+111111111111111
بالتفصيل يا افندم
الموديل : Turanza GR90
بلد الصنع : اليابان
المقاس : 195/65/15
السرعة : V
اقصى وزن: 91
traction : A
temperature : A
لمزيد من المواصفات
http://www.bridgestone.com.au/tyres/treads/GR90.aspx
بعد التجربه لمدة يوم واحد - اقصى سرعه 60 كيلو - العربيه بقت اهدأ نسبيا - أتقل فى الطلعه نسبيا - الثبات فى المناوره زاد بنسبه كبيره - اداء الفرامل اتحسن بشكل ملحوووووووووووظ
النهارده ان شاء الله هاجرب على سرعه بين 100 - 120 وبإذن الله قريب هاجرب العربيه فى طريق مفتوح
مفيش حد يتبرع لى بفرده أعملها استبن
لو حد عايز يشترى فرده 15/185/65 عامله 10.000 كيلو فقط أو أقل انا تحت امركم -
لسه راجع حالا من بره واحب انقل لكم تجربتى بعد سواقه متواصله لأكثر من 4 ساعات (لما طلع عينى - لأن بطلت اسوق فترات طويله)
1- صوت الكاوتش على الاسفلت - قل بنسبه لا تزيد عن 10%
2- تماسك العربيه اثناء السير فى خط مستقيم - زاد جدا العربيه بقت لا بتحدف شمال ولا يمين
3- العربيه فى المناورات - الثبات زاد جداااااااااااا
العربيه فى الفرامل - الله أكبر ولله الحمد رد فعل رائع - أكتر حاجه كانت مزعلانى فى الالنترا هيه الفرامل - بجد التحسن لا يقل عن 40%
4- سحب العربيه قل نسبيا فى الطلعه لكن بعد كده عادى
5- وديه ميزه - الدريكسيون تقل شويه وبنسبه ملحوظه
6- حتى الان لم يتم التجربه على سرعات عاليه وربنا يسترها عليه وعليكم
7- بخصوص المطبات العربيه بقت انعم - لكن فيه صوت زى دبه لو مطب جامد شويتين - استأذنك ادينى كام يوم وهارد عليك فى النقطه ديه
وبجد انا بشكر كل الاخوه اللى شاركونى فى الموضوع وان كان عندى عتاب بسيط جدا جدا جدا على النجوم
ليه الناس مش بترد وتتكلم فى المواضيع - حتى لو بتخمين - المهم اننا نحس ان فيه مشاركه
انا كنت ومازالت من رجالة الدايو - بجد الدنيا هناك مختلفه جدا - تسأل السؤال - فى أقل من 30 دقيقه تلاقى أكتر من رد
لكن هنا الدنيا هاديه شويه - الاغرب ان نسبة المشاهدات عاليه جداااااااااااااااااااا - لكن الردود ضعيفه حبتين
للمره التانيه الف شكر لمساعدتكم ليه ويارب نبقى انشط منتدى ونبقى النجوم بجداستكمالا لتجربتى
أولا بخصوص المطبات فعلا العربيه احسن بكتير جدا - وفعلا انصح اى حد يغير لمقاس ال 195
نيجى لأخر تجربه
السرعات العاليه
الحمد لله جربت العربيه امبارح وجبت بيها 180 على طريق مصر اسكندريه ولمدة 5 دقائق فقط - وبصراحه مردتش أزود لسببين - الاول ان الطريق كان زحمه
السبب التانى انى فعلا بطلت أجرى واكتشفت انى فعلا والحمد لله فقدت نهائيا مهارة انى اجرى بسرعه
تقييمى للسرعات
العربيه من 0 - 100 ثبات رائع وكل العربيات كده - والمناوره اتحسنت كتييييييييير
العربيه من 100 - 140 ثبات مختلف تماما عن السابق - العربيه كانت بتبقى زى ما تكون مبرجله - لكن دلوقتى والحمد لله بقت ناعمه جدا بالاضافه لعدم الاحساس بالسرعه اساسا - احساسى انى كنت ماشى على 80 بالكتيييييييير مش 140 - واحساس المناوره احسن بكتيييييير
........* العربيه من 140 - 180 بصراحه احساسى ان فيه حاجه غلط فى العربيه مش فى الكاوتش - العربيه كانت بتحدف معايا شمال شويه ويمين شويه - وبصراحه ديه غريبه قوى ومش عارف سببها ايه - انا اول مره اوصل بالالنترا ل 180 - انا كان معايا لانوس وكنت بجيب بيها 185 وكانت ثابته جدا - لكن الالنترا كانت فعلا مايتقلش عليها غير انها هابله بجد - العربيه بتجرى والسلام - وانصح اى حد مش محترف (زيى) انه ما يغمرش بأنه يسوق الالنترا بسرعه فوق ال 140
بالمناسبه انا باسوق من سنة 1991 - وسوقت مليون عربيه (أو مليون الا ربع مش فاكر بالظبط) وبأكد ان ده مش مقياس علشان حد يجرى بالعربيه - لأنها بجد زفت قوى على السرعات
أخر تقيم ولو انه ملوش علاقه بالموضوع - وكلنا عارفينه - تجميع العربيه فعلا أكثر من رائع (انا عربيتى مانيوال) بمنتهى بمنتهى بمنتهى السهوله بتوصل ل 140 - وبسهوله وصلت ل 180 - وعن تجربتى الشخصيه لو على طريق العالمين - العربيه ديه تقفل عداد (220 كيلو) - بشرط انك تبقى لواحدك وتكتب وصيتك قبلها
فى النهايه - انا كنت زعلان حبتين على الفلوس اللى دفعتها فى الكاوتش لأنى فعلا مزنوق ماديا جداااااااااااا - وفعلا انا مبسوط جدا جدا جدا بأنى دفعت ال 3000 جنيه دول - فعلا القيمه اللى اخدتها أعلى بكتير من الفلوس اللى اتدفعت
وللمره المليون وكل الناس بتقول الكلمه ديه - بلاش استخسار فى الكاوتش بالذاااااااااااات
المفضلات