الموضوع: مفاجئة عن اسبرانزا envy

المشاركة الأصلية كتبت بواسطة m i d o

اية ياعم مالك فتحت فيا كدة صلي علي النبي في قلبك كدة و استهدي بالله انا عملت الموضوع دة للنقاش عشان معروف ان اي معدل انضغاط اعلي من 10 يبقي بنزين 95 وكمان في قسم الامجراند اول ما نزلت كان انضغاطها 10.3 وكان كل الاعضاء هناك خايفين من ال .3 دول وحتي مشرف الصيني نفسة هوة الي قال كدة ياتري ال .3 دول هياثرو علي العمر الافتراضي للمحرك ولا لا ولما راجل زي دة اكيد فاهم هوة يقول كدة يبقي شاكك ان الزيادة دي ممكن تاثر علي العمر الافتراضي للمحرك يبقي بنسبة كبيرة هوة صح وانا لما شفت ال .5 زيادة دول قلت دة ال .3 بتوع الامجراند كانو قالقين الناس ما بالك بال .5 الزيادة وعملت الموضوع هنا عشان ان شاء الله هجيب العربية قريب واشوف ان كانت هتشتغل 92 ولا اصرف نظر عنها وبعدين براحة شوية يا باشا في الكلام احنا مش داخلين خناقة انت محسسني ان بيني وبينك طار

بص يا باشا .. موضوع البنزين 95 أو 92 أو رقم الأوكتان بصفة عامة في مصر مخالفاً للمعايير العالمية الأستاندرد اللي هي المفروض ( 87 - 91 – 93 – 95 – 98 - 100) .. وده اللي بيراعيه أي صانع سيارات في العالم وبيصمم المحرك بتاعه وفقاً لهذه المعايير .. ومن وجهة نظري الأنسب مع محرك الأنفي أو الاسبرانزا عموماً هو وقود 93 .

طب 93 مش موجود في مصر يبقى نحط يا 92 أو 95 .. طب أيه اللي حيحصل لو حطينا 92 ؟! العربية حتمشي عادي بدون مشاكل ولكن مش حتأخد أفضل أداء للمحرك (ولكن مش بصورة ملحوظة) .. ولو حطينا بنزين 95 حتاخد أداء المحرك كله بس بكلفة أكبر .

والتجربة في النهاية خير برهان .. والزملاء هنا في قسم اسبرانزا لما حطوا بنزين 95 في عربيات أم 11 و 516 أو حتى لما خلطوا بنزين 92 مع 95 .. كان السحب أفضل بكتير وأختفت ظاهرة التسقيف عند الكبس على دواسة البنزين (كيك داون) .. وكان الأداء بصفة عامة ممتاز أكتر من بنزين 92 فقط .

إذن المشكلة تكمن في عدم توافر نوعية البنزين 93 المناسبة تماماً لمحرك السيارة في مصر .. لكن 92 لم يكون مضر بالصورة الكبيرة .. وإن كان فيه ضرر فحيكون على المدى البعيد جداً .. وليس المدى القريب .. وفي الآخر أحنا راكبين عربيات داخل مصر وليس في حلبات سباق لإخراج أقصى قدرة للمحرك وأفضل أداء له .

وللمزيد من الأطمئنان الصورة دي بتوضح معدل الانضغاط ورنج أوكاتن البنزين المناسب (لا يقل عن أوكتان كذا .. ولا يزيد عن أوكتان كذا) .. لأنه لو الأوكتان قل حيحصل ضرر فعلي ومؤكد .. ولو زاد مش حيبقى ليه لازمة .

الخلاصة : حتمشي ببنزين 92 من غير مشاكل ومن غير ضرر .. ولكن الأداء حيكون أفضل في السحب والعزم لو اتحط ليها 95 ..

والفيديو ده حيكون فيه مزيد من الشرح لحساب معدل الانضغاط .. وده علشان نجيبه بالظبط في الأنفي لازم يتوافر لدينا الحجم الأقصى والحجم الأدنى للسلندر ..أو تسلم بما هو مكتوب في البروشور

[youtube]http://www.youtube.com/watch?v=3spDZ3kuwVQ[/youtube]