الموضوع: ايهما افضل لزيت الفتيس ليكوى و لا فالفولين

المشاركة الأصلية كتبت بواسطة ahmedselaraby

بسم الله


أولا أنا أعتذر لسيادتك يا بشمهندس محمد و الله ما كنت أعرف ان سيادتك مهندس و كمان مدير مصنع زيوت فوكس فى مصر

و الله انا عندى اسأله كتير مش سؤال واحد


1- هو الزيت ده بيتصنع فى مصر من امتى من سنة كام ؟ يعنى هل هو جديد فى السوق و لا من قديم الأزل ؟

2- ليه مابيتعملوش دعايه فى الجرائد أو حتى على الفيس بوك زى بقية الأنواع الألمانى و الهولندى و البلجيكى و حتى الكويتى اللى فل سوق

3- ما الذى يميز زيت فوكس عن بقية المنافسين ,, يعنى مثلا تلاقى نوع فى السوق يتميز بإضافة النانو سيراميك و ال MoS2 عليه كإضافات و نوع تانى يتميز بتكنولوجيا الماجنيتيك اللى بتلزق على الاجزاء المعدنيه و نوع تانى يتميز بالدرع الحرارى و ديه كلها إضافات و نوع اخر يتميز بتكنولوجيا ترميم المحركات و إضافة المواد المرممه للمحرك و اللى هى بيقولوا أقوى من الصلب و نوع أخر مصمم للعمل فى ظروف القيادة المزدحمه و التوقف المستمر للسياره فى الزحام أى انه يحافظ على الموتور فى هذه الظروف و اخر مشهور انه يخفض صوت الموتور جدا و هكذا ......

4- ما هى أنواع زيوت محركات فوكس فى مصر ,, و هل فيه منها تخليقى بالكامل و خليط و معدنى ؟ و ما هى درجاتها sm sn sl ؟

5- أسعار الأربعه لتر لكل نوع من زيوت فوكس للمحركات ؟

6- ايه المواصفة اللى تنفع فى عربيتى البى واى دى اف 3 ؟ يعنى مثلا 5w-40 و لا 10w-40 و لا 5w-30 ؟؟

7- أماكن بيع زيوت فوكس و هل فيه خدمة توصيل للمنزل و تغيير الزيت زى بعض المنافسين ما بيعملوا

8- سيادتك شايف مستقبل زيوت فوكس فى مصر ازاى ؟؟

9- ما هى معايير الجوده المطبقه فعليا فى مصنع فوكس فى مصر و اللى تخلى الزيت ده لا يفرق عن اللى جى من بره فى شىء ؟


اسف طولت عليك فى اسألتى ,, و لو فيه حاجه سيادتك تحب تضيفها أكون شاكر لكل معلومه من سيادتك.

انا اسف جدا على التاخير في الرد بس انت عارف بقى الشغل وبلاويه المهم انا بس اولا عايز اعرف انت بتعتذر عن ايه هو انت قولت حاجة غلط وبعدين مفيش اسف ولا حاجة انت تؤمر ياباشا وتسأل في اللي انت عايزه وانا ان شاء الله ربنا يقدرني واعرف اجاوبك

شوف يا سيدي تعالى نمسك سؤال سؤال

1-بص يا سيدي من حوالي 10 سنين كانت فوكس موجودة في مصر بس بزيت الفرامل والشحم وكان بيعبأ فقط في مصر لكن بيجي متخلط جاهز من المانيا ومن حوالي 4 سنين بدأت فكرة انشاء مصنع لفوكس يخلط ويعبئ الزيوت المعدنية كلها طبعا بمواصفات فوكس المانيا وتحت اشراف كامل منها وبالفعل تم الانتهاء من انشاء المصنع ده من حوالي سنة يعني اخذ 3 سنين انشاء والسنة اللي فاتت دي كانت عبارة عن تجارب انتاج بسيطة لحد ما المصنع ابتدى انتاج فعلي بقاله اقل من شهر

2- حاليا بيتجهز حملة دعاية محترمة هاتبدأ تقريبا من رمضان اللي جاي ان اشاء وكمان الويب سايت حاليا بيتعمله update لأنه كان اتعمل من فترة قبل انشاء المصنع وكانت المنتجات ساعتها قاصرة على الشحم والفرامل وبعض انواع زيوت الجير بوكس

3- بالنسبة لموضوع ما يميز منتج فوكس عن باقي المنتجات بص يا سيدي خلينا نتكلم عن الزيت التخليقي لأنه ده طبعا اللي كل الشركات بتحط فيه اعلى تكنولوجي عندها وهو ده اللي ممكن نقيم به مستوى الشركة .... احنا هنا في فوكس عندنا نوعين زيت تخليقي (Titan Super Syn 5W40) وده اللي بيكافئ موبيل 1 وشل الترا والزيت ده تقدر تعتبره كوبي من موبيل 1 لأن فوكس باعت التكنولوجي بتاعته لموبيل وكان من ضمن الاتفاق ان موبيل تكتب على الجالون بتاعها تكنولوجي superSyn لمدة 3 سنين انتهو السنة اللي فاتت 2012 يعني اي جالون موبيل 1 من 2009 ل 2012 هاتلاقي مكتوب عليه supersyn technology ... النوع التخليقي التاني اللي عندنا اسمه (Titan GT1 5w30) وده بقى أسطورة حية في عالم الزيوت اختراع يا كوتش :)) ده طبعا ما بيتعملش في مصر ده بيجيلنا جاهز متعبي في كرتونته من المانيا حتى ال know how بتاعته ما نعرفهاش هنا في مصر ومافيش شركة في العالم عندها التكنولجي دي المهم بقى يا سيدي الزيت ده بيشتغل30000 كم التكنولوجي بتاعته اسمها XTL تكنولوجي وبتعمل الآتي : تقليل التآكل في أجزاء الموتور الداخلية وغرفة الاحتراق بنسبة 20% - زيادة سرعة دوران الزيت في أجراء المحرك عند بداية التشغيل يعني الزيت بيكمل دورة كاملة في المحرك في بداية التشغيل والعربية باردة في حوالي 8 ثواني وبالمقارنة مع باقي الزيوت التخليقية هانلاقي الزمن ده عندهم من 55 - 70 ثانية يعني بالمختصر كده حضرتك تدور وتطلع على طول لا تسخين ولا وبتاع والكلام ده صيف شتاء - زيادة ال (viscosity index (VI وده هو مقياس مدى تغير لزوجة الزيت مع تغير درجة الحرارة وزيادة ال VI معناها ان لزوجة الزيت تقريبا ما بتتغيرش مع تغير درجة الحرارة وده بيخلي الزيت يشتغل في ظروف تشغيل اصعب بكتير - فيه كمان اضافة في الزيت ده وظيفتها تقليل الاحتكاك بين طبقات الزيت وبعضها وبالتالي تقليل نسبة استهلاك الوقود بنسبة 7% - وكمان في اضافة اسمها Anti ash additive دي فايدتها تقليل تأثير الرواسب والاتربة العالقة في الزيت اثناء التشغيل على خصائص الزيت نفسه وده طبعا بيطول مدة التشغيل للزيت لحد 30000 كم - طبعا في حاجات تانية كتير انا حاولت اختصر والله على قد ما اقدرت يكفي اني اقولك ان الزيت ده هو initial fill بتاع مواتير مرسيدس وبي ام اللي بتخرج من المانيا لأي دولة في العالم

4- طبعا بالنسبة لزيوت المحركات فهي كما هو معروف منقسمة ديزل وبنزين فخلينا نتكلم عن البنزين عشان انا عارف انه ده اللي يهمك اكتر عندنا حاليا في مصر 3 انواع:
- Titan Super GT 20W50 وده زيت معدني طبيعي SL
- Titan Super Syn 10W40 وده زيت تخليقي 100% SM
- Titan GT1 5W30 وده تخليقي 100 % SM

5- Titan Super GT 20W50 115 LE
Titan Super Syn 5W40 260 LE
Titan GT1 5W30 360LE

6- السؤال ده بقى هو الخطأ الشائع اللي بيقع فيه معظم الناس اوعى تروح شركة زيوت وتقولهم ايه المناسب لعربيتي العكس تماما هو الصحيح انت تشوف صانع العربية محدد للعربية ايه وتطلب انت الزيت على حسب كلامه وطبعا الكلام ده هاتلاقيه في المانيوال بتاع العربية او الوكيل ممكن يقولك عليه انما طبعا في حاجات بتبقى معروفة بالخبرة كده خصوصا في العربيات المنتشرة يعني حضرتك مثلا عربيتك تمشي ب grade 40 يعني ممكن 10W40 يبقى تمام جدا معاها

7- حاليا البيع عندنا بيتم عن طريق مناديب البيع وده بيكون مع تجار التجزئة مباشرة وفيه منفذ بيع طبعا ملحق بالمصنع انما ان شاء الله حاليا في خطط لانشاء منافذ بيع تبقى ملحقة بمراكز خدمة سيارت يعني غسيل وتشحيم وكاوتش وظبط زوايا والمراكز دي هاتبقى شبه البنزينات كده بس من غير ما تبيع بنزين وده بسبب ان فوكس المانيا مش من توجهاتها ال FUEL STATION هي LUBRICANT فقط فاحنا هنا مانقدرش نغير في سياسة فوكس عشان ماتسحبش الرخصة مننا

8- والله انا الحمد لله شايف الشركة في تصاعد مستمر المصنع صحيح اخد وقت لحد ما خلص بس ده طبيعي انت بتنشئ مصنع خلط زيوت مفيش في مصر غير 5 شركات بس من اصل 18 شركة هما اللي عندهم مصانع والباقي بيخلط عندهم احنا مثلا بنخلط في مصنعنا لكذا شركة مش هاقدر طبعا اقول اساميهم وحاليا احنا واخدين رخصة من فوكس اننا ننتج منتجهم بنفس المواصافات بتاعتهم لكن هما ناويين يشتروا 51% من اسهم الشركة عشان تتحول الادارة ليهم وده طبعا هايزيد من قوة الشركة ووضعها في مصر بالتأكيد .. يعني عموما نقدر نقول ان الشركة الحمد لله في تطور مستمر

9- احنا طبعا واخدين رخصة تجدد سنويا من فوكس المانيا ولازم طبعا عشان نضمن استمرار الرخصة اننا نلتزم بمعايير الجودة الخاصة بفوكس وهما بيضمنوا ده انهم بيبعتوا مندوب من فوكس المانيا مرتين في الشهر يعمل Audit على كل ما يخص الجودة وياخد عينات عشوائية معاه يحللها في المانيا طبعا العينات دي بياخدها من المصنع ومن السوق بردو وبتتاخد بمعرفته هو فقط الي جانب طبعا المواصفات بتاعة الزيوت الخام اللي فوكس بتلزمنا باستخدامها والاضافات كلها هما اللي بيبعتوها من عندهم يعني بالاختصار كده الزيت ده نسخة من اللي بيتعمل في المانيا من زيت خام لاضافات لنسب خلط لمراجعة كل حاجة بس طبعا كله كوم وال GT1 كوم ده بيجي متعبي من عندهم ما نعرفش حتى بيتعمل ازاي ده سر حربي يا معلم :)

ما هو أفضل زيت فتيس اوتوماتيك أوبل استرا 2004