الموضوع: سمير بيومى بقى عنده فيزا اخيرا

المشاركة الأصلية كتبت بواسطة محمد يوسف

بصراحة أنا أول مرة أحاول أتعامل مع الناس دول وأخر مرة

أنا فرحت لما أستاذ ممدوح قال انهم بيشتغلوا فى الميشلان لأنى عايز أغير الكاوتش قريب وعينى ع الميشلان بس مش عايز أدفع كاش.. المهم رحت محل الايمان لأولاد سمير بيومى ودخلت جوه لغاية الكشك القزاز بتاع المدير..لقيت راجل فى نهاية الأربعينات أو أوائل الخمسينات عمال يكلم صنايعية وشكله هو الكومندان المهم ... سلام عليكم (ماردش)..ماعلينا ... لو سمحت كنت باسأل عن ميشلان 185/60/15 للياريس...بدون مايبصلى (كان باصص فى كشكول قدامه) قال لى مافيش !!!... جيت خارج لقيت واحد صنايعى واقف قال لى لأ موجود... المهم وقفت وقلت للراجل يعنى فيه ولا مافيش ؟
سيادته راح رافع دماغه وباصص لى وبص للصنايعى بغيظ وراح قايل : نشوف!!
ومد ايده طلع شوية ورق مكتوبين بخط الايد وقعد يقلب فيهم دقيقتين وبعدين قال لى : أه موجود!!
طيب الحمدلله..بكام ؟ قعد يحسب ع الالة الحاسبة وبعدين قالى 680 .. قلت له بس دى عند الوكيل ب 630 ..قاللى والله ده السعر اللى عندنا (بمنتهى الاستهتار)... قلت له طب لو سمحت هى انتاج امتى.. ابتسم بسخرية كده وقال لى أخر 2012..قلت له كويس قوى ..ممكن أشوفها؟ ..قال لى لو حاتشترى نجيبها ..قلت له ياعمنا أنا ان شاء الله حاخد 4 فرد بس أشوفها وأتأكد من تاريخها....راح ماشى قدامى لغاية باب المحل ونده لصنايعى وقال له يجيب فردة من المخزن.
لمهم الصنايعى خد ييجى ربع ساعة..خلال ال ربع ساعة دى سألته سؤالين : هو حضرتك مكنة الفيزا شغالة؟ راح باصص بمايشبه القرف كده وقال لى هو انت مش حاتدفع كاش؟ قلت له لأ فيزا ..قال لى كده الفردة تعمل 695 ..قلت له ليه بقى؟ قال لى هو كده ..الكاش غير المكنة..قلت له هو انت بتدى خصم ع الكاش؟ انت أصلا مغلى الفردة 50 جنيه عن التوكيل... قال لى والله عندك التوكيل روح له!!!!!! طبعا عملت انى ماخدتش بالى وبلعتها ووقفت ساكت ..شوية وسألته : طب حضرتك بتدى ضمان قد ايه..رد بألاطة شديدة مافيش ضمان ....قلت له ازاى يعنى؟ أشترى 4 فرد جديدة بحوالى 3000 جيه بدون ضمان ؟ قال لى والله احنا كده ..مين بتاع كاوتش بيدى ضمان فى شوارع مصر؟ قلت له انت مش بتدى ضمان للشارع انت بتدى ضمان للكاوتش ضد عيوب الصناعة ..قل لى لأ ..لو الفردة فيها حاجة اطلع ع الوكيل..قلت له طب مش حضرتك شارى من الوكيل ومديك ضمان؟ ليه ماتديهوليش؟ راح قال لى ..بص بقى ياباشمهندس احنا كده وعندك الوكيل لو مش عاجبك..وراح مدور وداخل جوه وسابنى على باب المحل
أنا وقفت دقيقة تقريبا مذهول ومخنوق منه وبعدين قلت يغور الكاوتش من وشه ورحت راجع ع العربية ولسه حادور شفت الصنايعى جاى بيجرى الكاوتش قدامه ع الأرض..رحت نازل قلت أشوفه من باب العلم بالشىء...نزلت لقيت الفردة متبهدلة وواضح انه متخزنة وسط زبالة ومش شكل فردة جديدة أبدا باقول للصنايعى دى انتاج امتى لقيته بيبص عالفردة وبيقول لى الأسبوع العاشر 2013...قلت له نعم؟؟؟ دى ماجتش من بلدهم لسه ..ورينى ..وباقلب فى الفردة لقيتها الأسبوع 15 سنة 2012 يعنى متخزنة من 15 شهر مش أخر 2012 زى الباشا التنك ماقال لى..قلت للصنايعى دى بقالها 15 شهر ..قال لى وايه يعنى ياباشا.. ده لغاية سنتين تبقى الفردة جديدة..أنا طبعا سمعت كده قلت يانهار أسود..دول ضايعين ادارة وصنايعية.. رحت راكب عربيتى ومشيت بلا عودة ان شاء الله

ياصبرك على كل الحركات المستفزه دى

ده لو كان كاوتش بيمشى العربيه لوحده يغور من وشه