الموضوع: رينو لوجان اوتو ...حقا انها سيارة مقلب!!!!!!!

المشاركة الأصلية كتبت بواسطة walidzakzok

بسم الله الرحمن الرحيم

بداية احب اقول ان انا كنت راكب قبل كدة 128 موديل 2006 من الزيرو ونيسان تيدا 2008من الزيرو ونيسان صني مستعملة 2004 وكيا اوبتيما 2002 كلهم اوتوماتك ماعدا ال 128 طبعا

اللوجان اللي معايا موديل 2013 عاملة 8000 كم اوتوماتيك

اولا مميزات اللوجان الاوتوماتيك:
كاوتش 15 عالية عن المطبات صالون واسع سقف عالى سعرها منافس (لما كانت ب 80 الف)

ثانيا عيوب العربية:
للاسف معظم مالكي اللوجان بيبقوا طالعين من عربيات اقل فى التكنولوجيا زي الفيات القديم واللادا اما لو كنت طالع من عربية معقولة هاتحس انك اخدت مقلب تمام اوي فى العربية دي نيجي بقى للعيوب بالتفاصيل

1- ابعاد العربية وخصوصا الشنطة تحسسك انك مش مسيطر على العربية فى الركن لانك تقريبا مش شايف حاجة من ضهر العربية
2- دهان العربية ممكن بظافرك تشيله اسوا دهان عربية شوفته فى حياتي دهان شركة النصر بتاع 128 كان احسن 100 مرة
3- سحب العربية زفت فى الطلعة لحد الغيار التاني وانا بقارنها ب عربيات 1300 زي اليارس الاوتو تتفوق بمراحل
4- الدركسيون تقل جدا تقريبا كدة كانه مفيش باور فيه والله ال 128 كان دريكسيونها العادي انعم
5- الكرسيين اللى قدام ظهرهم بيلعب معاك مع الفرامل واللي مش مصدقني يشوف اي عربية لوجان هيلاقي الظهر بيتحرك ومالهاش حل فى التوكيل
6- صوت موتور غبي خصوصا فى المطالع والكبس
7- الكاوتش اللي العربية نازلة بيه لا يستحق تعريفة وممكن يسبب كوارث ودي ممكن تلاقوها فى مواضيع كتير فى المنتدى
8- المصيبة الكبرى العربية دي الفتيس بيعمل تنتيش مع الكبس على مزاجك فى الغيار التاني مكرر اللي الناس مش عارفة ايه لزمته ولما تهدي بالعربية تحس بتسليمة كل غيار للى اقل منه محستهاش فى اي عربية اوتوماتيك تانية
9- سعر قطع الغيار مبالغ فيه جدا على سيارة زي دي
10- العربية من شركة داتشيا الروماني بدعم فني من رينو وبتتجمع فى المغرب يعنى كوكتيل تعبان جدا!!

وفى النهاية احب اقول ان دة تقييمي كاحد ملاك العربية اللي انا مستاء منها جدا

واكيد واحد هايقولي انت لشتريتها ليه هاقوله مكانش فيه ليها اي بديل بالسعر دة ومساحة الصالون دي

ونصيحة لاي حد مقدم على شراء العربية دي بلاش وفيه بدايل تانية احسن لان اللوجان هيا التطور الطبيعي للعربية الادا

طبعا انا عارف ان فيه بعض الاعضاء هايخشوا يهاجموا علشان صعبان عليهم الفلوس اللي دفعوها او الاقساط اللي عليهم بس انا بوجهلهم رسالة وبقولهم انتوا كنتوا السبب في ان ناس كتير تلبس العربية دي وبلاش دفاع وخلاص وياريت اللي هايخش يدافع يكتب ايه العربيات الاوتوماتيك اللي ساقها قبل كدة وكام الف كيلو يعني مايكونش خد لفة بعربية ويقارنها باللوجان

واخيرا كلمة لكل واحد بيفكر فى العربية دي الفرق بينها وبين الصني الجديدة اصبح 10000 جنيه او حتى ال بي واي دي فرق بسيط جدا .....اشتري نفسك واشتري حاجة منهم او خليك فى الفيات او اللادا اللي انت راكبها بدل ما يتخرب بيتك صيانة وسعر اعادة بيع زي الزفت

وبقول للناس اللي بتطبل للعربية دي وهية عارفة انها لاتستحق اتقوا الله وشكرا

والسلام عليكم ورحمة الله

اول حاجة يا باشا رأيك يحترم و على راسنا من فوق بس اسمحلي اعقب على كل نقطة انت كاتبها و نتناقش فيها، بس الاول انا هنفذ طلب حضرتك في اني احكم على العربية بناء على تجربة اكثر من عربية فئات عالية و فئات متوسطة و فئات قليلة.

انا سقت الاتي:
- 128 موديل 78
- لادا 2107
- لادا سمارة 2115
- لانوس 2010
- سوبارو امبريزا 2010
- مرسيدس C180 2010
- اودي a4 2007
- BMW 316 i موديل 2013
- لوجان مانيوال
- لوجان اوتو
- هيونداي اكسنت 2009 اوتو
- لانسر 2007 1300 مانيوال
- لانسر 1300 اوتو عداد كاسر ال300000 كيلو

دول العربيات اللي سقتها مسافات كبيرة تخليني اقدر احكم عليها كويس قوي و اقدر احكم اقارنهم مع اي عربية ثانية.
و انا معايا لوجان 2010 مانيوال من اوائل الدفعات تقريبا 3 دفعة (شاريها في 2009) و لما حبيت اجيب عربية ثانية اوتو في رنج ال80نات جبت اللوجان الاوتو تقريبا ثاني دفعة

انا هرد على كل نقطة برقمها زي ما حضرتك كاتبها

1- معاك ان ظهر العربية عالي و مبيدكش ابعاد مناسبة في الركن و الكلام ده في الاول و بعد كدة مع المرايات بتقدر تركن زي الفل لأنك بتبقى عارف عربيتك. و دي قابلتني فعلا اول ما جبت ال2010 و ركبت باركنج سينسور و خلاص و في ال2012 محتاجتش اركب سينسورز

2- بالنسبة للدهان فانا عملت حادثة كبيييييييييرة جدا عربية تريلا لبست فيا من ورا و الموضوع موجود في القسم و تقدر بنفسك تشوف الدهان اللي بيتشال بالضفر عامل ازاي بعد خبطة تريلا.

3- متقارنش عربية بفتيس و موتور اوروبي بعربية ياباني او كوري لأن العربيات الاوروبي عموما بتبقى ثقيلة في طلعتها و بعد ال60 بتعرف الacceleration اللي على حق ربنا.

4- الدريكسيون فعلا ثقيل بس ده علشان يعوض علو العربية و كلنا قلنا ان الباور فعلا ثقيل

5- موضوع الظهر ده مستحيييييييييل تحسه مع الفرامل لكن لو قمت من على الكرسي و حركت الظهر بايدك قدام و ورا هتلاقي سنة بوش في الكرسي زي ما حضرتك بتقول بس مش لدرجة انو يلعب معاك في الفرامل

6- صوت الموتور ده انا مش هتكلم فيه لأنو سبحان الله سبحان الله نفس موتور الميجان 2

7- الكاوتش ابصملك بالعشرة على الكلام اللي بتقوله و اوؤيدك تمااااااااااما

8- موضوع الثاني اللي مقسوم على نقلتين فده موجود في الميجان و دي انا سقتها و حسيتها لما اشتكيت من الموضوع ده و مكنتش مصدق انو ده الطبيعي لحد ما احمد عبد المقصود اكدلي الموضوع ده و العقيد خالد سوقني عربيته علشان اتأكد منها.

9- سعر قطع الغيار في التوكيل في الحاجات اللي بتتسحب بشكل دوري سواء صيانات دورية او فوانيس او اكصدامات الخ ... فسعرها معقول جدا جدا مقارنة بنفس العربيات اللي حضرتك تفضلت و ذكرتها

10- العربية تصميم شركة داتشيا اللي رينو بتمتلك 60% من اسهمها يعني رينو ليها حق الادارة و تعتبر شركة من شركاتها لكن موتور و عفشة رينو. و مع ذلك بردو انا مش شايف ان فيها مشكلة طالما طالعة بتفس الstandards بتاعة رينو

------------------------------------------------------------------------------------------------------

اما بالنسبة للصني الي حضرتك بتضرب بيها المثل فهي تصميم و موتور و عفشة نيسان و تقفيل مصري و موتور تجميع هندي يعني كوكتيل بردو و مع ذلك بحرتم العربية دي

و خدلك لفة كدة في قسم نيسان اتفرج على مشاكلها من تيل اصلي سئ بيبوظ الطنابير قبل 10000 كيلو و صوت مع الفرامل زي العربية النقل و انذار محتاج مشوار للتوكيل علشان يتفعل و اللي ميعرفش يبقى عربيته فيها اوبشن و مش شغال

و اسمحلي بردو اسجل اعتراضي على كلمة تطبيل اللي بتقولها دي لأن المنتدى مش اوضة و صالة لأ ده ناس كثير جدا من كل الاقسام بتدخل عليه و لو الكلام مش منطقي او اي حد جرب العربية و لقى الكلام مش مظبوط مش كلهم هيسكتوا و بردو مفيش حد فينا بيقول العربية مفيهاش عيوب لكن احنا قلنا عيوب العربية بما يرضي الله.

و عموما ده تقييم حضرتك للعربية و بلسانك انت قلت لو العربية دي نزلت ب80 الف هتبقى كويسة
http://www.nilemotors.net/Nile/269591-a.html