تدوير للهواء في فارغه الموتور يعني بيدخل هواء نقي لفارغه الموتور من الخرطوم الواسع ويرجع الهواء تاني من الخرطوم الضيق لبوابه الهواء وبالتالي للبساتم ويتم اعاده حرقه مره اخري
فكل اللي حضرتك بتعمله انك تتأكد من نقطتين
الاولي ان مسارات الهواء سالكه ومش مسدوده وخاصه الفتحه الضيقه اللي موجوده في بوابه الهواء لانها لما بتتسد بتخلي ابخره الزيت تترسب في الخطوم الكبير اللي بين الفلتر والبوابه
والثاني تتاكد ان الخراطيم دي مش مخرومه لانها لو مخرومه هتأثر علي ضغط الهواء في الموتور وبالتالي هتأثر علي عدد لفات الموتور
طبعا النظام ده ممكن ياثر بالسلب او بالايجاب علي الموتور واستهلاك البنزين وسحب العربيه
يعني لو حاله الموتور كويسه هيحصل تسريب بسيط لمخلوط الوقود وتبخير بسيط لزيت الموتور وبالتالي اعاده حرق لنسبه لنسبه بسيطه هتحسن استهلاك الوقود
اما لو كانت حاله الموتور سيئه هتلاقي نسبه تبخير الزيت عاليه وبالتالي كميه الزيت اللي هترجع للموتور هتأثر علي كفائه الحرق وسحب العربيه
ولو فيه اي استفسار انا تحت امرك

هتفك الخرطوم الرفيع اللي واصل بين البوابه وجسم الموتور وتتاكد ان الخرطوم ده مش مخروم ولا مسدود
الباشبوري اللي في جسم البوابه بتاعه الهواء اللي راكب فيه الخرطوم ده جواه ثقب صغير في جسم البوابه نفسها الثقب ده لازم يكون سالك مش مكتوم
الخرطوم اللي واصل بين جسم الموتور وعمه الهواء لازم تتاكد انه مش مسدود بسبب ترسيبات الزيت
اظن ده اللي نقدر نعمله