الموضوع: نويت اشتري إبيزا وعايز نصيحتكم

المشاركة الأصلية كتبت بواسطة mikho83

والله يا جماعة انا حاسس بجد اني بين اخواتي.
طيب انا مش بفهم في العربيات خالص، واكيد وانا رايح اشتري هاخد معايا ميكانيكي يشوفها وناس من اصحابي اللي بيفهموا في العربيات. بس انا مش فاهم نقطة، كابراتير أحسن ولا انجيكشن وايه الفرق بينهم؟
معلش هاتعبكم معايا يا رجالة، بس بجد أخوكم ميح في العربيات :)
سؤال أخير، اروح سوق السيارات أحسن يوم الجمعة ولا اشوف حاجة ع النت؟

ياباشا انت فعلا وسط اخواتك وانا والله لولا انى من اسكندرية كنت نزلت معاك نشوف عربية كويسة مع بعض

عموما بالتوفيق ان شاء الله

بالنسبة للكاربرتير والانجيكشن فكل واحد ليه ميزة وعيب ولك حرية الاختيار
انا كنت راكب عربية كاربرتير بس كانت لادا وكانت ميزيتها انى كنت بحطلها بنزين 80 عادى جدا وهو عبارة عن بوابة و بيكات (جمع بيك او ابرة) ودى اللى بتغزى الكاربرتير بالبنزين و لما البيك يتسد بيتفك ويتنضف عادى

وبعدها ركبت عربيات كتير انجيكشن بس لازم على الاقل تحط بنزين 90 عشان ميسدش الرشاشات والرشاشات دى هى اللى زى البيكات فى الكاربرتير وممكن تتسد وعشان تتنضف وده نادرا مع بنزين 90 او 92 بتجيب مادة لتنضيف دورة البنزين وبتضيفها على التفويلة وبس

لو هنتكلم على الفرق فى الاستهلاك هيكون لصالح الانجيكشن لأنه بيغذى البنزين بحسابات دقيقة جدا عن طريق الكونترول يعنى من الاخر بينقط العربية بالبنزين

بالنسبة للأبيزا الكاربرتير حاليا هيبقى صعب تلاقي الموتور ده لأنه نزل فى موديلات 94 بس يعنى موتور بقاله 21 سنة شغال وحتى لو حبيت تجيبه استيراد هتلاقيه قليل قوى
فخليك فى الانجيكشن افضل من ناحية الاستهلاك لأن اساسا مفيش بنزين 80 دلوقتى واللى انت كنت هتوفره فى فرق سعر الـ 80 عن الـ 90 هيتوفر برده بس فى الاستهلاك يعنى هى هى
والموتور الاستيراد الانجيكشن مرمى فى كل حته وسعره من 2000 الى 3500 حسب الملحقات اللى هتجيبها معاه و 500 جنيه مصنعية تسقيط

اهم حاجة لو هتجيبها انجيكشن تكشف عليها كومبيوتر عند ميكانيكى فولكس