ازاى تغير المساعدين الخلفية بنفسك (ابيزا - بولو - فيليشيا......) بالصور
السلام عليكم ورحمة الله
قبل اى احاجة انا بعتذر عن تغيبى اليومين اللى فاتوا عن المنتدى وذلك لشوية تغيرات فى عملى بس حبيت لما ارجعلكم ارجع بموضوع كده على الماشى لعل الكل يستفيد
الموضوع طبعا زى ماهو واضح فى العنوان (ازاى تغير المساعدين الخلفية بنفسك) وانا كاتب اسماء 3 عربيات مش عشان انا غيرت ال 3, لأ , عشان انا عربيتى ابيزا وطريقة التركيب مشتركة بين عربيات كتير خصوصا البولو والفليشيا مع اختلاف ان مساعدين الفيليشيا اطول شوية
طيب ليه اساسا بنحتاج نغيرالمساعدين؟؟؟؟
بنغير المساعدين فى حالتين:
1- المساعد خفيف: وده هتحسه فى مطبات الهوا هتلاقى العربية بتتمرجح لفوق ولتحت بشكل ملحوظ يصعب السيطرة عليها فى السرعات العالية
وتقدر تتأكد اكتر لو سندت ايدك على رفرف من الرفارف وهزيت العربية لفوق ولتحت بقيمة 10 كيلوجرام تقريبا ولقيتها بتتحرك بسهولة وجايز كمان بعد ماتشيل ايدك تلاقيها لسه بتتحرك وساعتها يبقى المساعد ده مسافر ومش راجع تانى
2- المساعد محجر(ناشف): وده هيبان معاك فى الملفات والغرز هتحس ان العربية بتمشى بالعرض وصوت تهبييييد فى الفخدة
ونقدر نتأكد من تحجير المساعد عن طريق نفس الاختبار اللى فات بس ساعتها العربية هتتهز بصعوبة جدا
نرجع لموضوعنا الاساسى
المشكلة عندى انى كنت حاسس لما باخد غرزة ضيقة على سرعة عالية شوية اوبدخل ملف على العاصى ان العربية مش ماسكة فى الارض رغم انى مجنط 16 والكاوتش جديد وطبعا ثبات الابيزا المعروف او الاوروبى عموما وكمان كنت بسمع تهبيد لما بعدى على ارض فيها كلاكيع اسفلت اللى بتكون دايما قبل المطبات الصنايعية بسبب فرملة العربيات عليها بشكل متكرر
وبصراحة انا كنت عارف من قبل كده ان المساعدين محجرة وكان الميكانيكى قايللى لازم يتغيروا وانا كنت مطنش وافتكرت ان الموضوع هيتحل لما هغير الجنوط والكاوتش لكن فى الحقيقة الموضوع بان اكتر خصوصا لما غيرت العفشة الامامية بالكامل فى موضوعى http://www.nilemotors.net/Nile/341077-98.html
نزلت على الراجل بتاع الاستيراد وقولتلوا عايز جوز مساعدين خلفى ابيزا 98, سألنى معاك عفشجى, قولتلوا لأ انا اللى هركبهم بنفسى, قاللى طيب نقى اللى انت عايزه
كان فيه مساعدين مكتوب عليهم 6k وفيه 6n بخط كبير شوية ودوول تعرف على طول انهم مساعدين الفبريكة بتوع الابيزا لو 6k وبتوع البولو لو 6n ودوول بيكونوا زيت
طلعتهم على جنب ودورت تانى لقيت مساعد مكتوب عليه Monroe و 6n (بتاع بولو 90ـــات) والمونرو ديه طبعا ماركة مشهورة جدا فى عالم المساعدين واليايات ومحترمة جدا وفى مصر غبور هو اللى واخد توكيلها وكنت سائل قبل كده عندهم على جوز مساعدين امامى بدون يايات كانوا عاملين حوالى 800 جنيه والخلفى ارخص شوية
طبعا كنت مبسوط انى لقيت مساعد زى ده استيراد بس المهم فى الموضوع لما تشترى مساعدين استيراد (او اى جزء فى العفشة هتشتريه للجانبين استيراد) انك تحاول تجيبهم اخوات, يعنى يكونوا طالعين من نفس العربية عشان تضمن انهم يكونوا نفس العمر (الموضوع مش سهل ومفيهوش شطارة بس هى حظوظ)
طيب نعرف ازاى انهم اخوات (وبرده مش اكيد 100%)؟؟؟؟ بص الافتكاسات بقى:
فيه علامات ظاهرية وفيه علامات داخلية
العلامات الظاهرية زى الكاوتشات العلوية والجلب يكونوا تقريبا فيهم نسبة التأكل زى بعض فى ال 2 المساعدين وطبعا الكتابة تكون متطابقة
العلامات الداخلية وهى مقدار مقاومة المساعد للضغط, يعنى ايه مش فاهم؟؟!!
يعنى وقف المساعد بين رجليك واضغط عليه بكلوة ايديك الاتنين بضغطات متتابعة ولاحظ مقدار مسافة نزول المساعد وقيمة مقاومته للضغط
المهم فضلت ادور على فردة المساعد المونرو التانية لحد ما لقيتها وتأكدت ان مفيش مساعدين مونرو تانى وتأكدت اكتر انهم اخوات لما عملت اختبار الضغط ولقيت نفس مقدار المقاومة فى الجوز مساعدين زى بعض
كان فيه طقمين تانيين كنت مطلعهم قبل المونرو عشان اختار بينهم وعملتلهم الاختبارات ولقيت طقم بينزل ويطلع كويس والطقم التانى مش بيتحرك مللى وعرفت ان ده محجر
لكن المونرو كان بين البينين
ودوول شكلهم
http://nileup.com/up/uploads/nilemotors_13646334311.jpg
http://nileup.com/up/uploads/nilemotors_13646334641.jpg
الموضوع سهل جدا
الادوات المستخدمة:
كوريك
مفتاح اطارات
مفتاح 17 بناحية (يفضل بيبة عشان التقريط)
الطريقة:
1- ارفع العربية بالكوريك من الجنب اللى هتغير فيه المساعد وفك العجلة
2- فك (من غير ما تشيل) المسمار اللى ماسك المساعد بالدنجل (مسمار 17 بصمولة)
http://nileup.com/up/uploads/nilemotors_13646338391.jpg
3- هنفتح الشنطة ونبص على الفخدة (البطيخة) هنلاقى كاوتشة بتركب كبس ودى عشان تحمى الصماويل من التراب
http://nileup.com/up/uploads/nilemotors_13646340051.jpg
4- هنلاقى صامولة هنفكها وهنلاقى تحتها طبق هنشيله
http://nileup.com/up/uploads/nilemotors_13646342131.jpg
5- هنلاقى صامولة تانية هنفكها وهنلاقى تحتيها طبق صغير هنشيله وهنلاقى تحتيه كاوتشة زى البطاحة برده هنشيلها وهنلاقى تحتيه طبق تانى اصغر وده بقى هنشيله برده
طبعا كله اتلخبط على بعضه ومبقناش عارفين مين قبل مين (يادى الحوسة)
عشان متتلغبطش اعمل كده
http://nileup.com/up/uploads/nilemotors_13646348051.jpg
6- ننزل تحت تانى ونخلع المسمار اللى ماسك فى الدنجل (فاكره ولا نسيته؟؟) شكلك نسيته
المفروض المساعد يطلع من العربية بالشكل ده
http://nileup.com/up/uploads/nilemotors_13646349851.jpg
لو طلع من غير الكاوتشة اللى فوق يبقى اعرف ان الكاوتشة محشورة ودخل ايدك وطلعها
http://nileup.com/up/uploads/nilemotors_13646351741.jpg
ودى شكل المساعدين بتوعى بعد ما طلعوا من العربية واكتشفت انهم بتوع الفابريكة
ياريت تلاحظوا مقدار الاعوجاج اللى فى اليايات
http://nileup.com/up/uploads/nilemotors_13646355731.jpg
وعشان نركب المساعد الجديد هنعكس الخطوات السابقة من 6 الى 1 بالترتيب
خلى بالك: المساعد الاستيراد بيجى كده (كل حاجة راكبة على بعضها)
http://nileup.com/up/uploads/nilemotors_13646357341.jpg
يعنى لازم الاول تفككه زى ما فكيت المساعد من العربية
النتيجة بعد التركيب:
الحمد لله احسن
العربية ماسكة نفسها فى مطبات الهواء والملفات والغرز والفرق ملحوظ
متنساش بعد يومين كده بعد ماتكون مشيت بيها وناس ركبت معاك واحمال, تقرط تانى على المسامير عشان تكون الكاوتشة خدت وضعها
نسيت اقول ان جوز مساعدين بولو مونرو بــ200 جنيه (عشان الناس اللى بتقول الالمانى قطع غياره غالية)
وشكرا
