الابلاتين لادع !!!!

**max100x** · 04-04-2013 02:45 PM

كلمه سمعتها النهارده من الميكانيكي لما العربية وقفت معايا
"الابلاتين لادع"
تشخيصي هو انها قطعت كهربا خالص

جبت ابلاتين عندي كان شغال قبل كده بس انا غيرته في وقت الصيانه الدوريه و حطيته مكان القديم

و بسبب اني مثبتهوش كويس فالعربيه مشتغلتش

المهم جه عفركوش و ثبته و اخد 20 جنيه

كل ده مش مهم عندي بس افهم كلمه لادع معناها ايه

هل الاطراف بتاعه الابلاتين اللي بتتطابق مع بعضها اتاكلت نتيجه الشراره فمش بيحصل توصيل للكهربا؟

و هل فيه حل للماروتي علشان بجد قصه مقرفه شويه

**Amr Axel** · 04-04-2013 03:22 PM

بيبقي منقور و ميوصلش و ممكن يتصنفرو يتظبط مؤقتا لحد ما تجيب واحد بس طالما معاك واحد شغال خلاص
الحل في المشط الالكتروني لكن متمش التجربة الفعلية الناس هنا كانوا بيفكروا تجربة القصة ديه ع الماروتي عشان يرتاحوا من تغيير الابلاتين كل شوية لكن مفيش اي جديد تم
بس عامة حاول متخليش الكونتكت مفتوح ع الفاضي كتييير لأن ده من اسباب تلفه بسرعة و لو حسيت ان الابلاتين خلاص بيخلص غيره

**max100x** · 05-04-2013 08:21 PM

المشاركة الأصلية كتبت بواسطة alking_2006

الابلاتين لادع بيكون بمعنى ان الاطراف المعدنيه بتاعته مع العمر بتتأكسد و بيكون توصيلها للكهرباء اللى جايه من الموبينه (حوالى 12 الف فولت) ضعيف او شبه معدوم

بس انتا مش متابع تغييره ليه مع الصيانة الدوريه (كل 20000 كيلو) و بكدا هتنسى القصة بتاعة انه يلدع فجأة؟

و بردو نصيحة بلاش تجيب الابلاتين اللى فى السوق علشان بيبقى مضروب احنا بنجيب ابلاتين يابانى بتاع تويوتا من اكرم حمدى بيبقى بحوالى 40 جنيه بس بيعيش و يعمر معاك

و بردو لما تيجى تغيره لازم الخلوص بتاعه يتظبط بفيلر و بيكون 0.5 مللى و يتربط كويس

والله يا احمد انا جايبه من اكرم حمدي و مكملش معايا الرقم اللي بتقول عليه....شكلها الموبينه هي السبب لاني شوفتها سخنه ولعه قبل كده و بعد قصه الابلاتين دي عرفت انها السبب
هدور علي موبينه الكتروني تشتغل عندي بدل القلق ده