السلام عليكم يا شباب
الحمد لله روحت اليوم لعز العرب في أبو رواش لعمل صيانة الـ 5000 كم، وبصراحة كانت خبرة وتجربة سيئة، وزاد الطين بلة أنه عندي برد، وزوري محتقن، وفضلاً عن صداع، ورشح وما إلى ذلك من أعراض البرد.
اتصلت يوم الأربعاء الماضي، وكنت عايز احجز على الأحد، ولكن مسؤولة الحجز، قالت يوم الأحد مزدحم، ولا يوجد ميعاد فاضي. المهم حجزت لي على اليوم الاثنين الساعة العاشرة صباحًا.
وصلت التوكيل على الساعة 9:50 دقيقة صباحًا، وجاء مهندس الاستقبال استلم العربية، وكنت باشتكي من بعد صيانة الألف بدءًا من 2000 كم تقريبًا من ظهور صوت صفارة مع الفرامل. وروحت التوكيل متابعة لصيانة الألف بخصوص صفارة الفرامل دي. يومها قالوا لي ده من قفل الكنبة الخلفية والفرامل زي الفل. ويدوب وصلت لحد الدائري، وفي حتة زحمة، وصوت فرامل التريلا اشتغل!
كان بعض الأخوة المحترمين نصحوني أن أغسل التيل والطنابير بمسدس مياه بعدما تبرد الطنابير، وبالفعل عملت بنصيحتهم، والصوت راح شوية، ولم يبلث أن عاد. وبيظهر خصوصًا في الزحمة على السرعة البطيئة في الأغلب من تيل الفرامل الخلفي، مش متأكد من الجزئية دي.
المهم اشتكيت من صوت الفرامل وسجل الشكوى، والعربية دخلت تعمل فحص كهرباء، وخرجت على الساعة 11:30، وقعد مركونة منتظرة دورها في قسم الميكانيكا، تغيير زيت وفلتر، وتربيط عفشة، فضلا عن التعامل مع شكوى صفارة الفرامل. العربية دخلت الميكانيكا على الساعة 3:00 عصرًا تقريبًا؛ يعني ما يزيد عن 3 ساعات، العربية متنشرة وأنا معاها في الشمس!
المهم، غيروا زيت وفلتر وعمل تربيط وتزييت وما شابه. وجاء دور الفرامل، الفني طلع بالعربية من الورشة، دخل على المغسلة، وشغل مسدس المياه، رش على كل عجلة، بخة بخة بخة بخة، وتمام كده. مع أن الموضوع الذكي ده عملته كذا مرة، والصوت يروح لدقائق، وما إن تسخن التيل والطنابير، تبدأ سمفونية تصفير تشنف الآذان؛ يعني مجرد مُسكّن تصفير!
بعدها ركن العربية في الجراج، والصيانة خلصت كده! وتعالى نجرب العربية مع الباشمهندس. طلعنا بالعربية برا، الصوت راح مؤقتًا بالمُسكّن، والمهندس: ها تمام الفرامل ميه ميه...قولت له: مسافة ما اطلع الدائري، هيرجع تاني، قال لي: بخرطوم مياه ونظف برادة التيل!
روحت حاسبت، وخلصت إجراءات استلام العربية، وأخدتها ومشيت. يدوب طلعت الدائري عن وصلة المريوطية كده، والصفارة اشتغلت على السرعة البطيئة، واحيانًا العالية كمان.
بل الأدهى والأنكى من ذلك، أن مؤشر البنزين علّق من عندهم، ووقف على وضع امتلاء التانك، مع أني استهلكت ما يقرب من 7.5 لتر تقريبًا في المشوار ده رايح جاي من التجمع!
بصراحة اتضايقت جدًا، واتخنقت من العربية وإللي صنعها، والتوكيل طبعًا قبل ده كله!
وعذرًا يا جماعة على الإطالة والإسهاب، ولكن حبيت أوضح الصورة مكتملة.
مش عارف أعمل إيه صراحةً في موضوع الفرامل ده مع العلم أن التيل ورا وقدام بوش، المفترض انه ألماني وحاجة نظيفة!
محدش عنده حل للصفارة الجميلة دي؟!
