الموضوع: رحلات صيد...!!!

المشاركة الأصلية كتبت بواسطة أبو عبدالرحمن

أنا سعيد والله إنكو متحمسين كده لموضوع الصيد ،،فعلا الموضوع ممتع جدا ،،وأنا على استعداد لمساعدتكو والرد على أي تساؤلات ،،بس الأول أنصحكوا تزوروا منتدى الصيد www.egfishingclub .com وتاخدو فكرة الموضوع عامل إزاي،،وبعدين أنا تحت أمركو في أي تساؤل ،،،عموما أنا هاقول شوية معلومات مختصرة عن الموضوع واللي عنده سؤال يتفضل يسأل: الموضوع كالتالي :بالنسبة لأني شايف التاس أول مرة تصطاد يبقى العين السخنة مناسبة جدا ،،وبيكون الموضوع إن الناس بتكلم صاحب مركب من مراكب مارينا وادي الدوم وبتحجز معاه وأظن يوم واحد في البداية هايكون أنسب،،والمركب بتاخد 8 أفراد بحد أقصى لو مركب متوسطة وده علشان الناس تعرف تقعد مستريحة وتصطاد ،،أسعار المراكب تتراوح ما بين 800 إلى 1500 جنيه حسب حجم المركب وفخامته وتجهيزاته ،،وأظن إن المراكب اللي في حدود 800 هاتكون مناسبة جدا ،،وبالمناسبة المركب مش بيكون عليه عدد الصيد المفروض كل واحد يجيب عدته معاه ،،وطبعا علشان كده يبقى لازم فيه حد بيفهم في الصيد هو اللي يقولكو تجيبوا ايه ومنين علشان ماتدفعوش كتير في حاجات مش مناسبة للصيد هناك ومش هاتستعملوها،،،وكذلك بالنسبة للطعم والاكل ،،اللي بيروح يركب بيجيب معاه كل حاجة وطاقم المركب بيجهزولوا الأكل ويعملوا الغدا ويساعدوا الناس في الصيد ويخدموهم،،،والمركب بتطلع الساعة 7 صباحا وهم المسئولين عن التصاريح وكل حاجة وبترجع على الساعة 7 مساء ،،،،وكل التفاصيل عن اللي أنا قولته ده موجود في منتدى الصيد ولو أي حد ليه أي استفسار آخر أنا تحت أمركو

تمام كده انا طلعت المشوار ده من شهرين تقريبا
و عندي رقم مركب اسمها حميدو تاخد بتاع خمسة انفار و مش غالية و في رقم يخت اسمه باراكودا بس نظيف و كبير

أنا طبعا ماليش في الصيد خالص بس اصطدت سمكة اسمها الخنزيرة (اربع سمكات) و سمكة اسمها جمبرورة (سمكتين) و سمكة ملونة مش فاكر اسمها ايه

احنا طلعنا من المنصورة - القاهرة - السخنة و طلعنا من المارينا الساعة 7 صباحا و يمكن 6 و نص و رجعنا 7 مساءا و عدنا للمنصورة ونمنا يوم كامل

لو تحبوا الأرقام ممكن أجيبهاكوا

بقى اغيب يومين ارجع ألاقي المنتدى غرقان في شبر مية وكلكم يقيتوا صيادين :) يا جماعة بلاش ده إماااااااااااااااان ومالهوش دواء حتى الان.... انا حزرتكم وامري لله

على العموم لا يفتى ومالك في المدينة ..... وطالما اخونا ابو عبد الرحمن موجود يبقى هو سيد العارفين وانا بردة موجود للمساعدة بس اؤكد ان زيارة منتدى الصيد حتفرق كتير مع من له عشق او اسئلة عن الهواية

طيب بما ان المركب مافيهاش عدة يبقى مطلوب من اخونا ابو عبد الرحمن و Goodwave قائمة بالعدة المناسبة لاول طلعة
ياسلام بقى لو فيه اماكن شراء و الاسعار يبقى ممتاز جدا

ياريت نعرف ننظم طلعة قبل رمضان

على فكره يا جماعه أخونا أبو عبد الرحمن ده من أمهر الصيادين اللي بيصطادوا في العين السخنه وما شاء الله عليه متمكن جداً وخبير.

أنا طلعت معاه رحله صيد في العين السخنه قبل كده وكان شرف كبير لي وهو فعلاً إنسان محترم جداً وخلوق والرحله معاه بتكون تجربه سعيده جداً.

بأمانه يا جماعه لازم على الأقل يكون في 3 بيفهموا في الصيد على المركب، عشان لو المركب كلها مبتدئين الموضوع هايكون فيه تعب جامد أوي للناس اللي عندهم خبره في الصيد وهايكون الحمل عليهم جامد وحصيلة السمك مش هاتكون كويسه.

على فكره العرف هو إن السمك كله بيتجمع وبيتقسم على الناس كلها، واللي يصطاد سمكه مميزه سواء كبيره أو غريبه من حقه إنه ياخدها لو عاوز.

أنا حبيت أقول الكلام ده بصفتي مبتدئ وعارف أنا قد إيه كنت باتعب الناس معايا، سواء في تركيب السنون أو إختيار الطعم أو تسليك الخيط لما يشبك في الشعب.

عامة نصيحه تبدأو بحجز المركب، عشان المراكب ساعات بتكون محجوزه بالشهر قدام

ولازم قبل ما تحجزوا تستشيروا أخونا حسن أبو عبد الرحمن في الميعاد المناسب عشان يكون في موسم سمك معين وفرصة الصيد الكتير تبقى أكبر

يا جماعة جزاكم الله خير على الكلام الجميل ده ،،،بس الصيد ده مافيهوش كبير كل يوم الواحد بيتعلم واسألوا أحمد Goodwave ،،كل مرة بنصطاد بنتعلم حاجة جديدة والبحر مالوش كبير ،،،،marsguy هو اسم حضرتك ايه ،،وامتى طلعنا؟؟؟وأنا شاكر على الكلام العظيم اللي حضرتك قولته عليا ،،وعندك حق في موضوع الحجز لازم لو عايزين تطلعوا تحجزوا من دلوقتي لأن المراكب كلها مشغولة ،،،أستاذ MTAK هو الكمين مش ناقص توصية وبعدين إن شاء الله ربنا يرزقك بالسمك اللي انت عايزه بس خلى ودنك مع الصفارة عشان إن شاء الله نرتب رحلة قريب بإذن الله ،،،بالنسبة للعدد فدي مش مكلفة أوي يعني ولو عايزين نرتب مع بعض وننزل نجيبها أقولكوا منين وهي ايه بالظبط ،،،،عموما استقروا عايزين ترتبوها إزاي وأنا تحت أمركو

المشاركة الأصلية كتبت بواسطة أبو عبدالرحمن

يا جماعة جزاكم الله خير على الكلام الجميل ده ،،،بس الصيد ده مافيهوش كبير كل يوم الواحد بيتعلم واسألوا أحمد Goodwave ،،كل مرة بنصطاد بنتعلم حاجة جديدة والبحر مالوش كبير ،،،،marsguy هو اسم حضرتك ايه ،،وامتى طلعنا؟؟؟وأنا شاكر على الكلام العظيم اللي حضرتك قولته عليا ،،وعندك حق في موضوع الحجز لازم لو عايزين تطلعوا تحجزوا من دلوقتي لأن المراكب كلها مشغولة ،،،أستاذ MTAK هو الكمين مش ناقص توصية وبعدين إن شاء الله ربنا يرزقك بالسمك اللي انت عايزه بس خلى ودنك مع الصفارة عشان إن شاء الله نرتب رحلة قريب بإذن الله ،،،بالنسبة للعدد فدي مش مكلفة أوي يعني ولو عايزين نرتب مع بعض وننزل نجيبها أقولكوا منين وهي ايه بالظبط ،،،،عموما استقروا عايزين ترتبوها إزاي وأنا تحت أمركو

السلام عليكم ورحمة الله وبركاته،،،

أنا إسمي محمد سعيد وطلعت معاك رحله من مارينا وادي الدوم يوم 25/08/2006 وكانت على المركب حياة

الرحله كان فيها حضرتك وفؤاد وأحمد دسوقي