أية الفشل الإعلاني دة !!!!!

**Adham** · 09-08-2008 12:06 PM

أمبارح فتحت ملحق السيارات اللي بينزل مع اهرام الجمعه
و كان أول القصيدة كفر زي ما بيقولوا
اعلان الصفحه الأولى صورة كبيرة لعربية أسبيرانزا موديل جديد 4*4 اسمها تيجو جميل جدا
بس أبص في الصورة الاقيهم مصورين عربية إكصدامها الأمامي واخد كسر كبير بالطول من فوقة لتحتة
قلت أية القرف دي هوة مافيش حد يبص عالمادة الإعلامية للناس دي في الشركات دي , يعني يعملك إعلان عن عربية و يحط صورة لعربية مخبوطة او مكسورة مثلا, يعني بيقولك احنا عربياتنا وحشة وضعيفة و بتتكسر بسهولة مع ان مفروض العربيات ال SUV 4x4 دي مفروض ان الاعلانات بتركز على انها عربيات خدمة شاقة و متينة و تستحمل مش اكصدامتها ورق

ماشي..............

اخش جوة الملحق الاقي صورة لعربية مسخ كدة اسمها لاند روك تحس انها ملطوشة و متكبيرة من الباجيرو و اللاندكروزر في تقليد تعبان كدة
و في الإعلان حاطين صورة كبيرة و كاتبين كلام كتير دش دش و للا لية معنى و لا قال في الاخر العربية دي تبع ماركة اية و لا صناعتها أية

تبقى أية ....... صيني

الصورة بقى صورة قميئة متركبة لصورة عربية و مقصوصة و ملزوقة على خلفية صحراوية
و منظر الكاوتش بتاعها وحش قوي و مقصوص غلط

طيب ماشي

نقرا بقى الدش اللي مكتوب.......... شوف ياسيدي الجهل بعينة العربية موتور جبار 2000 سي سي "V6" ميتسوبيشي 4 سلندرررررررر

نعم يا اخويا إزاي يعني

في و احد يعرف ألف باء عربيات و يكتب كدة و للا هوة ضحك عالدقون على إعتبار ان الناس اللي بتقرا الاعلانات ناس جاهلة و أهو نشتغلهم بأي معلومات خلليهم يشتروا و السلام
و في الأخر إسمها غلطة مطبعية و لا تندرج تحت بند الغش التجاري

**OlaOsman** · 09-08-2008 12:23 PM

ده بأه يندرج تحت بند ال"أي حاجة"

**Hassan Khalil** · 09-08-2008 12:33 PM

نفس اللي حضرتك بتقوله عدي عليا بالمللي امبارح ..
و استفزتني جدا العربية المفتكسة اللي اسمها لاند روك .. و التي ليس لها علاقة لا باللاند و لا بالروك ..
-------
لكن بالنسة لاسبرانزا الصفحة الاولي .. بعد فترة من التدقيق و التمحيص في الاكصدام ..حتلاقي انه مش شرخ .. و لكن بروز خفيف للاكصدام في الجانبين .. و ممكن يظهر اثره بصورة واضحة علي فانوس الشبورة الايسر .. حتحس و كأنه مقصوص منه حته نظرا لبروز الاطصدام للخارج

**OlaOsman** · 09-08-2008 12:41 PM

المشاركة الأصلية كتبت بواسطة Hassan Khalil

نفس اللي حضرتك بتقوله عدي عليا بالمللي امبارح ..
و استفزتني جدا العربية المفتكسة اللي اسمها لاند روك .. و التي ليس لها علاقة لا باللاند و لا بالروك ..
-------
لكن بالنسة لاسبرانزا الصفحة الاولي .. بعد فترة من التدقيق و التمحيص في الاكصدام ..حتلاقي انه مش شرخ .. و لكن بروز خفيف للاكصدام في الجانبين .. و ممكن يظهر اثره بصورة واضحة علي فانوس الشبورة الايسر .. حتحس و كأنه مقصوص منه حته نظرا لبروز الاطصدام للخارج

بس يا حسن ده شكله شرخ خالص

**Hassan Khalil** · 09-08-2008 12:48 PM

بالفعل يا علا .. انا تخيلته كده .. لكن بصي عليه كويس من طرفه السفلي .. حتلاقيه باين انه بروز للخارج ...بمعني تاني .. عايزين يدوا للاكصدام ( نفحة ) رياضية .

**Adham** · 09-08-2008 12:49 PM

متهيألي محتاجين نعاين العربية نفسها علشان نشوفها عالطبيعه فعلا نازلة بسوكة غبية كدة في الاكصدام و للا مافيش حاجة و بالتالي يبقى مصورين عربية محدوثة

انا معتقد انة كسر في الاكصدام
و بص كمان عالاكصدام من الأخر تحت الداير
اعتقد انة مطبق, بس ممكن يكون عيب إضاءة في الصورة
أمبارح برضة اترددت هل دة خبطة و للا عيب إضاءة علشان كدة ماكتبتش عنة

بس برضة لو دي سوكة و عيب إضاءة في الاكصدام يبقى مفروض الصورة اللي تتحط في الإعلان يتراعى فيها الإعتبارات دي, و مايتحطش صورة مبهمه كدة لا باين ان العربية مخبوطة و للا الاكصدام مكسور و للا عيب إضاءة

**mmido32** · 09-08-2008 12:51 PM

انا بايد راي حسن ده مش كسره و في زيه الناحيه التانيه
و العربيه التانيه عجلها مش مقصوص غلط انا شايف انها غرزا في الرمل

**Shocky** · 09-08-2008 12:53 PM

انا حاسس انة عيب من الشخص اللى عمل الاعلان نفسة
يعنى مش عيب فى العربية
بحيث يكون مثلا كان شغال وعمل خط وهو مش واخد بالة , هى حاجة مش واردة الحدوث اوى بس ممكن برضو

اللى خلانى اقول كدة إن فى حاجة عند الإشارة الجانبية فى الرفرف , ومعرفتش افسر دى إية

ممكن تكون غلطات من المصمم فعلا , الله اعلم

أنما غلطة ال V6 انها 4 سلندر , اهى دى غلطة بصراحة مش عارف اقول عنها إية
المفروض دى اكبر جريدة فى مصر وليها مراجعة على الاقل

وشكراً ليك

**Shocky** · 09-08-2008 12:55 PM

بالنسبة للصورة التانية
مقصوصة بشكل غير احترافى
وتم تركيبها برضو بنفس الشكل
شغل لا يليق بالأهرام خالص الصراحة
لدرجة ان المصمم اللى عمل الاعلان او الصورة دى
مفكرش ان فى حاجة اسمها Lighting effects
وشكراً ليك

**Ghamrawy** · 09-08-2008 12:57 PM

المشاركة الأصلية كتبت بواسطة Adham

الصورة بقى صورة قميئة متركبة لصورة عربية و مقصوصة و ملزوقة على خلفية صحراوية
و منظر الكاوتش بتاعها وحش قوي و مقصوص غلط

طيب ماشي

نقرا بقى الدش اللي مكتوب.......... شوف ياسيدي الجهل بعينة العربية موتور جبار 2000 سي سي "V6" ميتسوبيشي 4 سلندرررررررر

نعم يا اخويا إزاي يعني

في و احد يعرف ألف باء عربيات و يكتب كدة و للا هوة ضحك عالدقون على إعتبار ان الناس اللي بتقرا الاعلانات ناس جاهلة و أهو نشتغلهم بأي معلومات خلليهم يشتروا و السلام
و في الأخر إسمها غلطة مطبعية و لا تندرج تحت بند الغش التجاري

ماهو جرنان حكومى و اللى كتب ............اسف ......قصدى اللى رجع

الكلام ده موظف حكومة برضة يعنى مال سايب و اى هبل و اى عك و السلام